Dölet baghcheli zeytinburnudiki Uyghur we qazaq jem'iyetlerning mes'ulliri bilen uchrashti

Türkiye milletchi heriket partiyisi re'isi dölet baghcheli, 2014-yili 19-yanwar yekshenbe küni istanbulning zeytinburnu nahiyisini ziyaret qildi we zeytinburnudiki Uyghur we qazaq jem'iyetlerning mes'ulliri we wekilliri bilen uchrashti.

Milletchi heriket partiyisining re'isi dölet baghchelini, zeytinburnuda yawro'asiya türk jem'iyetler fédirasiyoni, sherqiy türkistan weqpi, sherqiy türkistan yashlar jem'iyiti, sherqiy türkistan ma'arip we hemkarliq jem'iyiti, qazaq türkliri weqpi, sherqiy türkistan köchmenler jem'iyiti qatarliq Uyghur we qazaq teshkilatlirining mes'ulliri we wekilliri bolup köp sanda kishi kütüwaldi.

Dölet baghcheli qazaq türkliri weqpining aldigha kélish bilen kütüwélishqa chiqqanlar ichidin 10 yash etrapidiki milliyche kiyin'gen bir Uyghur bala we bir qazaq qizi gül chéchek teqdim qilip kütüwaldi.

Re'is dölet baghcheli 2014-yilliq yerlik saylam munasiwiti bilen, partiyisining zeytinburnu shöbiside yerlik saylam pa'aliyiti toghrisida tekshürüsh we saylam teyyarliqini küzdin kechürüsh üchün zeytinburnugha kelgen.

3-Ayda türkiyede omumyüzlük yerlik saylam élip bérilidighan bolup, bu saylamda her qaysi sheherlerning bashliqliri yéngidin saylinidu, bu saylamda utup chiqish üchün türkiyening her qaysi siyasiy partiyiliri bes-beste teyyarliq qilmaqta.

Zeytinburnuni ziyaret qilghan dölet baghcheli, milletchi heriket partiyisidin parlamént ezasi maral aqshener, jalal adan we murat besh'eski'oghli qatarliq parlamént ezalirining hemrahliqida keldi.

Dölet baghcheli qazaq türkliri weqpini ziyaret qilip, bu yerde Uyghur, qazaq we türkmen qatarliq xelqlerning zeytinburnudiki ammiwi teshkilatlirining mes'ulliri bilen uchrashti.

Qizghin keypiyat ichide pikir-almashturush élip bérilghan bu uchrishishta 30 din artuq ammiwi teshkilat we türk dunyasining muhim shexsliri qatnashti. Uchrishishta dölet baghcheli mundaq dédi: parlaq bir kelgüsi üchün bizning ana wetinimiz bolghan türk dunyasigha yüzlinishimiz, türk dunyasining mesililirining hel bolushi üchün chare-tedbir izdishimiz kérek, dédi.

Türk we qazaqistan bayriqi shundaqla ay yultuzluq kök bayraqning lepildishi astida uchrashqan bu ziyarette re'is dölet baghchelige Uyghur wekiller doppa hediye qildi. Doppini shu haman béshigha kiygen re'is dölet baghcheli Uyghur we qazaqlar bilen xatire resimge chüshti. Kéyin qazaq wekillermu uninggha qazaqlarning milliy kiyimi bolghan uzun chapan we qalpaqni kiydürdi. Re'is dölet baghcheli milliy kiyimni kiygendin kéyin “Türk dunyasining her qandaq kiyimliri bizge yarishidu” dédi.

Yawro'asiya türk jem'iyetler birleshmisining re'isi isma'il chin'giz, dölet baghchelidin türk dunyasining mesililirige téximu köngül bölüsh üchün, türk dunyasi ministirliqi qurulushini telep qildi.

Re'is dölet baghcheli bu uchrishishtin kéyin, zeytinburnu merkez meydanida échilghan yighin'gha qatniship zeytinburnu xelqige xitab qilip muhim söz qildi we milletchi heriket partiyisining zeytinuburnu sheher bashliqi namzatliqigha milletchi heriket partiyisining zeytinburnu shöbe re'isi fethi ehmet alp'arslanning namzat bolghanliqini élan qildi.

Biz bu heqte toluq melumatqa érishish üchün, dölet baghchelini kütüwélishqa qatnashqan Uyghur ziyaliy memettorsun Uyghur ependi bilen söhbet élip barduq.