អ្នក​ភូមិ​នៅ​​​បឹង​កក់​តវ៉ា​ប្រឆាំង​​នឹង​ការ​បូម​​ដី​​​ធ្វើ​ឲ្យ​ទឹក​ជន់​​លិច​​​ផ្ទះ

ការ​បូម​ដី​បាន​ធ្វើ​ឲ្យ​មាន​ទឹក​លិច​ភូមិ​ប្រជាជន​នៅ​តំបន់​បឹង​កក់ ដោយ​ក្រុមហ៊ុន​ស៊ូកាគូ បង្ក​ឲ្យ​ប្រជាជន​រស់​នៅ​ដី​គោក​ជុំវិញ​តំបន់​បឹង​កក់ រួម​គ្នា​ប្រឆាំង​រហូត​មាន​ការ​ជួយ​អន្តរាគមន៍​ពី​ចៅ​សង្កាត់​ស្រះចក និង​អភិបាល​ខណ្ឌ​ដូនពេញ ទើប​មាន​ការ​ផ្អាក​បូម​ដី​នៅ​ថ្ងៃ​ត្រង់​ទី​៣០ ខែ​កញ្ញា។
ដោយ អ៊ុក សាវបូរី
2010-09-30
អ៊ីម៉ែល
មតិ
Share
បោះពុម្ព
អ្នក​ភូមិ​នៅ​តំបន់​បឹង​កក់ ដុត​កង់​ឡាន​តវ៉ា​ប្រឆាំង​នឹង​ក្រុមហ៊ុន​ស៊ូកាគូ ដែល​បាន​បូម​ដី​លុប​បឹង បណ្ដាល​ឲ្យ​ទឹក​ជន់​លិច​ផ្ទះ​ពួក​គាត់ កាល​ពី​ថ្ងៃ​ទី​៣០ ខែ​កញ្ញា ឆ្នាំ​២០១០។
អ្នក​ភូមិ​នៅ​តំបន់​បឹង​កក់ ដុត​កង់​ឡាន​តវ៉ា​ប្រឆាំង​នឹង​ក្រុមហ៊ុន​ស៊ូកាគូ ដែល​បាន​បូម​ដី​លុប​បឹង បណ្ដាល​ឲ្យ​ទឹក​ជន់​លិច​ផ្ទះ​ពួក​គាត់ កាល​ពី​ថ្ងៃ​ទី​៣០ ខែ​កញ្ញា ឆ្នាំ​២០១០។
RFA/Ouk Savborey

សំឡេង​អ្នក​ភូមិ​នៅ​តំបន់​បឹង​កក់​ស្រែក​តវ៉ា ៖ «មិន​មែន​បម្រើ​រាស្ត្រ​ទេ នេះ​ធ្វើ​ដើម្បី​ផល​ប្រយោជន៍​ក្រុមហ៊ុន​ទេ។ រាស្ត្រ​ក្រីក្រ​នៅ​តែ​វេទនា​រាល់​ថ្ងៃ ដោយសារ​តែ​ការ​បូម​ពន្លិច​ផ្ទះ​ប្រជាពលរដ្ឋ​រស់​នៅ​តំបន់​បឹង​កក់​នេះ»

ការ​តវ៉ា​នេះ​បាន​ធ្វើ​ឡើង​ព្រម​គ្នា នៅ​ថ្ងៃ​ព្រហស្បតិ៍ ទី​៣០ ខែ​កញ្ញា ឆ្នាំ​២០១០ ដោយ​ប្រជាជន ៧​ភូមិ រស់​នៅ​ក្នុង​ដី​គោក​ជុំវិញ​បឹង​កក់ នា​សង្កាត់​ស្រះចក ខណ្ឌ​ដូនពេញ ដែល​ខឹង​សម្បា​ក្រុមហ៊ុន​ស៊ូកាគូ បូម​ដី​ពី​ទន្លេ​យក​មក​លុប​បឹង​កក់ ដោយ​បាន​បង្វែរ​ផ្លូវ​ហូរ​នៃ​មាត់​បំពង់​ទឹក​មក​ពន្លិច​ភូមិ​ប្រជាជន​ភូមិ​១ ជន់​លិច​ភូមិ។

ប្រជាជន​តវ៉ា​នោះ​ភាគ​ច្រើន​ជា​ស្ត្រី និង​កុមារ បាន​ស្រែក​ដាក់​មីក្រូ និង​ដុត​កង់​ឡាន ដើម្បី​ឲ្យ​ក្រុមហ៊ុន​បញ្ឈប់​ការ​បូម​ខ្សាច់​នោះ។

