ព្រឹត្តិការណ៍​សំខាន់ៗ​នៅ​សាលា​ក្ដី​ខ្មែរ​ក្រហម​ក្នុង​ឆ្នាំ​២០១២

អង្គ​ជំនុំ​ជម្រះ​វិសាមញ្ញ​ក្នុង​តុលាការ​កម្ពុជា ឬ​ហៅ​ជា​សាមញ្ញ​ថា សាលា​ក្ដី​ខ្មែរ​ក្រហម នៅ​ក្នុង​ឆ្នាំ​២០១២ នេះ បាន​ធ្វើ​សវនាការ​លើ​សំណុំ​រឿង​ក្ដី​របស់​មេ​ដឹកនាំ​ខ្មែរ​ក្រហម​លេខ​០០២។
ដោយ ឡេង ម៉ាលី
2013.01.01
សាលាក្ដី​ខ្មែរ​ក្រហម ថ្មី ៣០៥ អង្គ​ជំនុំជម្រះ​តុលាការ​កំពូល​នៃ​សាលាក្ដី​ខ្មែរ​ក្រហម នៅ​ថ្ងៃ​ទី​២ នៃ​សវនាការ​លើ​បណ្ដឹង​សាទុក្ខ​ក្នុង​សំណុំ​រឿង​០០១ របស់ កាំង ហ្កេកអ៊ាវ ហៅ ឌុច កាល​ពី​ថ្ងៃ​ទី​២៩ ខែ​មីនា ឆ្នាំ​២០១១។
Photo Courtesy of ECCC

នៅ​ក្នុង​រយៈពេល ១២​ខែ​ក្នុង​ឆ្នាំ​២០១២ នេះ មាន​ព្រឹត្តិការណ៍​សំខាន់ៗ​មួយ​ចំនួន​កើត​ឡើង​ទាក់​ទង​នឹង​ដំណើរ​ការ​ជំនុំ​ជម្រះ​នៃ​សាលា​ក្ដី​កូន​កាត់​នេះ។

បាទ! ទី​មួយ គឺ​ទាក់​ទង​នឹង​ករណី​របស់​ជន​ជាប់​ចោទ អៀង ធីរិទ្ធ អតីត​រដ្ឋមន្ត្រី​ក្រសួង​សង្គម​កិច្ច​នៃ​របប​កម្ពុជា​ប្រជាធិបតេយ្យ។

ថ្ងៃ​ទី៦ ខែ​មករា ឆ្នាំ​២០១២ អង្គ​ជំនុំ​ជម្រះ​សាលា​ដំបូង​នៃ​សាលា​ក្ដី​ខ្មែរ​ក្រហម បាន​ចេញ​របាយការណ៍​មួយ​ទាក់​ទង​នឹង​សេចក្ដី​បដិសេធ​របស់​តុលាការ​កំពូល ចំពោះ​សេចក្ដី​សម្រេច​របស់​ខ្លួន​ដែល​ឱ្យ​ដោះ​លែង​ជន​ជាប់​ចោទ អៀង ធីរិទ្ធ។

តុលាការ​កំពូល បង្គាប់​ដល់​អង្គ​ជំនុំ​ជម្រះ​សាលា​ដំបូង​ឱ្យ​អនុវត្ត​នូវ​វិធានការ​មួយ​ចំនួន ក្នុង​អំឡុង​ពេល​ជន​ជាប់​ចោទ អៀង ធីរិទ្ធ ត្រូវ​បន្ត​ការ​ឃុំ​ខ្លួន​នោះ។ វិធានការ​ទាំង​នេះ បន្ថែម​ការ​ព្យាបាល​ដល់​ជន​ជាប់​ចោទ ដើម្បី​ឱ្យ​សុខភាព​ស្មារតី​របស់​គាត់​ប្រសើរ​ឡើង​វិញ និង​អាច​ចូល​រួម​សវនាការ​បាន។ ការ​ព្យាបាល​នេះ គឺ​នៅ​មន្ទីរពេទ្យ ឬ​កន្លែង​ណា​មួយ​សមស្រប​ក្នុង​ប្រទេស​កម្ពុជា ហើយ​ស្ថិត​នៅ​ក្រោម​ការ​ត្រួត​ពិនិត្យ​ដោយ​គ្រូពេទ្យ​ជំនាញ​ផ្នែក​វិកល​ចរិត និង​ជំងឺ​មនុស្ស​ចាស់​ចំនួន ៥​រូប ដែល​តែង​តាំង​ដោយ​សាលា​ក្ដី​ខ្មែរ​ក្រហម។

