Türkiyediki ammiwiy teshkilatlar ortaq bayanat ilan qilip xitayning Uyghur siyasitini eyiblidi

Türkiyediki 10 chong ammiwiy teshkilatning mes'ulliri 8 - ayning 20 - küni muxbirlarni kütiwélish yighini chaqirip xitayning Uyghurlargha élip bériwatqan siyasitining zulumgha aylan'ghanliqini éytti.

Bu muxbirlarni kütiwélish yighini türkiye tarixida tunji qétim mexsus Uyghurlar toghrisida ötküzülgen pütün ammiwiy teshkilatlarning aliy derijilik rehberliri qatnashqan muxbirlarni kütiwélish yighini hésablinidu. Bu yighin'gha qatnashqan ammiwiy teshkilatlar türkiyening ichki we tashqi siyasitige zor tesir körsiteleydighan teshkilatlar.

8 - Ayning 20 - küni chüshtin burun türkiye hünerwen - kassiplar konfédiratsiyesi (TESK), türkiye soda - sana'et we pay - chéki bazarliri birliki (TOBB), türkiye emgekchiler oyushmisi konfédiratsiyesi (TİSK), ishchi huquqliri oyushmisi, kadirlar oyushmisi, türkiye yéza - igilik bashqarmiliri birliki, musteqil soda - sana'etchiler jem'iyiti, türkiye ékisportchilar mejlisi we türk ishchilar oyushmisi mes'ulliri bir yerge jem bolup, Uyghur mesilisi toghrisida ortaq bayanat ilan qildi. Bu bayanat bérish yighinigha köp sanda muxbirlar qatnashti.

Türkiye soda - sana'et we pay - chéki bazarliri birlikining 14 qewetlik binasidiki yighin zalida ötküzülgen muxbirlarni kütiwélish yighinida ortaq bayanat bergen 10 chong ammiwiy teshkilatning bashliqliri sehnidin orun aldi. Bu 10 ammiwiy teshkilatqa wakaliten türkiye hünerwen - kassiplar konfédiratsiyesi re'isi palandöken ependi metbu'at bayanatini oqup ötti. U, bayanatida, 20 milyondin köp musulman Uyghur yashaydighan sherqiy türkistanda musulmanlarning diniy étiqadining cheklen'genlikini, qérindash Uyghur xelqining chidighusiz zulumgha duchar boluwatqanliqini bayan qilip ötti.

U bayanatida yene, ramizan éyining tunji küni bashlan'ghan weqelerning uzun'ghiche dawam qilghanliqini, xitay axbarat wasitiliridiki melumatlargha asaslan'ghanda, onlighan kishining ölgenlikini, Uyghurlarning éytishiche, minglighan kishining öltürülgenlikini, xitayning Uyghur siyasitining zulumgha aylan'ghanliqini bayan qildi.

U muxbirlargha bergen bayanatida, türkiyediki milyonlighan kishige wekillik qilidighan ammiwiy teshkilatlar birliki bolush süpiti bilen, türkiye, xitay munasiwitige alahide ehmiyet béridighanliqini, lékin Uyghurlar duchar boluwatqan naheqchilikke we kishilik hoquqqa xilap siyasetlerge süküt qilip turmaydighanliqini, xitayni Uyghurlargha élip bériwatqan bésim siyasitini toxtitishqa chaqiridighanliqini, Uyghurlarning bu chékiwatqan dert - elemlirini yawrupadiki ammiwiy teshkilatlarghimu anglitidighanliqini bayan qilip ötti.

Mezkur metbu'at yighini türkiye tarixida Uyghurlar üchün mexsus élip bérilghan xitay bilen tijaret qiliwatqan karxanichilar eza bolghan pütün ammiwiy teshkilatlarning mes'ullirimu qatnashqan yighin bolup, yighin'gha türkiye hünerwen - kassiplar konfédiratsiyesi bashliqi bendewi palandöken,, türkiye soda - sana'et we pay - chéki bazarliri birliki bashliqi rifat hisarjik'oghlu, türkiye emgekchiler oyushmisi konfédiratsiyesi bashliqi erol kiresepi, ishchi huquqliri oyushmisi mes'uli mahmut aslan, türkiye kadirlar oyushmisi bashliqi ismayil qonjuq, kadirlar oyushmisi bashliqi exmet gündoghdu, türkiye yéza - igilik bashqarmiliri birliki wekili hesen hüseyin joshqun, musteqil soda - sana'etchiler jem'iyiti bashliqi anil ulpak ependi, türkiye ékisportchilar mejlisi muduri memet büyükshekshi we türk ishchilar oyushmisi mes'uli ergün atalay we d u q mu'awin re'isi séyit tümtürk ependiler qatnashti.