ពលរដ្ឋមកពី ៧ភូមិរស់នៅតំបន់បឹងកក់ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ប្រមាណ ១០០នាក់ នៅព្រឹកថ្ងៃទី១ ខែតុលា បានមកប្រមូលផ្គុំគ្នានៅខាងមុខគេហដ្ឋានលោកនាយករដ្ឋមន្ត្រី ហ៊ុន សែន ក្បែរវិមានឯករាជ្យ ដោយបានអំពាវនាវឲ្យជួយរកដំណោះស្រាយអំពីបញ្ហាទឹកលិចផ្ទះសម្បែងរបស់ពួកគាត់ បណ្ដាលមកពីក្រុមហ៊ុនស៊ូកាគូ បូមខ្សាច់លប់បឹងកក់។
ពលរដ្ឋបានឲ្យដឹងថា ការជួបប្រជុំគ្នានៅមុខផ្ទះលោក ហ៊ុន សែន ត្រូវបានមន្ត្រីសមត្ថកិច្ចប្រើកម្លាំងបង្ក្រាប ដែលបណ្ដាលឲ្យស្ត្រី ២នាក់រងរបួស ក្នុងនោះមានស្ត្រីម្នាក់ឈ្មោះ គង់ ចន្ថា ដួលសន្លប់នៅនឹងកន្លែង និងស្ត្រីម្នាក់ទៀតក៏ត្រូវបានបញ្ជូនទៅកាន់មន្ទីរពេទ្យដែរ។
បន្ទាប់ពីត្រូវបានអាជ្ញាធរវាយបង្ក្រាប ពលរដ្ឋនៅតំបន់បឹងកក់បានទៅជួបប្រជុំគ្នាជាថ្មីទៀតនៅមុខវត្តបទុមវតី និងបន្ទាប់មកពួកគាត់ទៅជួបជុំគ្នានៅមុខរដ្ឋសភា ដើម្បីស្នើឲ្យថ្នាក់ដឹកនាំស្ថាប័នកំពូលមួយនេះជួយអន្តរាគមន៍ជុំវិញកង្វល់របស់ពួកគាត់។
ស្ត្រីឈ្មោះ លី មុំ ដែលអះអាងថា ជាតំណាងពលរដ្ឋរស់នៅតំបន់បឹងកក់ ដែលត្រូវទឹកលិច មានប្រសាសន៍ថា សព្វថ្ងៃនេះកុមារតូចៗមិនអាចធ្វើដំណើរទៅរៀនបាន និងកើតជំងឺសើស្បែកជាច្រើននាក់ ក្រោយពីក្រុមហ៊ុនស៊ូកាគូ បូមខ្សាច់លប់បឹងកក់រួចមក។
អ្នកស្រី លី មុំ បានអំពាវនាវសូមឲ្យប្រមុខរដ្ឋាភិបាល និងស្ថាប័នកំពូលៗ ជួយអន្តរាគមន៍ដល់ពួកគាត់ ៖ «ថ្ងៃទី១ (តុលា) នេះ ពួកខ្ញុំបានធ្វើដំណើរមកផ្ទះសម្ដេចនាយកទៀត ដើម្បីឲ្យសម្ដេចជួយដោះស្រាយពីផលលំបាកពួកខ្ញុំ តែត្រូវប៉ូលិសវាយដំរហូតដល់សន្លប់ម្នាក់ទៀត ប្រើដំបងឆក់ ហើយរុញច្រានពួកខ្ញុំ ទាត់ពួកខ្ញុំសាហាវដូចសត្វធាតុអ៊ីចឹង»។
ស្រដៀងគ្នានេះដែរស្ត្រីឈ្មោះ ហេង មុំ បានអំពាវនាវក្នុងសំឡេងទួញយំដូច្នេះ ៖ «មិនឃើញលោកណាមកជួយខ្ញុំទេ ទោះបីយំបែកមេឃបែកដីក៏គ្មានលោកណាមកជួយខ្ញុំដែរ មានតែសម្ដេចតេជោ ហ៊ុន សែន ទេ...»។
មន្ត្រីនាំពាក្យ និងជាតំណាងរាស្ត្រគណបក្ស សម រង្ស៊ី លោក យឹម សុវណ្ណ ដែលបានចេញពីកិច្ចប្រជុំសភាមកជួបពលរដ្ឋនៅមុខរដ្ឋសភា បានស្នើទៅថ្នាក់ដឹកនាំរដ្ឋាភិបាលឲ្យរកដំណោះស្រាយជូនពលរដ្ឋរស់នៅតំបន់បឹងកក់ ដែលកំពុងមានជម្លោះជាមួយក្រុមហ៊ុនស៊ូកាគូឲ្យបានឆាប់។
