Бейҗиң даирилири чәтәл мәтбуатлириниң хитайниң сәлбий тәрәплирини ачидиған хәвәрләрни тарқитишини чәклимәктә

Гәрчә хитай даирилири олимпик җәрянида ахбарат саһәсигә әркинлик беришни вәдә қилған болсиму, әмма олимпик йеқинлашқансири чәтәл мухбирлириниң зиярити һәм хәвәр елан қилиниши болупму,сиясий характерлик хәвәрләрни елан қилиниши техиму қаттиқ чәклимиләргә учримақта.
Мухбиримиз гүлчеһрә хәвири
2008.07.22
Share on WhatsApp
Share on WhatsApp

 Әркин асия радиоси хитай тили бөлүми мухбириниң бейҗиңдин учур беришигә қариғанда, йеқинқи күнләрдин буян бейҗиңда чәтәл мухбирлириниң зиярәттә болуши қатму ‏ - қат тосалғуларға учраватқан болуп, чәтәл мухбирлириниң бирәр вәқә йүз бәргән җайларға бериши вә мунасивәтлик кишиләр билән учришиши чәкләнгән.

Шундақла бейҗиң аһалилириниң чәтәл мухбирлириға бейҗиңниң йеқинқи әһваллири һәққидә учур беришигә рухсәт қилинмиғандин башқа, болупму һөкүмәткә қарши пикирләрниң яки хитайниң сәлбий тәрәплирини ечип беридиған учурларниң тарқилишиниң алди түрлүк вастилар билән қамал қилинған.

Сәйшәнбә күни хитай ташқи ишлар министирлиқи,олимпик җәрянида имканийәтниң баричә, чәтәл мухбирлириниң зияритигә асанлиқ яритип берилидиғанлиқини, әмма мухбирларниң зияритиниң хитай бихәтәрлик хадимлири бәлгилигән бихәтәр даиридә мувапиқ елип берилиши керәкликини әскәрткән болсиму, лекин мухбирлар хитай һөкүмитиниң сөз ‏ - һәрикитиниң бирдәк әмәсликидин нарази болмақта икән.

Бейҗиңда туруватқан бир чәтәл мухбириниң ейтишичә,олимпик мухбири кинишкиси бар болған мухбирларниңму аммиви сорунларда сөрәт тартиши чәкләнгән. Адәттики зияритиму тосқунлуққа учриған. Әгәр чәтәл мухбирлири чәкләнгән даиридин сирт зиярәт елип барса, сақчи даирилири тәрипидин қаттиқ тәқипкә елинидиғанлиқи әскәртилгән.

Сәйшәнбә күни хитай ахбарат агентлиқиниң хәвәр тарқитишичә, дүшәнбидин башлап, хитай даирилири бейҗиң олимпики вә мейиплар тәнһәрикәт йиғини җәрянида,әслидинла хитайда кәң түрдә тарқитилишиға чәклимә қоюлған нюйорк вақти гезити, вашингитон почтиси, күндилик телеграмма гезити, тайланд хәвәрлири, корийә күндилик хәвәрлири қатарлиқ ғәрб мәтбуатлири һәм чәтәл гезит ‏ - журналлириниң бейҗиңда сетилиши та 9 ‏ - айниң 24 - гичә чәкләнгән, бәзи чәтәл мәтбуатлириниң хитайда тарқитилиши пүтүнләй тохтитилған.


Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.