អ្នក​ជំនាញ​អន្តរជាតិ​ក្នុង​ក្រុម​របស់​សាស្ត្រាចារ្យ ចន ខាំប៊ែល (John Campbell) ដែល​មាន​ក្រុម​វេជ្ជបណ្ឌិត​ជំនាញ​វិកល​ចរិត និង​ជំងឺ​មនុស្ស​ចាស់ រាយការណ៍​ជូន​អង្គ​ជំនុំ​ជម្រះ​នៅ​ថ្ងៃ​ទី៣០ និង​៣១ សីហា ថា អាការៈ​ជំងឺ​វង្វេង​ស្មារតី ឬ​ហៅ​ថា​ជំងឺ​អាលហ្សៃមើរ (Alzheimer) របស់​ជន​ជាប់​ចោទ អៀង ធីរិទ្ធ វ័យ ៨០​ឆ្នាំ មិន​បាន​ធូរ​ស្រាល​ទេ ទោះ​ជា​បាន​ព្យាបាល​ដោយ​ប្រើ​កម្មវិធី និង​ថ្នាំ​បង្កើន​បញ្ញា​ស្មារតី​រយៈពេល ៦​ខែ​ក្ដី។ អ្នក​ជំនាញ​បញ្ជាក់​ថា ការ​ចុះ​ខ្សោយ​នៃ​ដំណើរ​ការ​ខួរ​ក្បាល​របស់​ជន​ជាប់​ចោទ អៀង ធីរិទ្ធ មិន​អាច​វិល​មក​សភាព​ធម្មតា​បាន​ទេ និង​អស់​លទ្ធភាព​ព្យាបាល​ហើយ។

តាម​របាយ​ការណ៍​អ្នក​ជំនាញ​នេះ ទើប​នៅ​ថ្ងៃ​ទី១៣ កញ្ញា អង្គ​ជំនុំ​ជម្រះ​សាលា​ដំបូង សម្រេច​ដោះ​លែង​ជន​ជាប់​ចោទ អៀង ធីរិទ្ធ ឱ្យ​នៅ​ក្រៅ​ឃុំ។ ការ​សម្រេច​ដោះ​លែង​នេះ ត្រូវ​បាន​ភាគី​សហ​ព្រះរាជអាជ្ញា​ជំទាស់​ប្ដឹង​ទៅ​តុលាការ​កំពូល។ តុលាការ​កំពូល​សម្រេច​ឱ្យ​ដោះ​លែង នៅ​ថ្ងៃ​ទី១៦ ខែ​កញ្ញា ឆ្នាំ​២០១២។

មន្ត្រី​នាំ​ពាក្យ​សាលា​ក្ដី​ខ្មែរ​ក្រហម លោក នេត្រ ភក្ត្រា ថ្លែង​ថា បើ​ទោះ​ជា​ដោះ​លែង​តាម​ការ​សម្រេច​របស់​សាលា​ដំបូង​ក្ដី ក៏​តុលាការ​កំពូល​ភ្ជាប់​លក្ខខណ្ឌ​បណ្ដោះ​អាសន្ន​មួយ​ចំនួន​ដែរ៖ «ទី១ គឺ​ជន​ជាប់​ចោទ​ត្រូវ​ជូន​ដំណឹង​ដល់​អង្គ​ជំនុំ​ជម្រះ​អំពី​អាសយដ្ឋាន​ដែល​ខ្លួន​ត្រូវ​ស្នាក់​នៅ ហើយ​មិន​ត្រូវ​ផ្លាស់​ប្ដូរ​ដោយ​មិន​មាន​ការ​អនុញ្ញាត​ពី​អង្គ​ជំនុំ​ជម្រះ​ឡើយ។ ទី២ ជន​ជាប់​ចោទ​ត្រូវ​ប្រគល់​លិខិត​ឆ្លង​ដែន និង​លិខិត​ធ្វើ​ដំណើរ​ពាក់ព័ន្ធ​ដទៃ​ទៀត ហើយ​មិន​ត្រូវ​ចេញ​ក្រៅ​ព្រំ​ប្រទល់​នៃ​ដែនដី​ព្រះរាជាណាចក្រ​កម្ពុជា ទេ ហើយ​និង​ទី៣ គឺ​ជន​ជាប់​ចោទ​ត្រូវ​គោរព​តាម​ដីកា​កោះ ដែល​ចេញ​ដោយ​តុលាការ និង​បង្គាប់​ដល់​ជន​ជាប់​ចោទ អៀង ធីរិទ្ធ ត្រូវ​មាន​កាតព្វកិច្ច​មិន​ជ្រៀតជ្រែក​ចូល​ក្នុង​កិច្ចការ​រដ្ឋបាល»