ស្ត្រី​នៅ​ភូមិ​២២ ឈ្មោះ ហេង មុំ បាន​ឲ្យ​ដឹង​ថា ៖ «ភូមិ​ប្រជាពលរដ្ឋ​បាន​លិច​អស់​រលីង សូម្បី​តែ​បើក​ទ្វារ​ចូល​ផ្ទះ​ក៏​បើក​មិន​បាន​ដែរ​នេះ។ ខ្ញុំ​ដង្ហោយ​ហៅ​រដ្ឋាភិបាល​ឲ្យ​ជួយ​ដោះស្រាយ ខ្ញុំ​មិន​ចង់​ឃើញ​ខ្មែរ​យើង​មាន​ទឹក​ភ្នែក​ហូរ​ម្ដង​ហើយ​ម្ដង​ទៀត​អ៊ីចឹង​ទេ ខ្ញុំ​ឈឺ​ចាប់​ណាស់!»

ក្រោយ​ពី​មាន​ការ​តវ៉ា​ដោយ​មិន​មាន​ដំណោះស្រាយ ប្រជាជន​បាន​លើក​គ្នា​ទៅ​ប្ដឹង​ដល់​ផ្ទះ​នាយករដ្ឋមន្រ្តី ហ៊ុន សែន ប៉ុន្តែ​ត្រូវ​ប៉ូលិស​ក្រុម​ខ្លា​ហោះ និង​ប៉ូលិស​សង្កាត់ ខណ្ឌ រារាំង​ខ្លាំងក្លា រហូត​មាន​ការ​ប្រតាយប្រតប់​គ្នា ធ្វើ​ឲ្យ​ស្ត្រី​ម្នាក់​សន្លប់។

ក្រុម​កុមារ​បាន​ប្ដេជ្ញា​ស្រាក់​ដៃ​គ្នា​រត់​ចូល​ទម្លាយ​ម៉ូតូ​របស់​ប៉ូលិស​ចត​រាំង​ផ្លូវ​មិន​ឲ្យ​ប្រជាជន​លើក​គ្នា​ឡើង​ទៅ​ប្ដឹង​ដល់​ផ្ទះ​នាយករដ្ឋមន្ត្រី​បាន។

ក្រុម​កុមារ​បាន​និយាយ​ថា ពួកគេ​រស់​នៅ​លិចលង់​ក្នុង​ទឹក​ច្រើន​ថ្ងៃ​ហើយ ដោយសារ​ក្រុមហ៊ុន​ស៊ូកាគូ បូម​ខ្សាច់​ចាក់​លុប​បឹង​កក់ ហើយ​ក្រុមហ៊ុន​បង្វែរ​ផ្លូវ​ហូរ​នៃ​ទឹក​មក​ពន្លិច​ផ្ទះ​អ្នក​ភូមិ ដែល​នៅ​លើ​គោក​ជុំវិញ​បឹង​កក់ ៖ «ទៅ​ផ្ទះ​សម្តេច ប៊ុន រ៉ានី ទៅ​ឲ្យ​ជួយ​បិទ​ក្បាល​បូម​ខ្សាច់​កុំ​ឲ្យ​លិច​ផ្ទះ​ពួក​ខ្ញុំ។ ទៅ​ប្ដឹង​ថា ផ្ទះ​ខ្ញុំ​លិច​ឡើង​ត្រឹម​ក​ឯ​ណោះ។ បុក​ចូល​ទៅ​ផ្ទះ​សម្តេច ហ៊ុន សែន ឲ្យ​ទាល់តែ​បាន»

មន្ត្រី​ក្រុម​ការងារ​ពិសេស​សិទ្ធិ​លំនៅឋាន ដែល​ឃ្លាំ​មើល​សកម្មភាព​បូម​ខ្សាច់​ពន្លិច​ទឹក​មក​លើ​ផ្ទះ​ប្រជាជន លោក ណឹប លី បាន​ថ្លែង​ថា ៖ «រដ្ឋាភិបាល និង​ក្រុមហ៊ុន​ហ្នឹង ធ្វើការ​ចរចា ឬ​ក៏​ដោះស្រាយ​ឲ្យ​ពួក​គាត់​ឲ្យ​បាន​សមរម្យ​ទៅ មុន​នឹង​បូម​ពន្លិច​គាត់​អ៊ីចឹង។ យើង​មើល​ឃើញ​នឹង​ភ្នែក​ទាំង​អស់​គ្នា​ហើយ​ថា លំនៅឋាន​ទាំង​អស់​ហ្នឹង​នៅ​ភូមិ​១ ដែល​នៅ​ខាង​ចុង​នេះ ត្រូវ​បាន​លិចលង់​ហើយ ហើយ​គ្មាន​ដំណោះស្រាយ​អី​មួយ​ទេ»

