ខ្មែរ​អ៊ិស្លាម​២០៧​នាក់​ត្រូវ​ថៃ​ឃាត់​ខ្លួន​នៅ​ច្រក​ប៉ោយប៉ែត

បង​ប្អូន​ខ្មែរ​អ៊ិស្លាម​ចំនួន ២០៧​នាក់​ត្រូវ​បាន​អាជ្ញាធរ​ថៃ​ចាប់​ឃាត់​ខ្លួន នៅ​ថ្ងៃ​ទី​២៨​ឧសភា​នេះ នៅ​ច្រក​ព្រំដែន​គោក​អន្តរជាតិ​ប៉ោយប៉ែត ក្នុង​ផ្សារ​ឡុងគឿ ទឹក​ដី​ថៃ ដោយ​សង្ស័យ​ថា បង​ប្អូន​ខ្មែរ​ចាម​ទាំង​នោះ​នាំ​យក​សម្ភារៈ​ផលិត​គ្រឿង​ផ្ទុះ ដូច​ជា​កំណាត់​ដែក​គោល​ខ្លី និង​មាន​កេស ៣ ផ្ទុក​ទៅ​ដោយ​ហ្គាស​ចំនួន ២០០​ក្រាម​ដែល​ផ្ទុក​ក្នុង​កំប៉ុង​ចំនួន ៧៣​កំប៉ុង។
ដោយ វោហារ ជាតិ
2010-05-29
អ៊ីម៉ែល
មតិ
Share
បោះពុម្ព
ទិដ្ឋភាព​នៅ​លើ​ស្ពាន​មិត្តភាព​កម្ពុជា​-​ថៃ​នៃ​ច្រក​ទ្វារ​អន្តរជាតិ​ប៉ោយប៉ែត ក្នុង​ខេត្ត​បន្ទាយមានជ័យ នា​ថ្ងៃ​៦ វិច្ឆិកា ២០០៩។
ទិដ្ឋភាព​នៅ​លើ​ស្ពាន​មិត្តភាព​កម្ពុជា​-​ថៃ​នៃ​ច្រក​ទ្វារ​អន្តរជាតិ​ប៉ោយប៉ែត ក្នុង​ខេត្ត​បន្ទាយមានជ័យ នា​ថ្ងៃ​៦ វិច្ឆិកា ២០០៩។
Photo: RFA

អនុ​ប្រធាន​ការិយាល័យ​ព្រំដែន​ខ្មែរ​-​ថៃ ប្រចាំ​ច្រក​ប៉ោយប៉ែត លោក ស៊ិម សារ៉េត មាន​ប្រសាសន៍​ប្រាប់​វិទ្យុ​អាស៊ី​សេរី​នៅ​ថ្ងៃ​ទី​២៩ ឧសភា ថា ការ​ឃាត់​ខ្លួន​នោះ​គឺ​ជា​ការ​ភ័ន្ត​ច្រឡំ​របស់​អាជ្ញាធរ​ថៃ​ទេ។

លោក ស៊ិម សារ៉េត បាន​បញ្ជាក់​ថា ៖ «របស់​ហ្នឹង​មិន​មែន​ជា​របស់​គាត់​ផង​ហ្នឹង ព្រោះ​ពួក​គាត់​ទៅ​ហ្នឹង មាន​ក្រុមហ៊ុន មាន​អី គេ​ចេញ​មក​ធានា នៅ​ពេល​ដែល​មាន​បញ្ហា មាន​ខាង​ក្រុមហ៊ុន​ដែល​យក​ពួក​គាត់​ទៅ បង​ប្អូន​ខ្មែរ​អ៊ិស្លាម​គាត់​ទៅ​ហ្នឹង គាត់​ប្រើ​លិខិត​ឆ្លង​ដែន ដូច្នេះ​ជួយ​អន្តរាគមន៍»

អ្នក​នាំ​ពាក្យ​ក្រសួង​ការ​បរទេស​កម្ពុជា លោក កុយ គង់ មាន​ប្រសាសន៍​ប្រាប់​វិទ្យុ​អាស៊ី​សេរី នៅ​ថ្ងៃ​ទី​២៩ ឧសភា​នេះ​ដែរ ថា បង​ប្អូន​ចាម​ទាំង​អស់​ត្រូវ​បាន​ដោះលែង​ទៅ​វិញ​នៅ​ថ្ងៃ​ដដែល បន្ទាប់​ពី​អាជ្ញាធរ​ថៃ​បាន​ស៊ើប​ទៅ​ឃើញ​ថា សម្ភារៈ​នោះ​មិន​មែន​យក​ចូល​ដោយ​បង​ប្អូន​ចាម​នោះ​ទេ។

លោក កុយ គង់ បាន​អះអាង​ថា ៖ «រឿង​ហ្នឹង គេ​បាន​ដោះលែង​វិញ​អស់​ហើយ! ពីព្រោះ​គាត់​ដាក់​ទំនិញ​ទៅ​ហ្នឹង រទេះ​ហ្នឹង​គេ​មាន​ដាក់​របស់​អស់​ហ្នឹង ប៉ុន្តែ​មិន​មែន​របស់​គាត់​ទេ ហើយ​ទំនិញ​របស់​គាត់​ក៏​ដាក់​នៅ​រទេះ​ហ្នឹង​ដែរ ហើយ​ទទួល​គេ​អូស​ចូល​ទៅ គេ​ភ័ន្ត​ច្រឡំ គេ​ក៏​ឃាត់​ខ្លួន​គាត់​ទៅ​ណា៎! ដល់​ពេល​ក្រោយ​ពី​ឃាត់​ខ្លួន​ទៅ អត់​អី​ទេ ឥឡូវ​គេ​ដោះលែង​វិញ​អស់​ហើយ!»

លោក​ថា មន្ត្រី​ទូត​ខ្មែរ​ប្រចាំ​ស្រុក​អារញ្ញ​បាន​ចូលរួម​ក្នុង​ការ​ការ​ដោះ​លែង​បង​ប្អូន​ចាម​ទាំង​នោះ។

លោក ស៊ិម សារ៉េត អនុ​ប្រធាន​ការិយាល័យ​ព្រំដែន​ខ្មែរ​-​ថៃ ប្រចាំ​ច្រក​ប៉ោយប៉ែត មាន​ប្រសាសន៍​ថា បង​ប្អូន​ចាម​ទាំង​នោះ​ត្រូវ​បាន​ក្រុមហ៊ុន​ថៃ ដែល​ពួក​គេ​ធ្វើ​ការ​ជាមួយ​នោះ បាន​ដឹក​យក​ទៅ​ធ្វើ​ការ​នៅ​ប្រទេស​ថៃ បន្ទាប់​​ពី​ត្រូវ​បាន​ដោះ​លែង​រួច​មក៕

ព័ត៌មាន (0)
Share
គេហទំព័រ​ទាំងមូល