លោក យឹម សុវណ្ណ មានប្រសាសន៍ថា ៖ «ការអភិវឌ្ឍណាមួយក៏ដោយ ទាល់តែចំណេញគ្រប់ភាគីទាំងអស់។ ការអភិវឌ្ឍក្រុមហ៊ុនឯកជនរាប់រយលានដុល្លារ ចំណេញតែរដ្ឋាភិបាល មន្ត្រីពុករលួយមួយក្ដាប់តូច ទុកឲ្យប្រជាជនរងទុក្ខលំបាកវេទនារាប់ពាន់គ្រួសារ គឺយើងប្រឆាំងនឹងការអភិវឌ្ឍបែបនេះ»។
ទាក់ទិននឹងការតវ៉ារបស់ប្រជាពលរដ្ឋ តំណាងខុទ្ទកាល័យលោកនាយករដ្ឋមន្ត្រី ហ៊ុន សែន លោក គង់ ចំរើន ដែលបានទៅជួបពលរដ្ឋបានសន្យាថា នឹងយកសំណើពលរដ្ឋដាក់ជូនទៅប្រមុខរដ្ឋាភិបាល និងមន្ត្រីស្ថាប័នពាក់ព័ន្ធ ដើម្បីពិនិត្យ និងធ្វើអន្តរាគមន៍។
លោក អំ សំអាត មន្ត្រីស៊ើបអង្កេតអង្គការការពារសិទ្ធិមនុស្សលីកាដូ បានចាត់ទុកសកម្មភាពបង្ក្រាបរបស់អាជ្ញាធរទៅលើពលរដ្ឋរស់នៅតំបន់បឹងកក់ថា ជាការរំលោភសិទ្ធិមនុស្សធ្ងន់ធ្ងរ ហើយថា ទង្វើហិង្សានេះមិនអាចរកដំណោះស្រាយបញ្ចប់ជម្លោះបានឡើយ។
លោក អំ សំអាត មានប្រសាសន៍ដូច្នេះ ៖ «យើងគួរតែរកវិធីចរចាដោយសន្តិវិធី ហើយរកដំណោះស្រាយយ៉ាងណាដើម្បីឲ្យប្រជាពលរដ្ឋទទួលយកបាន មិនអាចប្រើប្រាស់កម្លាំងដើម្បីបង្ក្រាបក្នុងបញ្ហាដោះស្រាយដូចពេលនេះទេ»។
ចំណាររបស់លោកនាយករដ្ឋមន្ត្រី ហ៊ុន សែន ចុះថ្ងៃទី១៥ ខែកញ្ញា ឆ្នាំ២០០៨ បានសម្រេចឲ្យសាលារាជធានីភ្នំពេញ និងក្រុមហ៊ុនស៊ូកាគូ ដោះស្រាយគោលនយោបាយជូនពលរដ្ឋដែលមានខ្នងផ្ទះស្ថិតនៅក្នុងតំបន់បឹងកក់ពិតប្រាកដនូវជម្រើសចំនួន ៣ សម្រាប់ឲ្យពលរដ្ឋជ្រើសរើស។
ទី១ ចំពោះពលរដ្ឋដែលស្ម័គ្រចិត្តផ្លាស់ទីលំនៅចេញពីទីតាំងអភិវឌ្ឍន៍ដោយមិនយកផ្ទះ ក្រុមហ៊ុនផ្ដល់ថវិកាចំនួន ៨ពាន់ដុល្លារ និងសោហ៊ុយចំនួន ២លានរៀលក្នុង១ខ្នងផ្ទះ។ ទី២ ចំពោះពលរដ្ឋដែលស្ម័គ្រចិត្តទទួលយកផ្ទះនៅក្រៅទីតាំងអភិវឌ្ឍន៍ ក្រុមហ៊ុនរៀបចំផ្ដល់ផ្ទះ ១ល្វែង និងសោហ៊ុយ ២លានរៀលក្នុង១ខ្នងផ្ទះ និងទី៣ ចំពោះពលរដ្ឋដែលចង់រស់នៅតំបន់បឹងកក់ដដែល គឺក្រុមហ៊ុនសុំឲ្យទៅស្នាក់នៅបណ្ដោះអាសន្ននៅកន្លែងដែលសាលាក្រុងរៀបចំជូន ដោយរង់ចាំក្រុមហ៊ុនបូមខ្សាច់បំពេញបឹងកក់រួចជាស្ថាពរ ក្រុមហ៊ុននឹងសង់ជាអគារផ្ដល់ជូនពលរដ្ឋទាំងនោះ៕