Tokyoda rabiye qadir xanimning lentos kishilik hoquq mukapatigha érishkenlikini tebriklesh pa'aliyiti ötküzüldi

Ixtiyariy muxbirimiz haji qutluq qadiri
2015.12.16
rabiye-qadir-lantos-yaponiye-tebriklesh.jpg Tokyodiki rabiye qadir xanimning lentos kishilik hoquq mukapatigha érishkenlikini tebriklesh pa'aliyiti
RFA/Haji Qutluq Qadiri


13 - Dékabir tokyoda rabiye qadir xanimning 2015 - yilliq lentos kishilik hoquq mukapatigha érishkenlikini tebriklesh pa'aliyiti ötküzüldi.

Rabiye qadir xanim 10 - dékabir dunya kishilik hoquq künide merkizi washin'gtondiki lentos kishilik hoquq we adalet fondining 2015 - yilliq lentos kishilik hoquq mukapatigha érishken idi.

2015 - Yilliq lentos kishilik hoquq mukapatining sahibi bolghan rabiye qadir xanimni tebriklesh pa'aliyitini tokyoda pa'aliyet élip bériwatqan dunya Uyghur qurultiyigha wakaliten ish béjirish orni orunlashturghan bolup, pa'aliyetke tibet, mongghul, xitay démokratchiliri we bir qisim yaponlar qatnashqan.

Qutlash pa'aliyiti tokyo shinjukudiki türk résturanida élip bérilghan bolup,ziyaritimizni qobul qilghan dunya Uyghur qurultiyining yaponiyediki wekili doktor turmuhemmet hashim pa'aliyet heqqide toxtaldi. U shundaqla mezkur mukapatning yaponiye jem'iyitige bolghan tesiri we roli heqqide toxtilip ötti.

Bu pa'aliyetke ishtirak qilghan yaponiyediki Uyghur kishilik hoquq hémayichiliridin sato ziyaritimizni qobul qilip:“Rabiye qadir xanimning lentos kishilik hoquq mukapatigha érishkenliki xewirini anglap tolimu xoshal bolduq. Biz yéqin kelgüside xanimning nobél tinchliq mukapatigha érishishini arzu qilimiz” dédi.

Yaponiyediki Uyghur siyasiy aktipliridin gülistan rabiye qadir xanimning lentos kishilik hoquq mukapatigha érishishi yaponiyede élip bériliwatqan Uyghur dawasigha her jehettin köp paydiliq ikenliki toghrisida toxtaldi.

Rabiye qadir xanimning lentos kishilik hoquq mukapatigha érishkenlikini tebriklesh pa'aliyiti jeryanida tibet, xitay démokratchiliri we bir qisim yaponlar ayrim - ayrim halda sözge teklip qilin'ghan.

Tokyodiki Uyghur kishilik hoquq hémayichiliridin sato söhbitimiz jeryanida yene, bu qétim ötküzülgen tebriklesh pa'aliyitide ötken ayda tokyoda wapat bolghan, uzun yillardin biri yaponiyediki Uyghur dawasigha we Uyghur oqughuchilargha maddiy we meniwiy jehettin yardem bolghan merhum shireyshi ependining ish - izliriningmu eslep ötülgenlikini bildürüp mundaq dédi:“Bügünki pa'aliyette köpchilik birdek saxawetchi shireyshi ependining hayat waqtidiki bezi pa'aliyetlirige yuqiri bahalar bergende, sorunimizgha ishtirak qilghan merhumning ayali köz yash qildi” dédi.

Yuqiriqi awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.