អង្គ​ជំនុំ​ជម្រះ​បញ្ជាក់​ចុង​ក្រោយ​ថា សេចក្ដី​សម្រេច​ដែល​ថា​ជន​ជាប់​ចោទ​មិន​មាន​សម្បទា​បញ្ញា​ស្មារតី​គ្រប់គ្រាន់​ក្នុង​ការ​ចូល​រួម​សវនាការ​នេះ មិន​មែន​ជា​ការ​សម្រេច​អំពី​ពិរុទ្ធភាព​របស់​ជន​ជាប់​ចោទ អៀង ធីរិទ្ធ ឡើយ ហើយ​ជន​ជន​ជាប់​ចោទ​ក៏​មិន​រួច​ពី​ការ​ចោទ​ប្រកាន់​ដែរ។

ទាក់​ទង​នឹង​ការ​ដោះ​លែង​ជន​ជាប់​ចោទ អៀង ធីរិទ្ធ ឱ្យ​នៅ​ក្រៅ​ឃុំ បាន​ធ្វើ​ឱ្យ​ភាគី​ជន​រងគ្រោះ ទាំង​មេធាវី​ការពារ​ក្ដី​ឱ្យ​ដើម​បណ្ដឹង​រដ្ឋប្បវេណី និង​ដើម​បណ្ដឹង​រដ្ឋប្បវេណី​ផ្ទាល់ មាន​ប្រតិកម្ម​ភ្លាមៗ ដោយ​ការ​មិន​ពេញ​ចិត្ត។

រីឯ​ជន​ជាប់​ចោទ អៀង សារី ដែល​ជា​អតីត​រដ្ឋមន្ត្រី​ក្រសួង​ការ​បរទេស​កម្ពុជា​ប្រជាធិបតេយ្យ វិញ ត្រូវ​បាន​ទៅ​មន្ទីរ​ពេទ្យ​មិត្តភាព​ខ្មែរ​សូវៀត នៅ​ថ្ងៃ​ទី៧ ខែ​កញ្ញា ដោយ​សារ​បញ្ហា​បេះដូង និង​សួត។

ក្រឡា​បញ្ជី​តុលាការ លោក ឌុច ផារី បាន​អាន​របាយការណ៍​របស់​គ្រូពេទ្យ​នៃ​មន្ទីរ​ពេទ្យ​មិត្តភាព​ខ្មែរ សូវៀត ថា ជន​ជាប់​ចោទ អៀង សារី មាន​បញ្ហា​រលាក​សួត៖ «លោក អៀង សារី ត្រូវ​បាន​បញ្ជូន​មក​សម្រាក​ព្យាបាល​នៅ​ផ្នែក​សង្គ្រោះ​បន្ទាន់​នៃ​មន្ទីរ​ពេទ្យ​មិត្តភាព​ខ្មែរ​សូវៀត ក្រោម​រោគ​សញ្ញា​ក្អក​ជាប់ ពិបាក​ដក​ដង្ហើម និង​វិល​មុខ។ រយៈពេល​នៃ​ការ​ព្យាបាល និង​តាម​ដាន បញ្ជាក់​ថា លោក អៀង សារី មាន​រោគ​វិនិច្ឆ័យ​រលាក​ទង​សួត​ស្រួច​ស្រាវ បន្ថែម​លើ​រោគ​ដែល​លោក​មាន​ស្រាប់​ពី​ពេល​មុន ជំងឺ​បេះដូង និង​សរសៃ​ឈាម»

