សវនាការជំនុំជម្រះក្ដី លោក កឹម សុខា នៅក្នុងតុលាការ កាលពីថ្ងៃព្រហស្បតិ៍ ទី២២ កុម្ភៈ មានភាពចម្រូងចម្រាសច្រើន។
អ្នកធ្វើអធិប្បាយពីបញ្ហានយោបាយ និងសង្គម លោក គឹម សុខ ដែលធ្លាប់គាំទ្រលោក កឹម សុខា នោះ បានរិះគន់ថា លោក កឹម សុខា បង្ហាញពីភាពទន់ខ្សោយ នៅក្នុងសវនាការ។ លោកបញ្ជាក់ថា លោក កឹម សុខា មិនហ៊ានឆ្លើយការពារដៃគូរបស់លោក គឺលោក សម រង្ស៊ី អំពីភាពស្អាតស្អំប្រាប់ទៅតុលាការនោះទេ បែរជាឆ្លើយក្នុងគោលដៅយកតែរួចខ្លួន ដោយផ្ដល់ចម្លើយលើកឧទាហរណ៍ប្រៀបធៀបដល់ ប៉ុល ពត និង ស្នាដៃអហិង្សារបស់ ប៉ុល ពត ទៅវិញ។
លោក គឹម សុខ លើកឡើងថា បញ្ហានេះនឹងធ្វើឲ្យមេបក្សប្រឆាំងរូបនេះ ធ្លាក់ឧត្ដមភាព ឬបាត់ឥស្សរភាព ជាមេដឹកនាំនយោបាយប្រជាធិបតេយ្យកំពូលម្នាក់ របស់ប្រទេសជាតិ។
ការបញ្ចេញប្រតិកម្មរបស់លោក គឹម សុខ នេះ នៅបន្ទាប់ពីសហមេធាវីការពារក្ដី លោក កឹម សុខា គឺអ្នកស្រី ម៉េង សុធារី បានឆ្លើយប្រាប់អ្នកកាសែតថា លោក កឹម សុខា បានឆ្លើយសំណួររបស់តុលាការ ដែលចោទសួរថា លោក សម រង្ស៊ី ជាបុគ្គលហិង្សា។ ហេតុអ្វីបានលោកចងសម្ព័ន្ធភាពជាមួយលោក សម រង្ស៊ី? លោក កឹម សុខា ឆ្លើយថា ទោះបីជា ប៉ុល ពត ក៏នៅតែមានអ្នកទៅធ្វើការជាមួយ ប៉ុល ពត ដែរ។
សូមលោកអ្នកនាងចុចស្ដាប់សំឡេង នៃកិច្ចពិភាក្សារវាងលោក ទីន ហ្សាការីយ៉ា ជាមួយបណ្ឌិត សេង សារី និងលោក គឹម សុខ ក្នុងនាទីវេទិកាអ្នកស្ដាប់វិទ្យុអាស៊ីសេរី ដែលបានជជែកពិភាក្សាអំពីបញ្ហានេះ កាលពីយប់ថ្ងៃសុក្រ ទី២៣ ខែកុម្ភៈ ឆ្នាំ២០២៤៕