ពលរដ្ឋខ្មែរអាមេរិកាំងម្នាក់ ដែលបានអត្ថាធិប្បាយតាមសារអេឡិចត្រូនិកក្នុងលក្ខខណ្ឌមិនបញ្ចេញឈ្មោះថា នៅពេលគេធ្វើដំណើរទៅកាន់ប្រទេសកម្ពុជា ម្តងៗ តែងជួបឧបសគ្គក្នុងការប្រើប្រាស់ទិដ្ឋាការដែលគេទទួលបានពីសហរដ្ឋអាមេរិក។
ប្រភពដដែលបានឲ្យដឹងថា នៅពេលគេទៅដល់អាកាសយានដ្ឋានអន្តរជាតិរាជធានីភ្នំពេញ គេត្រូវចំណាយលុយឲ្យក្រុមមន្ត្រីនគរបាល ដែលទទួលបន្ទុកខាងទិដ្ឋាការចំនួន ៣០ដុល្លារថែមទៀត បើទោះបីជាពលរដ្ឋខ្មែរអាមេរិកាំងខ្លះមានទិដ្ឋាការដែលស្ថានទូតខ្មែរក្នុងសហរដ្ឋអាមេរិកផ្ដល់ឲ្យក៏ដោយ។
ប្រភពបានបន្ថែមថា មន្ត្រីនគរបាលខាងទិដ្ឋាការមួយចំនួនអះអាងថា ទិដ្ឋាការដែលគេបានពីសហរដ្ឋអាមេរិក មិនមានប្រសិទ្ធភាពដូចទិដ្ឋាការដែលគេចេញឲ្យនៅអាកាសយានដ្ឋានអន្តរជាតិភ្នំពេញនោះឡើយ។
ប្រតិកម្មរបស់ពលរដ្ឋខ្មែរអាមេរិកាំងរូបនេះ ធ្វើឡើងនៅបន្ទាប់ពីលោក ហែម ហេង ឯកអគ្គរាជទូតខ្មែរប្រចាំសហរដ្ឋអាមេរិក បានមានប្រសាសន៍ថា ស្ថានទូតខ្មែរផ្ដល់ទិដ្ឋាការដល់ពលរដ្ឋខ្មែរអាមេរិកាំងទូទៅដោយឥតគិតថ្លៃ។
ឆ្លើយតបនៅនឹងប្រតិកម្មរបស់ពលរដ្ឋខ្មែរអាមេរិកាំង ដែលបានលើកឡើងអំពីបញ្ហាទិដ្ឋាការនោះ ឯកអគ្គរាជទូតខ្មែរ លោក ហែម ហេង ថ្លែងថា កន្លងមកលោកតែងឮពាក្យចចាមអារ៉ាមថា មានសមត្ថកិច្ចខ្លះនៅអាកាសយានដ្ឋាន បានយកលុយពីពលរដ្ឋខ្មែរដែលទៅពីបរទេសមែន ប៉ុន្តែក្រសួងការបរទេសសហការជាមួយក្រសួងមហាផ្ទៃ បានខិតខំបំបាត់បញ្ហានេះ។
លោក ហែម ហេង មានប្រសាសន៍ដូច្នេះ ៖ «តាមពិតបងប្អូនដែលបានទិដ្ឋាការពីស្ថានទូត ឬស្ថានកុងស៊ុលរបស់យើងនៅក្រៅប្រទេសហើយ គឺថា អត់មានត្រូវបង់អីទៀតទេ វាស្របច្បាប់ហើយ ហើយមនុស្សដែលថា មកសុំលុយសុំកាក់អី ថារបស់ហ្នឹងវាមិនល្អអី អ្នកហ្នុងជាមនុស្សខូច ហើយជាបុគ្គលប៉ុណ្ណោះ»។
លោក ហែម ហេង បន្តថា ពលរដ្ឋទាំងឡាយត្រូវរាយការណ៍ទៅនគរបាលរាជធានីភ្នំពេញ អំពីសកម្មភាពទារលុយណាមួយដែលធ្វើឡើងដោយក្រុមសមត្ថកិច្ចនៅអាកាសយានដ្ឋានអន្តរជាតិភ្នំពេញ។