ពីរ​ខែ​ក្រោយ​មក អ្នក​ជំនាញ​ផ្នែក​ជំងឺ​មនុស្ស​ចាស់ លោក​សាស្ត្រាចារ្យ ចន ខាំប៊ែល វាយ​តម្លៃ​ថា ជន​ជាប់​ចោទ អៀង សារី មិន​សម​ស្រប​នឹង​ស្នាក់​នៅ​ក្នុង​មន្ទីរពេទ្យ​ទៀត​ទេ គឺ​អាច​មក​ចូល​រួម​សវនាការ​បាន ព្រោះ​ជន​ជាប់​ចោទ អៀង សារី មាន​ជំងឺ​ផ្នែក​រាងកាយ ប៉ុន្តែ​មិន​មាន​បញ្ហា​សតិ​បញ្ញា និង​ស្មារតី​ទេ។ នៅ​ថ្ងៃ​ទី៧ វិច្ឆិកា ជន​ជាប់​ចោទ​ត្រូវ​បាន​បញ្ជូន​មក​មន្ទីរ​ឃុំ​ឃាំង​វិញ។

សវនាការ​ភាគ​ច្រើន​នៅ​ចុង​ឆ្នាំ​២០១២ ជន​ជាប់​ចោទ អៀង សារី លះ​បង់​សិទ្ធិ​ស្ដាប់​សាក្សី និង​ដើម​បណ្ដឹង​រដ្ឋប្បវេណី​មួយ​ចំនួន ដោយ​សារ​តែ​អង្គុយ​មិន​បាន​យូរ។ មេធាវី​ការ​ពារ​ក្ដី​ជន​ជាប់​ចោទ អៀង សារី គឺ​លោក ម៉ៃឃើល ខាណាវ៉ាស (Michael Karnavas) លើក​ឡើង​ថា កូន​ក្ដី​លោក​មាន​បញ្ហា​ផ្ចង់​អារម្មណ៍​តាម​ដាន​សវនាការ​ដែរ ក្រៅ​ពី​បញ្ហា​សុខភាព​រាង​កាយ។ លោក​ស្នើសុំ​ឱ្យ​មាន​អ្នក​ជំនាញ​វាយ​តម្លៃ​បន្ថែម ក៏​ប៉ុន្តែ​អង្គ​ជំនុំ​ជម្រះ​បដិសេធ។

ដោយ​ឡែក​ទាក់​ទង​នឹង​មន្ត្រី​តុលាការ​អន្តរជាតិ​វិញ គឺ​ក្រោយ​ពី​លោក​ចៅក្រម ម៉ាកសែល ឡឺម៉ុង (Marcel lemond) លា​លែង​ជា​សហ​ចៅក្រម​ស៊ើប​អង្កេត​អន្តរជាតិ​ទៅ មាន​មន្ត្រី​មួយ​ចំនួន​ទៀត​បាន​លា​លែង​ជា​បន្ត​បន្ទាប់​ដែរ។ ក្នុង​នោះ សហ​ចៅក្រម​ស៊ើប​អង្កេត​អន្តរជាតិ លោក ស៊ីក ហ្វ្រ៊ីដ ប្លាំង (Siegfried Blunk) បាន​លា​លែង​កាល​ពី​ចុង​ឆ្នាំ​២០១១។

បន្ទាប់​ពី​ការ​លា​លែង​របស់​លោក ស៊ីក ហ្វ្រ៊ីដ ប្លាំង សហ​ចៅក្រម​ស៊ើប​អង្កេត​បម្រុង​អន្តរជាតិ លោក ឡូរ៉ង់ កាស្ពើ អង់ស៊ើម៉េ (Laurent Kasper Ansermet) បាន​បញ្ជាក់​អំពី​ការ​ប្ដេជ្ញា​ចិត្ត​របស់​លោក​ក្នុង​ការ​ផ្ដល់​ព័ត៌មាន​គ្រប់គ្រាន់​ដល់​សាធារណជន ទាក់​ទង​នឹង​ដំណើរ​ការ​វិវឌ្ឍន៍​សំខាន់ៗ​ក្នុង​សំណុំ​រឿង​លេខ​០០៣ និង ០០៤។ ក៏​ប៉ុន្តែ លោក​ថា​លោក​សោកស្ដាយ ព្រោះ​សហ​ចៅក្រម​ស៊ើប​អង្កេត​ជាតិ មិន​ឯកភាព។ ចំណែក​សហ​ចៅក្រម​ស៊ើប​អង្កេត​ជាតិ តប​វិញ​ថា ទង្វើ​របស់​លោក ឡូរ៉ង់ កាស្ពើ អង់ស៊ើម៉េ ជា​ការ​ខ្វះ​ការ​យោគយល់ ខ្វះ​ការ​ពិចារណា​គោលការណ៍​ច្បាប់ និង​បំពេញ​ការងារ​ដូច​ជា​អ្នក​ផ្សព្វផ្សាយ​ព័ត៌មាន ជា​ជាង​មន្ត្រី​តុលាការ។

