Түркийәдә тайландтики уйғурлар һәққидики паалийәтләр давамлашмақта

Мухбиримиз әркин тарим
2014-12-31
Share
turkiye-tayland-uyghur-namayish-7.jpg Түркийәдә боливатқан тайландтики уйғурлар һәққидики паалийәтләрдин бир көрүнүш
RFA/Erkin Tarim


Түркийәдики аммивий тәшкилатлар тайландтики 300 уйғурни түркийәгә елип келишни тәләп қилип, һәр хил паалийәтләрни оюштурмақта. 12 - Айниң 27 - күни түркийә доған хәвәр агентлиқи тайланд һөкүмитиниң 300 уйғурни хитайға қайтуруп беришни қарар қилғанлиқи тоғрисидики хәвәрни илан қилғандин кейин, түркийәдики аммивий тәшкилатлар түркийәниң һәрқайси вилайәтлиридә арқа - арқидин намайиш, мухбирларға баянат бериш вә қол қоюш паалийәтлири өткүзүп, түрк һөкүмитини тайландтики 300 уйғурни түркийәгә елип келишкә чақирмақта.

26 - Декабир күни түркийәниң оттура райониға җайлашқан чорум шәһири түрк оҗақлири тәшкилати “тайландтики 300 уйғур түркийә елип келинсун” темисида хәлқтин имза йиғиш паалийити өткүзди. 12 - Айниң 28 - күни болса түркийәниң оттура райониға җайлашқан чанқири вилайитидики қара тәкин университети түрк дуняси тәтқиқати оқуғучилар оюшмиси шәһәр мәркизидики чоң мәйданда мухбирларға баянат бериш паалийити өткүзди. Мәзкур паалийәткә чанқири қаратәкин университетиниң оқутқучи - оқуғучилири, аммивий тәшкилат мәсуллири, бәзи сиясий партийәләрниң мәсуллири вә мухбирлардин болуп 300 әтрапида киши қатнашти. Паалийәтни оюштурған оқуғучилар оюшмисиниң мәсуллири вә әзалири қоллирида айюлтузлуқ көк байрақ вә һәр хил лузункиларни көтүргән һалда мәйданда турушти. Бешиға көк рәңлик ромал салған оқуғучилар оюшмисиниң рәиси дилара чағлар ханим мухбирларға баянат бәрди.

У, алди билән бүгүнки йиғилиштики мәқсити тоғрисида тохтилип мундақ деди:

- Тайландтики уйғур түрклирини қоллайдиғанлиқимизни ипадиләш үчүн бүгүн бу йәргә җәм болдуқ. Хитайниң бесимидин қечип тайландға кәлгән 300 уйғурниң әһвали күнсайин начарлашмақта. Уйғурлар бир тәрәптин кесәллик вә маддий қейинчилиқларға дучар болуватқан болса, йәнә бир тәрәптин хитайға қайтурулуш хәвпи астида турмақта. Биз чанқири қаратәкин университети түрк дуняси оқуғучилар оюшмиси болуш сүпитимиз билән бу 300 уйғурниң түркийәгә елип келишни тәләп қилип қол қоюш долқуни қозғиған идуқ. Бу долқунға хәлқимиз актипчанлиқ билән қатнашмақта, қол қойғанларниң сани вилайитимиздә он миңларға, түркийә бойичә йүз миңларға йәтти.

Дилара чағлар ханим тайланддики 300 уйғур хитайға қайтуриветилип қалса, буниңға сүкүт қилип турғанлар бу җинайәтниң җавапкари болидиғанлиқини баян қилип мундақ деди:

Кейинки күнләрдә түркийәдики бәзи гезитларда, бу уйғурларниң кимликлири ениқлинип, хитайға қайтурулидиғанлиқи қарар қилинғанлиқи тоғрисида хәвәрләр илан қилинмақта. Хитайниң бу қилғанлириға қарита үнини чиқармай, бу уйғурларниң хитайға қайтурулишиға қарап турған кишиләр болса, бу җинайәттин җавабкар болиду. Биз чанқири қаратекин университети түрк дуняси оқуғучилар оюшмиси болуш сүпитимиз билән түрк һөкүмитиниң тайландтики 300 уйғурни балдуррақ түркийәгә елип келишини тәләп қилимиз.

Қиммәтлик радио аңлиғучилар 27 - декабир күни түркийәниң оттура райониға җайлашқан чорум вилайитиниң чорум шәһиридә түрк оҗақлири тәшкилатиниң оюштуруши билән “300 уйғур түркийәгә елип келинсун” мавзулуқ имза йиғиш паалийити өткүзүлди. Бу паалийәткә түрк оҗақлири тәшкилати чорум шөбисиниң башлиқи явуз үнлү вә башқа аммивий тәшкилат, сиясий партийәниң район мәсуллири вә хәлқтин болуп көп санда киши аваз қошқан.

Бу паалийәтниң оюштурған явуз үнлү әпәнди уйғур қериндашлирини қоллап қувәтләйдиғанлиқимизни ипадиләш үчүн бу паалийәтни оюштурғанлиқини баян қилип мундақ деди:

- Биз өткән һәптә шәнбә күни бу паалийәтни өткүздуқ. Биз түрк оҗақлири тәшкилати болуш сүпитимиз билән уйғур қериндашлиримизни қоллап қувәтләйдиғанлиқимизни ипадиләш үчүн бу паалийәтни өткүздуқ. Уйғурларға ярдәм қилиш бизниң һәм миллий вә диний бурчимиз. Вилайитимиздә шәрқий түркистан мәсилиси таза яхши билинип кәтмисиму, шәнбә күнидики паалийитимизгә нурғун киши аваз қошуп қол қойди.

Һазир тайландта туруватқан 300 уйғурни түркийәгә елип келиш мәсилиси түркийәниң әң чоң мәсилилиридин биригә айланди. Түркийәниң 81 вилайитидә шөбиси бар, түркийәниң әң чоң аммивий тәшкилатлиридин бири болған үлкү оҗақлири маарип вә һәмкарлиқ фонди бир ай бурун тайландтики уйғурларни түркийәгә елип келиш үчүн җамаәт пикри топлаш үчүн қол қоюш паалийити башлатқан иди. Мутәхәссисләрниң ейтишичә, бу арқилиқ түрк хәлқи арисида 300 уйғурни түркийәгә елип келиш үчүн җамаәт пикри пәйда қилинип, түркийәниң күнтәртипидә болса һөкүмәткә бесим пәйда болуп, уларниң рәсмийити тезлишидикән. Үлкү оҗақлири маарип вә һәмкарлиқ фонди рәиси олҗай килавуз әпәндиниң ейтишичә, бу паалийәт һазирғичә 45 вилайәткә йейилған болуп, йүз миңлиған киши қәғәзгә қол қойған, бу паалийәткә 5 - 6 милйон кишиниң аваз қошидиғанлиқи пәрәз қилинмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт