Норвегийә парламентида "уйғур достлуқ гурупписи" қурушниң тунҗи қәдими бесилди

Ихтиярий мухбиримиз оғузхан
2017-09-28
Share
Nikolas-Wilkinson-norwegiye-uyghur.jpg Норвегийә уйғур комитетиниң рәһбәрлири норвегийә парламентида сотсиялист солчилар партийәсиниң парламенттики вәкили николас вилкинсон әпәнди(солдин иккинчи) билән көрүшти. 2017-Йил 21-сентәбир, норвегийә, осло.
RFA/Oghuzxan

Норвегийә уйғур комитетиниң йеңи нөвәтлик рәһбәрлири икки айдин буян тохтимай тиришчанлиқ көрситиш нәтиҗисидә 21-сентәбир күни норвегийә парламентида "уйғур достлуқ гурупписи" қурушниң тунҗи қәдимини мувәппәқийәтлик басти.

Норвегийә уйғур комитетиниң билдүрүшичә, бу йил елип берилған сайламдин кейин җәмийәтниң йеңи нөвәтлик рәис вә һәйәт әзалири норвегийәдики һәрқайси асаслиқ партийәләр билән алақә орнитишқа тиришқан. Үзлүксиз түрдә елип берилған учришиш вә диалоглар нәтиҗисидә уйғурларни қоллайдиған норвегийәдики бир қисим партийәләр билән достанә мунасивәт орнатқан.

Норвегийә уйғур комитетиниң илгири сүрүшичә, улар тунҗи болуп көрүшкән вә достлуқ орнатқан партийә - норвегийә сотсиялист солчиллар партийәси икән. Игилинишичә, бу партийә норвегийәдә очуқ - ашкара һалда хитайдики кишилик һоқуқ мәсилисини тәнқид қиливатқан вә уни хәлқарада күнтәртипкә қоюшни тәшәббус қилип келиватқан партийәләрниң бири икән.

Норвегийә парламентида "уйғур достлуқ гурупписи" қурушни әмәлгә ашуруш иши норвегийә уйғур комитетиниң узундин буян тиришчанлиқ көрситип келиватқан пиланлириниң бир икән шундақла норвегийә уйғур комитетиниң йеңи нөвәтлик рәһбәрлики бу қетимлиқ сайламда әмәлгә ашурушқа вәдә бәргән хизмәт нишанлириниң бири икән.

Игилинишичә, 9-айниң 21-күни норвегийә уйғур комитетиниң рәиси бәхтияр өмәр, комитетниң һәйәт әзалиридин сәмәт абла вә пәрһат яқуплар норвегийә парламентида сотсиялист солчилар партийәсиниң вәкили николас вилкинсон әпәнди билән көрүшкән.

Николас вилкинсон әпәнди бу қетимлиқ көрүшүштә өзиниң бир парламент әзаси болуш сүпити билән бундин кейин норвегийә уйғур комитети билән болған достлуқни күчәйтидиғанлиқи вә "уйғур достлуқ гурупписи" ниң қурулуши үчүн күч чиқиридиғанлиқини билдүргән.

Норвегийә уйғур комитетиниң рәиси бәхтияр өмәр әпәнди бу мунасивәт билән зияритимизни қобул қилди. У, норвегийә парламентидики бу қетимлиқ учришишта уйғурларниң өз вәтинидә дуч келиватқан дәриҗидин ташқири зулум вә бесимлар тоғрилиқ тәпсилий чүшәнчә бәргәнликини билдүрди. Шуниң билән биргә йәнә норвегийәдики уйғур җамаитиниң әһвали һәққидиму чүшәнчә бәргәнликини илгири сүрди.

Норвегийә уйғур комитетиниң сабиқ рәиси вә йеңи нөвәтлик комитетниң һәйәт әзаси сәмәт абла әпәндиму зияритимизни қобул қилип, норвегийә парламентида "уйғур достлуқ гурупписи" ни қуруш ишиниң норвегийә уйғур комитетиниң бундин кейинки әң муһим хизмәт нишанлириниң бири икәнликини тәкитлиди.

Норвегийә уйғур комитетиниң һәйәт әзалиридин бири болған пәрһат яқуп әпәндиму зияритимизни қобул қилип, уйғур тәшкилати билән уйғур җамаитиниң үзлүксиз елип барған тиришчанлиқлириниң норвегийәдә үнүм көрситишкә башлиғанлиқини тилға алди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт