ការផ្ទុះអាវុធជាច្រើននាទីនៅតំបន់ភ្នំទ្រព្យចម្ងាយប្រមាណ៣គីឡូម៉ែត្រភាគខាងលិចប្រាសាទព្រះវិហារ ត្រូវគេរាយការណ៍ឲ្យដឹងជាផ្លូវការថា មានទាហានខ្មែរម្នាក់និងទាហានថៃ២នាក់រងរបួសនៅពេលបានបាញ់ដាក់គ្នាទៅវិញទៅមកនោះ។
ប្រភពពីមន្ត្រីខ្មែរបានឲ្យដឹងថា ទាហានថៃជាអ្នកបាញ់កាំភ្លើងអឹម៧៩ដាក់កងកម្លាំងទាហានខ្មែរជាមុន ទើបបានហេតុការណ៍ផ្ទុះអាវុធបានកើតឡើង។
អ្នកយកព័ត៌មានវិទ្យុអាស៊ីសេរី លោក សាវយុត ដែលតាមដានសភាពការណ៍ប៉ះទង្គិចគ្នានេះរាយការណ៍បន្ថែម ៖
ម៉ាយ៉ារិទ្ធិ ៖ លោក សាវយុត តើលោកមានព័ត៌មានអ្វីបន្ថែមជុំវិញព្រឹត្តិការណ៍កាលពីម្សិលមិញដែរឬទេ?
សាវយុត ៖ សូមជម្រាបថា ចាប់តាំងពីម៉ោងប្រមាណ៨:១៥នាទី ល្ងាចថ្ងៃទី៣ ខែតុលានេះ មានសេចក្ដីរាយការណ៍ថាបន្ទាប់ពីកងទ័ពថៃនិងកងទ័ពខ្មែរបានប៉ះគ្នាដោយអាវុធនៅឯតំបន់ព្រលានឥន្ទ្រីជាប់ភ្នំទ្រព្យហ្នឹងមក គឺទាហានថៃបានដកថយប្រហែលជា៤ម៉ែត្រ ក៏ប៉ុន្តែគេឃើញថាការដកថយហ្នឹងមានលក្ខណៈរបៀបជាត្រៀមកងទ័ពទំនងជារៀបចំក្បួនយោធារបៀបជាប្រយុទ្ធ។
ដោយឡែកស្ថានការណ៍នៅឯខ្សែត្រៀមជួរមុខជាប់តំបន់ប្រាសាទព្រះវិហារហ្នឹងមានសេចក្ដីរាយការណ៍ថា មានការជ្រួលច្របល់នៅក្នុងកងទ័ពថៃហ្នឹងចំនួន៣លើករួចមកហើយ ដោយកងទាហានថៃខ្លះមានការភ្ញាក់ផ្អើល ហើយមានការរត់ចោលអង្រឹងឬក៏រត់ចោលកន្លែងរបស់ខ្លួនទៀតផង។ ក៏ប៉ុន្តែយើងឃើញថា ស្ថានការណ៍នៅសមរភូមិហ្នឹងហាក់មានសភាពតានតឹងណាស់ គឺកងកម្លាំងរៀងខ្លួនហ្នឹងបានត្រៀមប្រយុទ្ធ ហើយអាវុធរៀងខ្លួនហ្នឹងបានត្រៀមនៅតាមកន្លែងលេណដ្ឋានដែលមានលក្ខណៈប្រយុទ្ធតឹងតែង។
ក៏ប៉ុន្តែទោះបីជាយ៉ាងណាក៏ដោយឃើញថា តាមសេចក្ដីរាយការណ៍ពីកងយោធាខ្មែរថា មេបញ្ជាការទាហានឈុតខ្មៅថៃនៅប្រចាំសមរភូមិហ្នឹងបានខំទប់ស្កាត់ស្ថានការណ៍កុំឲ្យទាហានខ្មែរធ្វើការផ្ទុះអាវុធ។
ក៏ប៉ុន្តែដោយឡែកនៅឯវត្តកែវសិក្ខាគិរីស្វរៈដែលមានទាហានថៃនៅក្នុងវត្តចំនួន១០នាក់នៅឡើយនោះ តាមសេចក្ដីរាយការណ៍ពីកងយោធាខ្មែរថា ទាហានថៃទាំងនោះបានសុំចាកចេញពីតំបន់វត្តហ្នឹងទៅកាន់កន្លែងរបស់គេ ក៏ប៉ុន្តែមេបញ្ជាការខ្មែរបានដាក់លក្ខខណ្ឌថា បើសិនជាទាហានថៃចំនួន១០នាក់នៅឯវត្តកែវសិក្ខាគិរីស្វរៈហ្នឹងចង់ចាកចេញ គឺគេអនុញ្ញាតឲ្យចាកចេញ ក៏ប៉ុន្តែមិនអនុញ្ញាតឲ្យវិលត្រឡប់មកវិញបានទេ។ ហើយរហូតមកទល់ពេលនេះកងទាហានឈុតខ្មៅដែលនៅក្នុងទឹកដីខ្មែរ វត្តកែវសិក្ខាគិរីស្វរៈហ្នឹង គឺនៅតែមានវត្តមាននៅឡើយ ប៉ុន្តែគេស្ថិតនៅក្នុងសភាពភ័យខ្លាច។