បន្ទាប់​ពី​ការ​លា​លែង​សហ​ចៅក្រម​ស៊ើប​អង្កេត​អន្តរជាតិ​មួយ​រូប គឺ​លោក ស៊ីក ហ្វ្រ៊ីដ ប្លាំង កាល​ពី​ចុង​ឆ្នាំ​២០១១ ទៅ ធ្វើ​ឱ្យ​តំណែង​សហ​ចៅក្រម​ស៊ើប​អង្កេត​អន្តរជាតិ​នៅ​ទំនេរ​ជា​ច្រើន​ខែ។ ខាង​ភាគី​អន្តរជាតិ​ប្រកាស​ថា លោក​ចៅក្រម ឡូរ៉ង់ កាស្ពែរ អានសឺម៉េ ដែល​ជា​ចៅក្រម​បម្រុង​ត្រូវ​តែ​ទទួល​តំណែង​នេះ​ពេញ​សិទ្ធិ ក៏​ប៉ុន្តែ​ភាគី​កម្ពុជា ជំទាស់។ បញ្ហា​នេះ ធ្វើ​ឱ្យ​មាន​ភាព​ចម្រូងចម្រាស​រវាង​ភាគី​កម្ពុជា និង​អន្តរជាតិ។

ប្រធាន​ផ្នែក​កិច្ចការ​សាធារណៈ​នៃ​សាលា​ក្ដី​ខ្មែរ​ក្រហម លោក ឌឹម សុវណ្ណារុំ ថ្លែង​ថា មាន​ការ​យល់​ច្រឡំ​ច្រើន​ទាក់​ទង​នឹង​កិច្ច​ព្រមព្រៀង​រវាង​រដ្ឋាភិបាល និង​អង្គការ​សហប្រជាជាតិ រឿង​តែង​តាំង​សហ​ចៅក្រម​ស៊ើប​អង្កេត​អន្តរជាតិ ដែល​ចែង​ថា ក្នុង​ករណី​មាន​កន្លែង​ទំនេរ អ្នក​ដែល​ត្រូវ​តែង​តាំង​ឱ្យ​បំពេញ​កន្លែង​នោះ ត្រូវ​តែ​ជា​ចៅក្រម​ស៊ើប​អង្កេត​អន្តរ​ជាតិ​បម្រុង​នោះ​តែ​ម្ដង៖ «វា​ជា​ការ​ពិត កាល​ណា​មាន​ចៅក្រម​លា​លែង គឺ​ចៅក្រម​បម្រុង​នឹង​ចូល​មក​ជំនួស​កន្លែង​ទំនេរ​នេះ។ ប៉ុន្តែ​មិន​មែន​បាន​ន័យ​ថា ចៅក្រម​បម្រុង​រូប​នោះ ក្លាយ​ទៅ​ជា​ចៅក្រម​ស៊ើប​អង្កេត​អន្តរជាតិ​ស្វ័យ​ប្រវត្តិ​ឡើយ គឺ​ត្រូវ​ឆ្លង​កាត់​ការ​តែង​តាំង​ពី​ឧត្ដម​ក្រុម​ប្រឹក្សា​នៃ​អង្គ​ចៅក្រម បន្ទាប់​ពី​មាន​ការ​ចាត់​តាំង​ពី​លោក​អគ្គ​លេខាធិការ​អង្គការ​សហប្រជាជាតិ។ នេះ​គឺ​ជា​នីតិវិធី​ដែល​ត្រូវ​ធ្វើ»