លោក ហែម ហេង មានប្រសាសន៍បន្ថែមថា ៖ «ចំពោះរឿងនេះ សុំឲ្យមានការសហការទាំងអស់គ្នា ពីព្រោះការដែលបុគ្គលធ្វើហ្នឹងគេលួចធ្វើទេ ធ្វើម៉េចនឹងក្រសួងដឹង ដូច្នេះសូមបងប្អូនដែលទទួលរងហ្នឹង សូមឲ្យប្ដឹង សូមឲ្យរាយការណ៍ទៅប៉ូលិសហ្នឹងទៅ អាហ្នឹងទើបយើងអាចចាត់វិធានការបាន»។
គួរបញ្ជាក់ផងដែរថា ទិដ្ឋាការ ឬ Visa សម្រាប់ពលរដ្ឋខ្មែរអាមេរិកាំងជាទិដ្ឋាការអចិន្ត្រៃយ៍ប្រភេទ K និងជាទិដ្ឋាការដែលគេអាចទទួលបានដោយឥតគិតថ្លៃ ហើយសុំតែម្ដងអាចប្រើបានរហូតដល់លិខិតឆ្លងដែនអស់សុពលភាព ឬផុតថ្ងៃកំណត់។
ជារឿយៗ វិទ្យុអាស៊ីសេរីតែងទទួលបានលិខិតត្អូញត្អែរពីភ្ញៀវទេសចរណ៍ខ្មែរអាមេរិកកាំង ដែលធ្វើដំណើរទៅលេងប្រទេសកម្ពុជា ដែលអះអាងថា ពួកគេតែងជួបបទពិសោធន៍សឹងគ្រប់ៗគ្នា អំពីក្រុមប៉ូលិសអន្តោប្រវេសន៍ដែលធ្វើការពិនិត្យលើលិខិតឆ្លងដែនរបស់អ្នកធ្វើដំណើរ តែងទារលុយក្រៅផ្លូវការពីភ្ញៀវទេសចរណ៍។
ជុំវិញបញ្ហានេះ លោក ហែម ហេង ក៏បានទទួលស្គាល់ផងដែរថា ប្រសិនបើសមត្ថកិច្ចនៅតាមអាកាសយានដ្ឋានឆ្លៀតឱកាសយកលុយពីភ្ញៀវទេសចរណ៍ជាតិ និងអន្តរជាតិ នៅតែបន្តកើតមាននោះ នឹងធ្វើឲ្យមុខមាត់របស់កម្ពុជា កាន់តែអាប់ឱន។
លោក ហែម ហេង មានប្រសាសន៍ដូច្នេះ ៖ «ការពិតហើយ ប្រសិនបើជាមានមន្ត្រីខ្លះគាត់នៅតែលួចធ្វើអ៊ីចឹងទៀត គឺថា វាធ្វើឲ្យប៉ះពាល់មុខមាត់ប្រទេសជាតិ។ កាលណាវាធ្វើឲ្យប៉ះពាល់ដល់មុខមាត់ប្រទេសជាតិ វាធ្វើឲ្យចំនួនអ្នកទៅទស្សនាស្រុកខ្មែរហ្នឹងវាអាចថយចុះ ដោយសារគេអន់ចិត្ត ពីព្រោះជួនកាលពេលគេត្រឡប់មកវិញ គេនិយាយប្រាប់មិត្តភក្ដិ ឬប្រាប់អ្នកផ្សេងទៅ វាធ្វើឲ្យបញ្ហាហ្នឹងកាន់តែរីកធំ ហើយរាជរដ្ឋាភិបាលតែងតែចាត់វិធានការលុបបំបាត់នូវអំពើអសកម្មទាំងនេះ ប៉ុន្តែនៅតែមានត្រីងៀតឆ្លៀតពង។ តែទោះបីជាយ៉ាងណាក៏ដោយ រាជរដ្ឋាភិបាលនឹងខិតខំធ្វើយ៉ាងណាឲ្យអស់ ដើម្បីជំរុញភ្ញៀវទេសចរណ៍ឲ្យធ្វើទៅធ្វើទស្សនកិច្ចនៅស្រុកខ្មែរកាន់តែច្រើនថែមទៀត»។
ពលរដ្ឋខ្មែរនៅសហរដ្ឋអាមេរិកជាច្រើននិយាយថា ប្រសិនបើបញ្ហាទិដ្ឋាការទៅកម្ពុជា ឧបសគ្គដ៏ស្មុគស្មាញក្នុងការធ្វើដំណើរដូច្នេះនោះ កម្ពុជាអាចធ្លាក់ចុះនូវវិស័យទេសចរណ៍ដែលជាដង្ហើមសេដ្ឋកិច្ចដ៏ធំរបស់ប្រទេស៕