លោក ហោ ណាំ​ហុង ស្នើ​អាមេរិកាំង​លុប​បំណុល

កម្ពុជា និង​សហ​រដ្ឋ​អាមេរិក​ទើប​តែ​បាន​ប្រារព្ធ​ខួប​លើក​ទី​៦០ នៃ​ចំណង​ការ​ទូត​ជា​មួយ​គ្នា កាល​ពី​ខែ​កក្កដា​កន្លង​ទៅ​នេះ។ ហើយ​នៅ​ពេល​នេះ រដ្ឋ​មន្ត្រី​ក្រសួង​ការ​បរទេស​សហ​រដ្ឋ​អាមេរិក លោក​ស្រី ហ៊ីល​ទ្បារី គ្លិនតុន (Hillary Clinton) កំពុង​តែ​ទស្សនកិច្ច​នៅ​ក្នុង​ប្រទេស​កម្ពុជា។
ដោយ សុខ សេរី
2010-10-31
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួង​ការបរទេស​កម្ពុជា លោក ហោ ណាំហុង ធ្វើ​សន្និសីទ​កាសែត​នៅ​អាកាស​យានដ្ឋាន​អន្តរជាតិ​ភ្នំពេញ កាល​ពី​ថ្ងៃ​ទី​៣១ ខែ​តុលា ឆ្នាំ​២០១០។
រដ្ឋមន្ត្រី​ក្រសួង​ការបរទេស​កម្ពុជា លោក ហោ ណាំហុង ធ្វើ​សន្និសីទ​កាសែត​នៅ​អាកាស​យានដ្ឋាន​អន្តរជាតិ​ភ្នំពេញ កាល​ពី​ថ្ងៃ​ទី​៣១ ខែ​តុលា ឆ្នាំ​២០១០។
RFA/Sok Serey

ប្រមុខ​ការ​ទូត​កម្ពុជា លោក ហោ ណាំហុង បាន​អះអាង​នៅ​ថ្ងៃ​ទី​៣១ ខែ​តុលា​ថា លោក​នឹង​ស្នើ​ជា​ផ្លូវ​សុំ​ឲ្យ​សហ​រដ្ឋ​អាមេរិក​លុប​បំណុល​ដែល​កម្ពុជា​ជំពាក់​ជា​ច្រើន​រយ​លាន​ដុល្លារ​អាមេរិក​នោះ ហើយ​ថា កម្ពុជា និង​សហ​រដ្ឋ​អាមេរិក​កំពុង​តែ​មាន​ទំនាក់​ទំនង​ល្អ​ជា​មួយ​គ្នា​កន្លង​មក​នេះ។

សំណើ​ជា​ផ្លូវ​ការ និង​ការ​ពង្រឹង​ចំណង​ទាក់ទង​រវាង​ប្រទេស​ទាំង​២​នោះ​ នឹង​ធ្វើ​ឡើង​នៅ​ក្នុង​ជំនួប​ទ្វេ​ភាគី​រវាង​លោក ហោ ណាំ​ហុង រដ្ឋ​មន្ត្រី​ក្រសួង​ការ​បរទេស​កម្ពុជា ជា​មួយ​និង​រដ្ឋ​មន្ត្រី​ក្រសួង​ការ​បរទេស​សហ​រដ្ឋ​អាមេរិក លោក​ស្រី ហ៊ីល​ទ្បារី គ្លិនតុន នៅ​ឯ​ក្រសួង​ការ​បរទេស​កម្ពុជា នៅ​ក្នុង​ទីក្រុង​ភ្នំពេញ នៅ​ថ្ងៃ​ទី​១ ខែ​វិច្ឆិកា។

រដ្ឋ​មន្ត្រី​ក្រសួង​ការ​បរទេស​កម្ពុជា លោក ហោ ណាំ​ហុង និង​ជា​ឧប​នាយក​រដ្ឋ​មន្ត្រី បាន​មាន​ប្រសាសន៍​នៅ​ឯ​អាកាសយានដ្ឋាន​អន្តរ​ជាតិ​ភ្នំពេញ នៅ​ថ្ងៃ​ទី​៣១ ខែ​តុលា ក្រោយ​ពី​បាន​វិល​ត្រឡប់​មក​ពី​ការ​ចូល​រួម​ក្នុង​កិច្ច​ប្រជុំ​កំពូល​អាស៊ាន នៅ​ប្រទេស​វៀតណាម​ថា ដំណើរ​ទស្សនកិច្ច​របស់​លោក​ស្រី ហ៊ីល​ឡារី គ្លិន​តុន គឺ​បាន​ធ្វើ​ឡើង​តាម​ការ​អញ្ជើញ​របស់​លោក ដើម្បី​មក​ពង្រឹង​ចំណង​ទាក់​ទង​រវាង​កម្ពុជា និង​សហ​រដ្ឋ​អាមេរិក។

