វេទិកាសាធារណៈនេះធ្វើឡើងនៅឃុំអំពិលក្នុងបរិវេណសាលាមតេ្តយ្យភ្នំប្រុស នាពេលយប់ថ្ងៃទី២៩ មិថុនា ចំពេលយុទ្ធនាការឃោសនារកសំឡេងឆ្នោតរបស់គណបក្សនយោបាយគ្រប់គណបក្សនៅក្នុងអាណត្តិទី៤នេះ ក្នុងគោលបំណងដើម្បីលើកទឹកចិត្តស្រ្តីឲ្យចូលរួមក្នុងវិស័យនយោបាយនិងស្វែងយល់អំពីការបោះឆ្នោតនិងលទ្ធិប្រជាធិបតេយ្យ ។
ប្រធានសមាគមអាដហុកនិងជាមន្រ្តីសម្របសម្រួលឃ្លាំមើលការបោះឆ្នោតអង្គការខុមហ្វ្រែល លោក នាង សូវាត បានមានប្រសាសន៍ថា ការធ្វើវេទិកានៅពេលយប់គឺលោកយល់ឃើញថា ស្រ្តីទាំងអស់ទំនេរពីការងារផ្ទះមានឱកាសមកចូលរួមបានច្រើនគ្នា ហើយក្នុងវេទិកានេះដែរគឺមានស្រ្តីជាង៣០០នាក់ ។
លោក នាង សូវាត បានមានប្រសាសន៍ថា ៖ «បើសិនជាជំរុញស្ត្រីឲ្យមានការបោះឆ្នោតឲ្យបានច្រើននោះយើងឃើញថា ស្ថានភាពស្ត្រីឬក៏បញ្ហាស្រ្តីនឹងត្រូវបានដោះសា្រយ» ។
តំណាងគណបក្សប្រជាជនកម្ពុជាដែលជាអ្នកជួយរៀបចំវេទិកាសាធារណៈនេះដែរនោះ អ្នកស្រី អិន វណ្ណា មកពីឃុំអំពិល បានមានប្រសាសន៍ថាវេទិកានេះមានសារសំខាន់ណាស់ ដើម្បីលើកតម្កើងស្រ្តីឲ្យមានសេចក្តីក្លាហាន និងធ្វើឲ្យស្ត្រីយល់ពីតម្លៃរបស់ខ្លួនថាអាចធ្វើអ្វីៗបានដូចបុរសនោះដែរ ។
អ្នកស្រី អិន វណ្ណា បានឲ្យដឹងថា ៖ «នៅតាមភូមិឃុំនានាក៏ដោយ ទាល់តែមានស្ត្រីគឺជាបង្គោល បើគ្មានស្ត្រីគិតអីអត់ចេញដែរ» ។
តំណាងគណបក្សសមរង្ស៊ី អ្នកស្រី លី គីមហ៊ាង បានមានប្រសាសន៍ថាគណបក្សនយោបាយគួរតែផ្តល់ឱកាសឲ្យស្រ្តីចូលរួមក្នុងឆាកនយោបាយឲ្យបានច្រើនដូចបុរសដែរ ដើម្បីបង្ហាញពីភាពមិនរើសអើងចំពោះស្រ្តី ។
អ្នកស្រី លី គីមហ៊ាង បានបញ្ជាក់ថា ៖ «ហើយស្ត្រីហ្នឹងឯងខ្ញុំគិតថាគាត់មានសមត្ថភាពដែរ ប៉ុន្តែបុរសគាត់អាចប្រជែង» ។
តំណាងគណបក្សពីរទៀតគឺគណបក្ស នរោត្តម រណឫទ្ធិ និងគណបក្សហ៊្វុនស៊ិចប៉ិច មានទស្សនៈប្រហាក់ប្រហែលគ្នាដែរថា នៅក្នុងរយៈពេលប៉ុន្មានឆ្នាំកន្លងមកនេះ ស្រ្តីមានការយល់ដឹងគួរសមនៅក្នុងសង្គម ។ ទន្ទឹមនឹងនោះដែរដើម្បីកែប្រែស្រ្តីឲ្យមានសេចក្តីក្លាហាននិងភាពវៃឆ្លាត មាតាបិតាត្រូវបញ្ជូនកូនៗជាស្រ្តីទៅសាលាសាធារណៈឲ្យបានច្រើន ។
ប្រជាពលរដ្ឋដែលបានមកចូលរួមដែរនោះ កញ្ញា ស្រី ល័ក្ខណ៍ បានមានប្រសាសន៍ថា ទោះជាយ៉ាងណាស្រ្តីមួយចំនួននៅតែទទួលរងនូវការមាក់ងាយពីបុរស ដូចជាគ្រួសារខ្លះបុរសជាមេគ្រួសារអាងថាជាអ្នករកលុយ ចង់ប្រើអំពើហិង្សាមកលើប្រពន្ធពេលណាក៏បាន ដូចេ្នះបើស្ត្រីភាគច្រើនបានចូលរួមក្នុងសង្គម និងបានបម្រើការងារក្នុងជួររដ្ឋាភិបាលនោះបង្ហាញឲ្យឃើញថា ស្រ្តីមានសមត្ថភាពដូចបុរសដែរ ។
សូមបញ្ជាក់ថាវេទិកាដែលបានរៀបចំឡើងដោយអង្គការខុមហ្វ្រែលនេះ មានកម្មវិធីសំណួរចម្លើយនិងមានការផ្តល់រង្វាន់លើកទឹកចិត្តចំពោះអ្នកដែលបានឆ្លើយសំណួរបានត្រឹមត្រូវនោះមានដូចជាក្រមានិងអាវយឺតជាដើម ៕