បញ្ហា​មិន​ចុះ​សម្រុង​គ្នា​លើ​ការ​តែង​តាំង​លោក​ចៅក្រម ឡូរ៉ង់ កាស្ពែរ អានសឺម៉េ ជា​ចៅក្រម​ស៊ើប​អង្កេត​ពេញ​សិទ្ធិ បាន​អូស​បន្លាយ​អស់​ពេល​កន្លះ​ឆ្នាំ បើ​ទោះ​ជា​មាន​ជំនួប​ពិភាក្សា​គ្នា​រវាង​អ្នក​ជំនាញ​ពិសេស​នៃ​អង្គការ​សហប្រជាជាតិ លោក ដេវីដ សែហ៊្វើ (David Scheffer) និង​លោក​ឧបនាយក​រដ្ឋមន្ត្រី សុខ អាន ក៏​ដោយ។

ទី​បំផុត នៅ​ខែ​ឧសភា ឆ្នាំ​២០១២ លោក​ចៅក្រម ឡូរ៉ង់ កាស្ពែរ អានសឺម៉េ ដែល​ជា​សហ​ចៅក្រម​ស៊ើប​អង្កេត​អន្តរជាតិ​បម្រុង បាន​លា​លែង​ទៀត។

ចាប់​តាំង​ពី​ចុង​ឆ្នាំ​២០១១ រហូត​ដល់​ថ្ងៃ​ទី២៦ ខែ​តុលា ទើប​មាន​លោក​ចៅក្រម ម៉ាក ហាម៉ុន (Mark Harmon) ធ្វើ​ពិធី​សម្បថ​ចូល​កាន់​តំណែង​ជា​សហ​ចៅក្រម​ស៊ើប​អង្កេត​អន្តរជាតិ​ថ្មី នៅ​សាលា​ក្ដី​ខ្មែរ​ក្រហម។

ក្រោយ​ការ​ចូល​កាន់​តំណែង លោក​បាន​បន្ត​ការងារ​លើ​សំណុំ​រឿង​០០៣ និង ០០៤ ជាមួយ​នឹង​សហភាតា​របស់​លោក គឺ​លោក​សហ​ចៅក្រម​ស៊ើប​អង្កេត​ជាតិ លោក យូ ប៊ុនឡេង។

នៅ​ខែ​ឧសភា ឆ្នាំ​២០១២ ដែរ ចៅក្រម​អន្តរជាតិ​នៅ​សាលា​ក្ដី​ខ្មែរ​ក្រហម គឺ​លោក ម៉ូតូអុ ណូហ្គុឈិ (Motoo Noguchi) លា​លែង​ពី​តួនាទី​របស់​លោក​ជា​ចៅក្រម​តុលាការ​កំពូល។

លោក​ចៅក្រម ម៉ូតូអុ ណូហ្គុឈិ លា​លែង​ពី​សាលា​ក្ដី​ខ្មែរ​ក្រហម ទៅ​បម្រើ​ការងារ​នៅ​ក្រសួង​យុត្តិធម៌​ឯ​ប្រទេស​ជប៉ុន វិញ។

កាល​ពី​ថ្ងៃ​ទី១៩ ខែ​ធ្នូ ក្រុម​មេធាវី​អន្តរជាតិ​ការពារ​ក្ដី​ឱ្យ​ជន​ជប់​ចោទ នួន ជា ចំនួន ៣​រូប បាន​ប្រកាស​លា​ឈប់​ពី​តួនាទី​របស់​ខ្លួន​នៅ​សាលា​ក្ដី​ខ្មែរ​ក្រហម។ មេធាវី​ទាំង ៣​រូប​នោះ មាន​លោក ម៉ៃឃើល ផេសមែន (Michiel Pestman) លោក អែនឌ្រូ អ៊ីនូហ្ស៊ី (Andrew Ianuzzi) និង​លោក ចាសស្ពើរ ប៉ាវ (Jasper Pauw)។ លោក​ទាំង​៣ លើក​ហេតុផល​ថា លោក​មិន​អាច​បំពេញ​ការងារ​ការពារ​ក្ដី​បាន​ពេញ​លេញ ព្រោះ​តែ​មាន​ការ​ជ្រៀតជ្រែក​នយោបាយ​ពី​រដ្ឋាភិបាល​ចូល​ក្នុង​កិច្ចការ​របស់​សាលា​ក្ដី​ខ្មែរ​ក្រហម។

