ការតាមដាននេះគឺបង្កាក្រែងលោអាចមានការផ្ទុះឡើងនូវមេរោគគ្រុនផ្ដាសាយបក្សីសាជាថ្មី។
អនុប្រធាននាយកដ្ឋានប្រយុទ្ធនឹងជំងឺឆ្លងរបស់ក្រសួងសុខាភិបាល លោកវេជ្ជបណ្ឌិត លី សូវ៉ាន់ បានមានប្រសាសន៍ឲ្យដឹងនៅថ្ងៃសុក្រថា ក្រុមមន្ត្រីសុខាភិបាលនឹងបន្តត្រួតពិនិត្យស្ថានភាពនៃការផ្ទុះជំងឺគ្រុនផ្ដាសាយបក្សីនោះក្នុងអំឡុងពេលមួយសប្ដាហ៍ទៀត ដើម្បីធានាថាមេរោគគ្រុនផ្ដាសាយបក្សីលែងមាននៅតំបន់នោះ។
លោកវេជ្ជបណ្ឌិត លី សូវ៉ាន់ បានឲ្យដឹងថា ៖ «យើងនៅបន្តទៀតក្រែងអាចមានអ្នកខ្លះទៀត។ យើងនៅបន្ត៨ថ្ងៃទៀតរុករកអ្នកសង្ស័យនិងប៉ះពាល់ដដែល»។
ការរកឃើញករណីមេរោគគ្រុនផ្តាសាយបក្សី H5N1 នៅខេត្តកណ្តាលគឺបន្ទាប់ពីមានយុវជនមួយរូបឈ្មោះ តេង សុភ័ក្រ្ត អាយុ១៩ឆ្នាំ មានស្រុកកំណើតនៅខេត្តកណ្តាលនិងរស់នៅខេត្តកំពង់ស្ពឺបានកើតជំងឺគ្រុនផ្តាសាយបក្សី ហើយត្រូវបានបញ្ជូនមកសម្រាកព្យាបាលនៅក្នុងមន្ទីរពេទ្យទាន់ពេលវេលា កាលពីថ្ងៃទី២៨ វិច្ឆិកាកន្លងទៅនេះ។
លោកវេជ្ជបណ្ឌិត លី សូវ៉ាន់ បានឲ្យដឹងថា អ្នកជំងឺ តេង សុភ័ក្រ្ត មានស្ថានភាពធូរស្រាលច្រើនហើយ។
លោកវេជ្ជបណ្ឌិត លី សូវ៉ាន់ បានឲ្យដឹងទៀតថា ក្រសួងសុខាភិបាលបានធ្វើតេស្តទៅលើមនុស្សចំនួន៩៥នាក់ដែលគេមានសង្ស័យថាអាចឆ្លងជំងឺគ្រុនផ្ដាសាយបក្សី ហើយជាអ្នកដែលបានប៉ះពាល់ជាមួយនឹងអ្នកជំងឺឈ្មោះ តេង សុភ័ក្រ្ត ប៉ុន្តែលទ្ធផលបង្ហាញថាពួកគាត់មិនមានឆ្លងនោះឡើយ។
រហូតមកទល់ពេលនេះសត្វបក្សីចំនួន៣៤៤ក្បាលហើយត្រូវបានគេសម្លាប់នៅកន្លែងដែលអ្នកជំងឺបានទទួលទានសាច់មាន់ឈឺនៅស្រុកកណ្ដាលស្ទឹង ខេត្តកណ្ដាលនោះ៕