ក្រោយ​ពី​មាន​ការ​រារាំង និង​មាន​ការ​ចរចា​នៅ​ថ្ងៃ​ត្រង់​ថ្ងៃ​ដដែល ចៅ​សង្កាត់​ស្រះចក គឺ​លោក ឆាយ ធិរិទ្ធ និង​អភិបាល​ខណ្ឌ​ដូនពេញ គឺ​លោក សុខ សម្បត្តិ បាន​ចុះ​មើល​សភាពការណ៍​នោះ និង​បាន​ឃើញ​ផ្ទះ​ប្រជាជន​ពិត​ជា​រង​នូវ​ការ​ពន្លិច​ទឹក​ពិត​មែន។ លោក​បាន​សុំ​ឲ្យ​ប្រជាជន​លើក​សំណូមពរ​យក​ទៅ​ដាក់​នៅ​សាលា​ខណ្ឌ ដើម្បី​អាជ្ញាធរ​ខណ្ឌ​យក​សំណើ និង​សំណូម​ពរ​ទាំង​ឡាយ ទៅ​ពិភាក្សា​ជាមួយ​អាជ្ញាធរ​ក្រុង​បន្ត​ទៀត។

លោក សុខ សម្បតិ្ត អភិបាល​ខណ្ឌ​ដូនពេញ ថ្លែង​យ៉ាង​ដូច្នេះ ៖ «អ៊ីចឹង​បាន​ខ្ញុំ​ចង់​បាន​សំណូមពរ ឥឡូវ​បង​សរសេរ​មក​ណា៎!។ បង​ស្រី បង​សរសេរ​មក​ណា៎!»

នៅ​រសៀល​ថ្ងៃ​ព្រហស្បតិ៍ ប្រជាជន​មិន​បាន​យក​សំណើ និង​សំណូមពរ​ទៅ​ជូន​អភិបាល​ខណ្ឌ​តាម​ការ​សន្យា​ទេ។ ពួក​គាត់​អះអាង​ថា គ្រាន់​តែ​អភិបាល​ខណ្ឌ​ត្រឡប់​ទៅ​វិញ ក្រុមហ៊ុន​ស៊ូកាគូ បន្ត​បូម​ខ្សាច់​ឲ្យ​ទឹក​លិច​ផ្ទះ​អ្នក​ស្រុក​ដដែល។

ប្រភព​ពី​មន្ត្រី​អង្គការ​សង្គម​ស៊ីវិល​បាន​ឲ្យ​ដឹង​ថា ទំនាស់​ដី​តំបន់​បឹង​កក់ ប៉ះពាល់​ប្រជាជន​ចំនួន ៤.២៥២​គ្រួសារ។ ទំនាស់​បាន​កើត​ឡើង​តាំង​ពី​ឆ្នាំ​២០០៦​មក។ ការ​ដោះស្រាយ​មិន​ទាន់​ចប់​សព្វ​គ្រប់​នៅ​ឡើយ គឺ​នៅ​សល់​ពលរដ្ឋ ៧​ភូមិ មាន​ភូមិ​លេខ​១ លេខ​៦ លេខ​២០ លេខ​២១ លេខ​២២ លេខ​២៣ និង​លេខ​២៤ ប្រមាណ​ជា ២.៧០០​គ្រួសារ​ទៀត ដែល​ភាគ​ច្រើន​រស់​នៅ​​លើ​ដី​គោក ជុំវិញ​បឹង​កក់ ដែល​ក្រុមហ៊ុន​មិន​ធ្វើ​ការ​ចរចា​ទេ តែ​បែរ​ជា​បូម​ដី​មាន​លាយ​ទឹក​ពន្លិច​ភូមិ​ពួកគេ។

តំបន់​បឹងកក់​ត្រូវ​រដ្ឋាភិបាល​​ជួល​ទៅ​ឲ្យ​ក្រុមហ៊ុន​ស៊ូកាគូ រយៈ​ពេល ៩៩​ឆ្នាំ ក្នុង​តម្លៃ ៧៩​លាន​ដុល្លារ​សហរដ្ឋ​អាមេរិក លើ​ផ្ទៃ​ដី​ប្រមាណ​ជាង ១៣៣​ហិកតា។ បច្ចុប្បន្ន​បាន​កាត់​វិហារ​ឥស្លាម​នៅ​ក្នុង​នោះ​ចេញ នៅ​សល់​ផ្ទៃ​ដី​វិនិយោគ​តែ​ជាង ១២៦​ហិកតា៕

ព័ត៌មាន (0)
Share
គេហទំព័រ​ទាំងមូល