Türkiye qanunchiliri Uyghur mesilisige köngül bölüshke bashlidi

Türkiye qanun tetqiqat uyushmisi bashqurush hey'iti sherqiy türkistan teshkilatida. 2013-Yili 23-iyul, türkiye.

Türkiye qanun tetqiqat jem'iyiti Uyghur mesilisige köngül bölüshke bashlidi. Uyghur mesilisining türkiye jama'etchiliki teripidin bilinishige egiship türkiyediki her sahe, her kesiptiki ammiwi teshkilatlar, tetqiqat merkezliri Uyghur mesilisige köngül bölüshke bashlidi.

23-Iyul küni kech, qanun tetqiqatchiliri jem'iyiti re'isi hüseyin qara bashchiliqidiki hey'et sherqiy türkistan medeniyet we hemkarliq jem'iyiti enqere shöbisining ishxanisigha kélip, Uyghurlarning hazirqi weziyiti toghrisida melumat igilidi. Hüseyin qara ependi mezkur uyushmining 1988-yili qurulghandin béri dunyaning herqaysi jayliridiki insan heqliri depsendichiliki we qanunsizliqlar toghrisida doklat teyyarlap yawropa parlaménti insan heqliri sotigha sunup kelgenlikini we köp muweppeqiyetlerni qolgha keltürgenlikini bayan qilip ötti. U sözide meyli xitayning asasiy qanunida bolsun, meyli aptonomiye qanunida bolsun Uyghur türklirige köp heq we hoquqlarning bérilgenlikini, emma xitayning buni emeliyleshtürmeywatqanliqini, özlirining bu heqte doklat teyyarlap munasiwetlik organlargha sunidighanliqini, hetta türk adwokatlar namidin xitay elchixanisi aldida metbu'at bayanati élan qilidighanliqini bayan qilip ötti.

Kéyin dunya Uyghur qurultiyi muhajirlar komitéti re'isi xeyrulla efendigil ependi xitay hökümitining Uyghurlargha élip bériwatqan bésim siyasiti toghrisida melumat bergendin kéyin, d u q teripidin teyyarlan'ghan bir yürüsh insan heqliri depsendichiliki toghrisidiki doklatlarni ulargha berdi.

Uchrishish axirida mikrofonimizni türkiye qanun tetqiqat uyushmisi re'isi adwokat hüseyin qara ependige uzattuq.

“ Uyushmingiz toghrisida qisqiche melumat bersingiz qandaq? ” dégen so'alimizgha u mundaq jawab berdi:
-Bizning teshkilatimiz 1988-yili bir guruppa qanunchilar teripidin qurulghan. Qurulghandin béri türkiyediki we dunyaning her qaysi jayliridiki zulum, insan heq we hoquqliri depsendichiliki toghrisida izdinip doklat teyyarlap kéliwatqan bir ammiwi teshkilat.

“ Bügün sherqiy türkistan teshkilatini ziyaret qilishingizdiki meqset néme?” dégen so'alimizgha hüseyin qara ependi mundaq jawab berdi:
-Sherqiy türkistan mesilisi uzun yillardin béri bizning kün tertipimizdiki bir mesile. Xitay hökümitining dawamliq halda insan heqlirini depsende qiliwatqanliqini bilettuq. Biz misirdiki herbiy özgirishni eyiblep bir bayanat élan qilghan iduq. U yighinimizda sherqiy türkistan mesilisinimu kün tertipimizge qoyayli dep oyliduq. Biz bundin kéyin xitayning sherqiy türkistanda élip bériwatqan insan heqliri depsendichiliki, qanunsizliqlar, iz-déreksiz yoq bolup ketkenler, qanunsiz tutqun qilin'ghanlar, yer zéminliri tartiwélin'ghanlar toghrisida doklat teyyarlap türk hökümitige shundaqla xelq'ara insan heqliri teshkilatlirigha bérimiz. Biz buning üchün bügün sherqiy türkistan medeniyet we hemkarliq teshkilatining enqerediki ishxanisigha kelduq. Xeyrulla ependi bizge hem aghzaki melumat berdi, hemde dunya Uyghur qurultiyi teyyarlighan doklatlarni berdi. Paydiliq bir ziyaret boldi. Biz adwokatlar qurghan ammiwi teshkilat bolush süpitimiz bilen bundin kéyin sherqiy türkistan mesilisini hoquqi jehettin tetqiq qilip doklatlar teyyarlaymiz.