Қәйсәридики уйғурлар 2 - нөвәтлик “уйғур әркинлик лоңқиси” путбол мусабиқисигә һазирланмақта

Ихтиярий мухбиримиз әркин тарим
2014.06.06
turkiye-uyghur-erkinlink-longqisi.jpg “уйғур әркинлик лоңқиси” путбол мусабиқиси вариқи
RFA/Erkin Tarim


Уйғур миллий дәвасиниң рәһбири, д у қ рәиси рабийә қадир ханимниң қоллап қуввәтлиши вә д у қ рәһбәрлириниң ярдими, қәйсиридики шәрқий түркистан мәдәнийәт вә һәмкарлиқ тәшкилати вә мәзкур тәшкилатниң әнқәрә шөбисиниң ярдими билән, 2 - нөвәтлик дуня уйғур яшлири “уйғур әркинлик лоңқиси”ни талишиш мусабиқисиниң тәйярлиқ хизмәтлири пүтүп қалди.

6 - Айниң 13 - күнидин 18 - күнигичә түркийәниң қәйсири шәһиридә өткүзүлидиған бу мусабиқигә америка, яврупа дөләтлири вә түркийәниң һәрқайси җайлиридин кәлгән яш - өсмүрләр қатнашмақчи.

2013 - Йили 11 - айниң 11 - күни вашингтонда чақирилған д у қ рәһбәрлириниң йиғинида, әтраплиқ музакирә қилиш арқилиқ, 2 - нөвәтлик уйғур яшлири путбол мусабиқисини түркийәниң қәйсири шәһиридә өткүзүш қарари елинип, д у қ муавин рәислиридин әсқәрҗан, сейит түмтүрк, үмид агаһи вә ғәйюр әпәндиләрниң бу қетимлиқ мусабиқә тәйярлиқ хизмәтлиригә йетәкчилик қилидиғанлиқи бекитилгән иди. Сейит түмтүрк вә хәйруллаһ әфәндигил әпәндиләрниң радиомизға бәргән мәлуматлириға асасланғанда тәнтәрбийә зали, путбол мәйдани вә уйғур яшлар туридиған меһманханилар бекитилип болған болуп тәйярлиқ хизмити асасән аяқлашқан.

Сейит түмтүрк әпәнди бәргән мәлуматларға асасланғанда, түркийәниң қәйсәри шәһиридә өткүзүлидиған 2 - нөвәтлик дуня уйғур яшлири уйғур әркинлик лоңқисини талишиш мусабиқисигә америка, белгийә, франсийә, германийә, голландийә, шиветсийә, норвегийә вә түркийә қатарлиқ 9 дөләттин 150 әтрапида уйғур яш, 50 әтрапида меһман болуп җәмий 200 әтрапида киши сириттин қатнишидикән.

Шәрқий түркистан мәдәнийәт вә һәмкарлиқ җәмийити әнқәрә шөбиси мәсули хәйруллаһ әпәндигил әпәнди лоңқа, соғатлиқ боюмларниму яситип болғанлиқини вә уйғур яшларниң балдуррақ келишини төт көз билән күтиватқанлиқини ейтти.

Мәзкур путбол мусабиқисиниң 2011 - йилида өткүзүлгән 1 - нөвәтлики америка, белгийә, франсийә, германийә, голландийә, шиветсийә, норвегийә қатарлиқ 7 дөләттин көп сандики уйғур яшлириниң қатнишиши билән утуқлуқ елип берилғандин кейин, уйғур яшлири арисида күчлүк тәсир вә қизиқиш пәйда қилған иди.

Түркийәниң қәйсәри шәһири тарихта әратина уйғур дөлити қурулған йәр болуп, бүгүнки күндә дуняда бирдин - бир уйғур мәһәллиси бар шәһәр. Бу җәһәттин елип ейтқанда уйғур яшлириниң бу йәрдә җәм болуши алаһидә әһмийәткә игә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.