ម៉ាយ៉ារិទ្ធិ ៖ មានការចោទប្រកាន់ពីមេបញ្ជាការរបស់ថៃគឺលោកឧត្ដមសេនីយ៍ឈ្មោះ វីប៊ុនសាក់វីផាន់ បានប្រាប់អ្នកកាសែតថា ទាហានថៃកំពុងតែដើរល្បាត ហើយឃើញថា មានទាហានខ្មែរប៉ុនប៉ងចូលទៅក្នុងទឹកដីរបស់គេ ហើយគេក៏បានបាញ់ទៅលើជាច្រើនគ្រាប់ ក៏ប៉ុន្តែនៅពេលនោះភាគីខ្មែរក៏បានបាញ់ត្រឡប់មកវិញ តើរឿងនេះមានការសំអាងយ៉ាងណាដែរ?
សាវយុត ៖ បើតាមការអះអាងរបស់ឧត្ដមសេនីយ៍យោធាថៃ ហើយបើវិលមកស្ដាប់ពីមេបញ្ជាការកងទ័ពខ្មែរវិញ គឺមានការអះអាងខុសគ្នា ពីព្រោះខ្ញុំបានជួបមេបញ្ជាការរងថ្មើរជើងកងពលលេខ៤៣ដែលកងទាហានរបស់គាត់បានប៉ះប្រយុទ្ធគ្នាជាមួយទាហានថៃហ្នឹង លោកបានមានប្រសាសន៍ថា នៅពេលដែលកងទ័ពខ្មែរនៅក្នុងទីកន្លែងមួយដែលជាដែនដីខ្មែរបោះទីតាំងនៅយូរមកហើយ គឺគេហៅថាព្រលានឥន្ទ្រី នៅជាប់តំបន់ភ្នំទ្រព្យចម្ងាយប្រមាណ៣គីឡូម៉ែត្រពីប្រាសាទព្រះវិហារហ្នឹង គឺទាហានថៃចំនួនប្រមាណជា៣០នាក់បានចូលមកដល់កន្លែងដែលទាហានខ្មែរបោះទីតាំងហ្នឹង ហើយបានព្យាយាមបណ្ដេញទាហានខ្មែរដែលនៅហ្នឹងឲ្យចាកចេញ ដោយថៃសំអាងថាជាទឹកដីរបស់ថៃ ហើយទាហានខ្មែរបានបញ្ជាក់ថា ធ្វើអ៊ីចឹងមិនកើតទេ ពីព្រោះអ្នកឯងមកបញ្ជាក់ថា ទឹកដីថៃកន្លែងនេះ ទឹកដីថៃកន្លែងនោះ ដោយមិនមានគណៈកម្មការព្រំដែនដោះស្រាយអ៊ីចឹងមិនកើតទេ ដូច្នេះត្រូវថយទៅវិញ រង់ចាំគណៈកម្មការព្រំដែននៃប្រទេសទាំងពីរដោះស្រាយសិន។ បើសិនជាដោះស្រាយថាជាទឹកដីអ្នកណានោះ ទាហានខ្មែរនឹងដកចេញ ប៉ុន្តែសុំឲ្យកងទាហានថៃដែលចូលមកហ្នឹងចាកចេញទៅវិញ។ ហើយមេបញ្ជាការរងកងពលថ្មើរជើងលេខ៤៣បានបញ្ជាក់ថា បន្ទាប់ពីកងទាហានថៃចាកចេញពីកងទាហានខ្មែរដោយរុញច្រានគ្នាទៅបានប្រមាណជា៨០ម៉ែត្រហ្នឹង គឺកងទាហានថៃបានផ្ទុះអាវុធដោយបាញ់អាវុធធុន M79 មកលើទាហានខ្មែរ ហើយមានការបាញ់រះអាវុធតូចៗជាច្រើនគ្រាប់ ទើបទាហានខ្មែរប្រើស្វ័យការពារខ្លួនដោយបាញ់អាវុធការពារតបតទៅវិញតែប៉ុណ្ណោះ ហើយបើទោះបីជាមានការបាញ់មែន ក៏ប៉ុន្តែទាហានខ្មែរមិនបានជំរុលទៅដេញតាមទាហានថៃទេ។