ចំណែក​ឯ​រដ្ឋាភិបាល បាន​ហៅ​ការ​ចោទ​ប្រកាន់​នេះ​ថា មិន​មែន​ជា​ការ​ពិត ហើយ​ថា ក្រុម​មេធាវី​ទាំង​នោះ​មាន​អាកប្បកិរិយា​ក្រអឺតក្រទម ច្រងេងច្រងាង​ក្នុង​សវនាការ និង​ត្រូវ​អង្គ​ជំនុំ​ជម្រះ​ដេញ​ចេញ​ពី​សវនាការ​ផង ហើយ​ថា ការ​លា​ឈប់​របស់​ក្រុម​មេធាវី​អន្តរជាតិ​ទាំង​នោះ គឺ​ដោយ​សារ​ចប់​អាណត្តិ និង​បញ្ហា​ផ្ទាល់​ខ្លួន។

ទាក់​ទង​នឹង​បញ្ហា​ថវិកា​វិញ សាលា​ក្ដី​ខ្មែរ​ក្រហម តែង​តែ​ជួប​ការ​លំបាក​ជា​រៀង​រាល់​ឆ្នាំ។ រហូត​មក​ដល់​ពេល​នេះ បុគ្គលិក​បម្រើ​ការ​នៅ​សាលា​ក្ដី​ខ្មែរ​ក្រហម​ខាង​ភាគី​ខ្មែរ ប្រមាណ ៣០០​នាក់ នៅ​តែ​មិន​ទាន់​បាន​បើក​ប្រាក់​ខែ សម្រាប់​ខែ​ធ្នូ ឆ្នាំ​២០១២ នៅ​ឡើយ​ទេ។

ក៏​ប៉ុន្តែ មន្ត្រី​នាំ​ពាក្យ​សាលា​ក្ដី​ខ្មែរ​ក្រហម​លោក នេត្រ ភក្ត្រា ថ្លែង​ថា ថវិកា​សម្រាប់​ឆ្នាំ​២០១២ នេះ គឺ​មិន​ចោទ​ជា​បញ្ហា​ទេ ពី​ព្រោះ​ក្រុម​ប្រទេស​ផ្ដល់​ជំនួយ បាន​សន្យា​ផ្ដល់​គ្រប់​ចំនួន​ហើយ គ្រាន់​តែ​យឺតយ៉ាវ​បន្តិច​បន្តួច​ប៉ុណ្ណោះ៖ «មាន​ន័យ​ថា វា​អាច​យឺត​មួយ​សប្ដាហ៍ ឬ​ពី​សប្ដាហ៍ ដើម្បី​បើក​ប្រាក់​បៀវត្ស​ជូន​ដល់​បុគ្គលិក​ទាំង​អស់​ហ្នឹង។ តែ​ឥឡូវ​ហ្នឹង គេ​កំពុង​ដោះស្រាយ​បញ្ហា​ហ្នឹង​ហើយ ដើម្បី​ឱ្យ​ប្រាក់​ខែ​សម្រាប់​ឆ្នាំ​២០១២ ខែ​ធ្នូ។ ដោយ​ឡែក​ឆ្នាំ​២០១៣ យើង​អត់​ដឹង​នៅ​ឡើយ​ទេ»

លោក នេត្រ ភក្ត្រា ថ្លែង​ឱ្យ​ដឹង​ថា ថវិកា​សម្រាប់​ដំណើរ​ការ​ការ​ជំនុំ​ជម្រះ​អតីត​មេ​ដឹកនាំ​ជាន់​ខ្ពស់​ខ្មែរ​ក្រហម​សម្រាប់​ឆ្នាំ​២០១៣ នៅ​មិន​ទាន់​ប្រាកដ​ប្រជា​នៅ​ឡើយ​ទេ បើ​ទោះ​ជា​គម្រោង​ថវិកា​ត្រូវ​បាន​ដាក់​ជូន​ប្រទេស​ផ្ដល់​ជំនួយ​អស់​រយៈពេល​ជិត​មួយ​ឆ្នាំ​មក​ហើយ​ក្ដី៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។