“Kechmish we eslime” sehipisi heqqide anglarmenlerge ikki éghiz söz

Qedirlik anglarmen dostlar! “Kechmish we eslime” sehipimiz yérim yildin artuq musapini bésip ötti. Bu jeryanda türlük sewebler tüpeylidin wetendin ayrilishqa mejbur bolghan kishilerning erkinlikke érishish yoli, muhajirette béshidin ötküzgenliri shundaqla Uyghur bolush süpiti bilen hayatidiki eng untulmas kechmishlirini eslime yoli bilen diqqitinglargha sunup kelduq

Hayat hékayisini teqdim qilghuchilar qandaqtur alahide shexsler emes, ular Uyghurlar ichidiki milyonlighan addiy kishilerge oxshashla hem shexsiy kechürmishke hem Uyghur bolushtin ibaret milliy teqdirdashliqqa ige insanlardur. Shunisi éniqki, eslime tarixqa teng emes, belki bir milletning jem'iyet tarixini yorutidighan muhim matériyaldur. Bolupmu Uyghurlargha oxshash öz wetinide öz tarixini yézish hoquqigha ige bolmighan bir millet üchün ularning nöwettiki ijtima'iy ré'alliqi we siyasiy hayatini chüshinishte shexslerning eslimiliri we hayat hékayiliri muhim qimmetke igidur.

“Kechmish we eslime” sehipimizning özining hayat hékayisi we kechürmishlirini séxiyliq bilen anglarmenlerge teqdim qilishni xalaydighan her bir Uyghur üchün derwazisi ochuqtur. Chinliq, tebi'iylik, eynenlik hemde öz béshidin heqiqiy ötküzgen kechürmish bolush - hékaye teqdim qilghuchilargha qoyulidighan birdin - bir ölchemdur. Bu sehipige qatnishiwatqanlar qandaqtur ajayip - gharayip kechürmishlerge ige alahide insanlar bolmastin, belki wetensizlikning temini tétip yashawatqan Uyghur jama'etchiliking türlük sahelirige mensup ezaliridur.

Kéling, sizmu bir Uyghur bolush süpitingiz bilen sehipimizge qatnishing! hayatingizda nöwettiki Uyghurlarning ijtima'iy ré'alliqini échip bérishke melum qimmiti bar dep qarighan kechürmishliringizni ana til bilen radi'o anglighuchilargha teqdim qiling! bu sizning shundaqla bizning ortaq burchimizdur!