លោក​បន្ត​ថា ៖ «ពិភាក្សា​គ្នា គឺ​បញ្ហា​លុប​បំណុល​របស់​កម្ពុជា និង​លើក​ជំហរ​ជា​ផ្លូវ​ការ​របស់​កម្ពុជា​យើង ជូន​លោក​ស្រី  ហ៊ីល​ឡារី គ្លិន​តុន ពិនិត្យ។ ខ្ញុំ​បាន​ជួប​លោក​ស្រី​នៅ ញូវយ៉ក ឆ្នាំ​ទៅ។ ខ្ញុំ​បាន​លើក​បញ្ហា​នេះ​ហើយ។ យើង​នឹង​ជម្រាប​អំពី​ជំហរ​ឲ្យ​បាន​ច្បាស់​លាស់​របស់​កម្ពុជា​យើង»។

សេចក្ដី​ប្រកាស​ព័ត៌មាន​ជា​ផ្លូវ​ការ​របស់​ក្រសួង​ការ​បរទេស​កម្ពុជា និង​ស្ថានទូត​សហ​រដ្ឋ​អាមេរិក​នៅ​កម្ពុជា បាន​ឲ្យ​ដឹង​ថា រដ្ឋ​មន្ត្រី​ក្រសួង​ការ​បរទេស​សហ​រដ្ឋ​អាមេរិក លោក​ស្រី ហ៊ីល​ឡារី គ្លិន​តុន មក​បំពេញ​ទស្សនកិច្ច​ជា​ផ្លូវ​ការ​ផង និង​មិន​ផ្លូវ​ការ​ផង រយៈ​ពេល ៣​ថ្ងៃ ចាប់​ថ្ងៃ​ទី​៣០ ខែ​តុលា ដល់​ថ្ងៃ​ទី​១ ខែ​វិច្ឆិកា ឆ្នាំ​២០១០។

កាល​ពី​ដើម​ខែ​តុលា​កន្លង​ទៅ​នេះ លោក​នាយក​រដ្ឋ​មន្ត្រី ហ៊ុន សែន ប្រទេស​កម្ពុជា បាន​ប្រកាស​ជា​ជំហរ​ថា លោក​សុំ​ឲ្យ​សហ​រដ្ឋ​អាមេរិក​លុប​បំណុល​នោះ​ចោល ដោយ​បាន​ហៅ​ថា ជា​បំពុល​កង្វក់​ដែល​របប​ដឹក​នាំ​ដោយ​លោក​សេនា​ប្រមុខ លន់ នល់ បាន​ខ្ចី​មក​ធ្វើ​សង្គ្រាម កាល​ពី​ចន្លោះ​ឆ្នាំ​១៩៧០ ដល់​ឆ្នាំ​១៩៧៥។

សកលវិទ្យាធិការ​នៃ​សាកលវិទ្យាល័យ​ខេមរៈ លោក បណ្ឌិត សុខ ទូច និង​ជា​អ្នក​វិភាគ​នយោបាយ​នៅ​កម្ពុជា បាន​មាន​ប្រសាសន៍​ថា ប្រទេស​កម្ពុជា​ ជាប់​កាតព្វកិច្ច​ក្នុង​ការ​សង​បំណុល​នោះ ប៉ុន្តែ​ម្ចាស់បំណុល​គួរ​តែ​ពិចារណា​ផង​ដែរ ៖ «បង្វែរ​សំណង​ហ្នឹង​ទៅ ដូច​ជា​ខាង​ធារាសាស្ត្រ ឬ​ខាង​វប្បធម៌ គឺ​ជា​រឿង​មនុស្សធម៌ វា​ជា​រឿង​មួយ​ប្រពៃ»

កន្លង​មក​មន្ត្រី​រដ្ឋាភិបាល​កម្ពុជា​បាន​ស្នើ​ឲ្យ​សហ​រដ្ឋ​អាមេរិក​បង្វែរ​បំណុល​នោះ ទៅ​ជា​ការ​អភិវឌ្ឍ​វិញ ដោយ​សារ​តែ​កម្ពុជា​ នៅ​មិន​ទាន់​មាន​លទ្ធភាព​ក្នុង​ការ​សង ប៉ុន្តែ​មន្ត្រី​ជាន់​ខ្ពស់​សហ​រដ្ឋ​អាមេរិក​ត្រូវ​បាន​អ្នក​កាសែត​ដក​ស្រង់​សំដី​មក​ផ្សាយ​ថា ការ​លុប​បំណុល​បែប​នោះ​ជា​ទម្លាប់​មិន​ល្អ ហើយ​កម្ពុជា​មាន​លទ្ធភាព​ក្នុង​ការ​សង​បំណុល​នេះ៕

ព័ត៌មាន (0)
Share
គេហទំព័រ​ទាំងមូល