Xitaylarning öy zémin sétiwélishi kanadada öy mülük krizisi peyda qildi

Kanadaning wankowér shehiri, kanadaning british kolombiye ölkisige jaylashqan port sheherlerning biri shundaqla kanadaning amérika bilen chégrilinidighan 2 - chong shehiri. Wankowér shehiri öz nöwitide yene, xitay nopusi kanada boyiche eng köp bolghan sheherlerning biri.

Yéqindin buyan kanadadiki wankowér shehiri bilen toronto shehiridiki öy bahasining derijidin tashqiri örlep kétish mesilisi kanada öy mülük krizisini keltürüp chiqarghan. Kanada hökümiti bu mesilige qarita jiddiy tedbir élishni otturigha qoyghan. Bu heqte kanada metbu'atliridiki mulahizilerdin melum bolushiche, kanadaning wankowér shehiridiki öy bahasining örlep kétishige, xitaydiki parixor emeldarlarning köplep kanadagha kélishi shundaqla öylerni eslide chiqarghan sétish bahasidin ashurup sétiwélishi seweb bolmaqta iken.

Hazir kanadada yashawatqan Uyghur ziyaliysi kamil tursun ependi, xitaylarning wankowérdiki ehwali we ularning wankowérdin zémin sétiwélishqa alahide qiziqiwatqanliqi heqqide mulahize yürgüzdi.

Hazir kanadada tijaret qiliwatqan bir xelq'araliq öy mülük tijaret shirkitining bildürüshiche, nöwette kanadaning öy mülük tijaritige eng köp meblegh séliwatqanlar xitaylar bolup, ularning bu yilning aldinqi yérimidila kanada öy mülük tijaritige salghan meblighi bir milyard 300 milyon dollargha yetken.

Bu yildin hazirgha qeder xitay sétiwalghan kanadadiki omumi öy mülük qimmiti 2 milyard dollargha yetken. Merkizi amérikidiki CBRE dep atilidighan xelq'araliq bir öy mülük tijariti shirkitining mes'uli torontodiki muxbirlargha, “Xitayning dölet igilikidiki shirketliri kanadadin yer zémin sétiwélishqa bek qiziqiwatidu, chünki ular öz bayliqliri üchün bixeter bolghan jennet izdewatidu” dégen.

CBC Ning bu heqtiki mulahizisige asaslan'ghanda, bu yil kanada dolliri nisbeten töwen shundaqla en'gliyening yawropa birlikidin chiqip ketkenliki sewebidin, yawropa birliki weziyiti muqim bolmighanliqi qatarliq sewebler tüpeylidin, xitayning kanadada yer zémin sétiwélishqa téximu qiziqidighanliqi texmin qilinmaqta iken.

Hazir kanadaning toronto shehiride yashawatqan étibar artush ependi kanadada qanunluq halda öy mülük wakaletchiliki kespi bilen shughulliniwatqan kesip ehlilirining biri. U wankowérda yüz bergen öy krizisi mesilisi heqqide tepsiliy melumat berdi.

Eljezire téléwiziyesining bu yil 8 - iyulda wankowérdin bergen xewirige asaslan'ghanda, wankowér shehiri xitaydiki bay milyonérlar perzentlirining shexsi köngül échip oynaydighan makanigha aylinip qalghan.

Xewerde yene bildürüshiche, milyonér xitay qizliri, intayin qimmet bahaliq haraq - sharablar, shenel qatarliq qimmet markiliq etir we kiyim - kichikler we aptomobillarni sétiwalghandin bashqa, hazir wankowérdiki öy mülük sahesige kirip, bu yerlerde xitaylarning öy sétiwélish qizghinliqi yuqiri pellige kötürülmekte iken. Eljezire téléwiziyesining bu heqte bergen xewiridin melum bolushiche, wankowér shehiridiki yerlik xelq, xitaylarning, öylerni esli bahasidin ashurup sétiwélishi shundaqla heddidin ashqan öy sétiwélish qizghinliqi sewebidin, özlirining öy sétiwalalmaywatqanliqigha naraziliq bildürüp namayish qilghan.

Bu heqte kanadaning british kolombiye ölkilik qanun turghuzush komitétining xadimi dawid éybi öz köz qarashlirini bildürüp: “Biz bundaq jiq pulning nedin kéliwatqanliqini tekshürüshke tirishiwatimiz, emma otturidiki öy satquchi wakaletchiler bu jehette köz yumuwéliwatqanliqi üchün kanada hökümiti bu pullarning heqiqiy menbesini bilishke amalsiz qéliwatimiz. Shu sewebtin, kanadadiki öy mülük tijaritining normal tertipi buzghunchiliqqa uchrawatidu. Biz xitaylar meblegh séliwatqan bu pullarni qanunsiz pullar dep qaraymiz.”

Nurghunlighan kanadaliq siyasetchiler wankowérdin milyon dollarliq öy sétiwéliwatqan xitaylarning pulining kélish menbesidin gumanliniwatqan bolup, ularning qarishiche, bu pullar shan - shöhret qoghlishish, chiriklik we pul yuyush üchün kanadagha aqmaqta iken.

Yéqindin buyan kanada metbu'atlirida, xitaylarning wankowér shehiridiki milyon dollarliq öylerni sétiwélish üchün héch qiynalmayla pulni otturigha tashlawatqanliqigha a'it köpligen maqaliler yéziliwatqan bolup, nansi mak - donald qatarliq 3 aptor birliship yazghan “Xitay kanadani sétiwéliwatidu” namliq chong hejimlik maqalimu xitaydiki milyonér baylarning shundaqla chirik emeldarlarning wankowér shehirige éqiwatqanliqini körsitip béridighan maqalilerning biri.

Kanada hökümiti yéqinda höjjet chüshürüp, wankowér shehiridin öy sétiwalidighan chet'ellikler üchün 15% baj élinidighanliqini otturigha qoydi.