មន្ត្រីខ្មែរ៖ ការប៉ះទង្គិចរវាងខ្មែរនិងថៃនឹងមិនរារាំងដល់ជំនួបនៃមេដឹកនាំប្រទេសទាំង២ទេ
ការប៉ះទង្គិចគ្នាដោយអាវុធរវាងទាហានខ្មែរនិងទាហានថៃនេះបានកើតឡើងនៅប្រមាណ១០ថ្ងៃមុនការត្រៀមជួបគ្នារវាងនាយករដ្ឋមន្ត្រីខ្មែរនិងនាយករដ្ឋមន្ត្រីថៃដើម្បីដោះស្រាយបញ្ហាជម្លោះបញ្ហាព្រំប្រទល់។
មានការវិភាគខ្លះតាមសារព័ត៌មានបានសរសេរថា គេបារម្ភខ្លាចក្រែងការប៉ះទង្គិចគ្នានោះនឹងអាចធ្វើឲ្យរារាំងដល់ការគ្រោងជួបគ្នារវាងនាយករដ្ឋមន្ត្រីទាំងពីរ ប៉ុន្តែមន្ត្រីអ្នកនាំពាក្យខុទ្ទកាល័យរាជរដ្ឋាភិបាល លោករដ្ឋលេខាធិការ ផៃ ស៊ីផាន បានមានប្រសាសន៍កាលពីម្សិលមិញថា គេមិនរំពឹងថាហេតុការណ៍នោះនឹងនាំជាឧបសគ្គរារាំងជំនួបមេដឹកនាំប្រទេសទាំងពីរនោះទេ។
អ្នកនាំពាក្យរងនៃកងទ័ពថៃចោទថា ទាហានខ្មែរជាអ្នកបាញ់ទៅលើទាហានថៃមុន
ពីប្រទេសថៃនោះវិញអ្នកនាំពាក្យរងនៃកងទ័ពថៃបានចោទថា ទាហានខ្មែរជាអ្នកបានបាញ់ទៅលើទាហានថៃមុន។
លោកស្រីវរសេនីយ៍ឯក ស៊ីរីយ៉ាន ង៉ា ថុង បានប្រាប់វិទ្យុអាស៊ីសេរីថា ការបាញ់បានធ្វើនៅពេលថៃកំពុងយាមល្បាតនៅលើទឹកដីរបស់ខ្លួន។
លោកស្រីវរសេនីយ៍ឯក ស៊ីរីយ៉ាន ង៉ា ថុង បានមានប្រសាសន៍ថា ៖ "ក្នុងពេលប្រយុទ្ធ ភាគីម្ខាងទៀតបានបាញ់កាំភ្លើងដៃមកលើទាហានយើង។ ឥឡូវមេបញ្ជាការកងទ័ពបានឲ្យមេបញ្ជាការក្នុងតំបន់ពិភាក្សាជាមួយមេបញ្ជាការខ្មែរហើយ។ ដំបូងគេនឹងធ្វើការស៊ើបអង្កេតសិនពីព្រោះវាអាចមានការភ័ន្តច្រឡំ"។
ប្រសាសន៍របស់អ្នកនាំពាក្យរងកងទ័ពថៃនេះបានផ្ទុយទៅនឹងសម្តីរបស់ឧត្តមសេនីយ៍ឯកថៃ លោក Viboonsak Neepan មេបញ្ជាការប្រចាំភាគបូព៌ារបស់ថៃ ដែលបានប្រាប់អ្នកកាសែតថា ទាហានថៃបានបាញ់ទៅលើអាកាសព្រមានទាហានខ្មែរ ហើយទាហានខ្មែរក៏បានបាញ់តបមកទាហានថៃនោះវិញ។
នៅជាមួយគ្នានោះដែរ កាសែត The Nation របស់ថៃបានសរសេរថា ការប្រយុទ្ធប្រមាណ១០នាទីរវាងទាហានខ្មែរថៃ គឺនៅបន្ទាប់ពីមានសេចក្តីរាយការណ៍មកថា មានទាហានថៃចំនួន១០នាក់បានឆ្លងចូលទៅក្នុងបរិវេណតំបន់ជម្លោះក្បែរប្រាសាទព្រះវិហារ៕