មន្ត្រីអ្នកនាំពាក្យក្រសួងការបរទេស លោក កុយ គួង បានមានប្រសាសន៍ថា កិច្ចជំនួបរវាងមន្ត្រីគណៈកម្មការចម្រុះព្រំដែនគោកខ្មែរ-ថៃ ដែលភាគីខ្មែរដឹកនាំដោយប្រធានគណៈកម្មការ គឺលោក វ៉ា គឹមហុង គ្រោងនឹងធ្វើឡើងនៅឯប្រទេសថៃតាមការស្នើសុំរបស់រដ្ឋាភិបាលថៃ ដើម្បីដោះស្រាយបញ្ហាព្រំដែនដែលមិនទាន់បានកំណត់ច្បាស់លាស់នោះ។
លោក កុយ គួង បានមានប្រសាសន៍ថា ៖ «នៅថ្ងៃទី១០ហ្នឹងហើយ។ បើថ្ងៃទី១០ តាមកាលកំណត់ គឺគណៈកម្មការព្រំដែនចម្រុះ JDC គឺនៅប្រទេសថៃ ថៃសុំធ្វើជាម្ចាស់កិច្ចប្រជុំហ្នឹង»។
លោក កុយ គួង បានឲ្យដឹងផងដែរថា គេនៅមិនទាន់អាចកំណត់របៀបវារៈនៃកិច្ចប្រជុំនោះបាននៅឡើយនោះទេ។
កិច្ចប្រជុំគណៈកម្មការចម្រុះព្រំដែនគោកកម្ពុជា-ថៃ នេះត្រូវបានកំណត់ពេលច្បាស់លាស់បន្ទាប់ពីរដ្ឋសភាថៃ កាលពីថ្ងៃទី២៨ តុលាកន្លងទៅនេះ បានអនុម័តយល់ព្រមឲ្យរដ្ឋាភិបាលរបស់ខ្លួនធ្វើការចរចាបញ្ហាព្រំដែនជាមួយប្រទេសកម្ពុជាតាមការស្នើសុំរបស់ភាគីខ្មែរនោះ។
ឧបនាយករដ្ឋមន្ត្រីនិងជារដ្ឋមន្ត្រីក្រសួងការបរទេសខ្មែរ លោក ហោ ណាំហុង ធ្លាប់បានមានប្រសាសន៍កាលពីពេលថ្មីៗនេះថា រហូតមកទល់ពេលនេះបង្គោលព្រំដែនរវាងកម្ពុជាថៃត្រូវបានរកឃើញចំនួន៥០បង្គោលហើយ ហើយគេនៅបន្តស្វែងរកបង្គោលចំនួន២៣ផ្សេងទៀត។
លោក ហោ ណាំហុង ក៏បានមានប្រសាសន៍ផងដែរថា ក្នុងចំណោម៥០បង្គោលដែលត្រូវបានរកឃើញនោះ ភាគីថៃនិងខ្មែរបានឯកភាពលើ៣៣បង្គោលហើយ នៅសល់១៧បង្គោលមិនទាន់ឯកភាពនៅឡើយ។
គួរជម្រាបថា ជម្លោះព្រំដែនកម្ពុជា-ថៃដែលមានការប្រឈមមុខដាក់គ្នាផ្នែកយោធានោះបានផ្ទុះឡើងតាំងពីពាក់កណ្ដាលខែកក្កដាមកម៉្លេះ គឺនៅបន្ទាប់ពីអង្គការយូណេស្កូបានសម្រេចចុះប្រាសាទព្រះវិហាររបស់ខ្មែរចូលទៅក្នុងបញ្ជីបេតិកភណ្ឌពិភពលោករួចមក ហើយភាពតានតឹងក៏បានឈានដល់ការផ្ទុះអាវុធរវាងទាហាននៃប្រទេសទាំងពីរ កាលពីថ្ងៃទី១៥ តុលា ដែលបានបណ្ដាលឲ្យទាហានខ្មែរបីនាក់និងទាហានថៃមួយនាក់ស្លាប់បាត់បង់ជីវិត។
ចាប់តាំងពីមានការប្រឈមមុខផ្នែកយោធាជុំវិញជម្លោះព្រំដែននោះមក មន្ត្រីរដ្ឋាភិបាលនៃប្រទេសទាំងពីរបានជួបប្រជុំចរចាគ្នាចំនួនប្រាំលើករួចមកហើយ ប៉ុន្តែការជួបប្រជុំចរចានោះត្រូវបានគេមើលឃើញថា មិនមានលទ្ធផលជាដុំកំភួនទេ៕