សភាជាតិនៃប្រទេសកម្ពុជា នៅថៃ្ងច័ន្ទ ទី១៦ ខែវិច្ឆិកា បានបោះឆ្នោតលើកអភ័យឯកសិទ្ធិតំណាងរាស្រ្តពីលោក សម រង្ស៊ី មេដឹកនាំគណបក្សប្រឆាំងហើយ តាមសំណើរបស់តុលាការខេត្តស្វាយរៀង ដើម្បីបើកផ្លូវឲ្យតុលាការនេះស៊ើបអង្កេតនិងចោទប្រកាន់ក្រោមបទព្រហ្មទណ្ឌ បំផ្លាញទ្រព្យសម្បត្តិសាធារណៈកាលពីពេលថ្មីៗនេះ។
ការបោះឆ្នោតនោះបានធ្វើទ្បើងដោយសំឡេងឯកច្ឆន្ទ គឺ៨៧លើ៨៧សំឡេង នៅក្នុងចំណោមតំណាងរាស្រ្តដែលបានចូលរួមប្រជុំនៅថ្ងៃទី១៦ វិច្ឆកានេះ។
ក្រុមអ្នកកាសែតនានា មិនត្រូវបានអនុញ្ញាតឲ្យចូលសភាជាតិដើម្បីតាមដានការបោះឆ្នោតនោះទេ។
តំណាងរាស្រ្តខាងគណបក្សប្រជាជនកម្ពុជាមណ្ឌលស្វាយរៀង ដែលបានចូលរួមក្នុងការបោះឆ្នោតនោះ បានមានប្រសាសន៍ប្រាប់វិទ្យុអាស៊ីសេរីថា ការធ្វើនេះគឺគ្រាន់តែអនុវត្តតាមសំណើរបស់តុលាការខេត្តស្វាយរៀងតែប៉ុណ្ណោះ ៖ «ធម្មតាទេ បោះឆ្នោតព្យួរអភ័យឯកសិទ្ធិ។ សំខាន់រឿងព្រះរាជអាជ្ញាអមសាលាដំបូងខេត្ត គេមានការប្ដឹងផ្ដល់គ្នានោះ»។
លោក យឹម សុវណ្ណ តំណាងរាស្រ្តគណបក្សសមរង្ស៊ីនិងជាអ្នកនាំពាក្យនៃគណបក្សនេះ បានមានប្រសាសន៍នៅក្នុងសន្និសីទកាសែតនៅខាងក្រៅសភាជាតិថា ៖ «ការធ្វើនេះគឺជាការផ្ដន្ទាទោសប្រទេសជាតិខ្លួនឯង និងផ្ដន្ទាទោសប្រជាពលរដ្ឋស្លូតត្រង់ដែលបាត់បង់ដីធ្លី ដោយសារតែការបោះបង្គោលព្រំដែនប្រទេសវៀតណាម ភាគខាងកើតនេះ»។
ចំណែកឯលោក សម រង្ស៊ី ផ្ទាល់ ជាមេដឹកនាំគណបក្សប្រឆាំងនៅក្នុងប្រទេសកម្ពុជា បានមានប្រសាសន៍ប្រាប់វិទ្យុអាស៊ីសេរីតាមទូរស័ព្ទពីប្រទេសបារាំងមកថា ៖ «គេធ្វើនេះគឺតាមបញ្ជា ព្រោះនាយករដ្ឋមន្រ្តីប្រទេសវៀតណាមហ្នឹងចេញឈ្មោះខ្ញុំ ហើយបានដាក់បញ្ជាឲ្យរដ្ឋាភិបាលទីក្រុងភ្នំពេញ ឲ្យចាត់វិធានការចំពោះខ្ញុំ»។
លោក ចន ចនសុន (John Johnson) ជាមន្រ្តីអ្នកនាំពាក្យនៃស្ថានទូតអាមេរិកនៅក្នុងប្រទេសកម្ពុជា សុំមិនធ្វើអត្ថាធិប្បាយអ្វីទេជុំវិញរឿងនេះ ប៉ុន្តែលោកបានសន្យាថា នឹងបន្តការតាមដានសំណុំរឿងនេះជាបន្តទៀត។
ប្រភពពីមន្រ្តីគណបក្សសមរង្ស៊ីបានឲ្យដឹងថា តំណាងរាស្រ្តទាំង២៦រូបនឹងតំណាងរាស្រ្ត៣រូបទៀត នៃគណបក្សសិទ្ធិមនុស្សដឹកនាំដោយលោក កឹម សុខា បានធ្វើពហិការមិនបានចូលរួមបោះឆ្នោតលើកអភ័យឯកសិទ្ធិលោក សម រង្ស៊ី នោះទេ។ តំណាងរាស្រ្តប្រទេសកម្ពុជាសរុបមានចំនួន១២៣នាក់។
ក្រុមតំណាងរាស្រ្តនៃគណបក្សសមរង្ស៊ី ចំនួនជាង២០នាក់ បានដង្ហែក្បួនអហិង្សាមួយចេញពីសភាជាតិ កាត់តាមដងផ្លូវវិមានឯករាជ្យឆ្ពោះទៅកាន់គណបក្សនេះវិញនៅក្រោមការតាមដាន ដោយក្រុមនគរបាលចម្រុះរាប់សិបនាក់និងនគរបាលស៊ីវិលផងដែរ។
ស្រ្តីម្នាក់ឈ្មោះ មូរ សុខម ដែលបានចូលរួមដង្ហែក្បួននោះដែរបានថែ្លងថា ៖ «សម រង្ស៊ី ដើម្បីការពារបូរណភាពទឹកដី បែរទៅជាគេប្ដឹងដកអភ័យឯកសិទ្ធិ ខ្ញុំឈឺចាប់ខ្លាំងណាស់ ខ្ញុំជាប្រជាជន»។
សភាជាតិបានបោះឆ្នោតលើកអភ័យឯកសិទ្ធិតំណាងរាស្រ្តពីលោក សម រង្ស៊ី នៅថៃ្ងច័ន្ទ ទី១៦ ខែវិច្ឆិកា គឺក្រោយពីមានសំណើពីតុលាការខេត្តស្វាយរៀង ប្ដឹងដោយអាជ្ញាធរស្រុកចន្ទ្រា ខេត្តស្វាយរៀង បានចោទប្រកាន់ថា លោក សម រង្ស៊ី បានបំផ្លាញទ្រព្យសម្បត្តិសាធារណៈថ្មីៗនេះ។
ការប្តឹងចោទនោះគឺក្រោយពេលដែលលោក សម រង្ស៊ី បានរងការចោទថា លោកបានដកបង្គោលឈើតំណាងឲ្យបង្គោលព្រំដែនរវាងកម្ពុជានិងវៀតណាម កាលពីថៃ្ងទី២៥ ខែតុលា កន្លងទៅនៅក្នុងឃុំសំរោង ស្រុកចន្ទ្រា ខេត្តស្វាយរៀង ជាប់នឹងព្រំដែននោះ៕