តុលាការ​ពន្យារ​ពេល​សវនាការ​លើ​សំណុំ​រឿង​ពុករលួយ​ជា​លើក​ទី​៣

សំណុំ​រឿង​អាស្រូវ​ចោទ​ប្រកាន់​លើ​អំពើ​ពុករលួយ​ពាក់ព័ន្ធ​នឹង​ទឹក​ប្រាក់ ២​សែន​ដុល្លារ​អាមេរិក តាំង​ពី​ឆ្នាំ​២០០៩​មក មិន​ត្រូវ​បាន​តុលាការ​ក្រុង​ភ្នំពេញ បាន​បញ្ចប់​សំណុំ​រឿង​នៅ​ទ្បើយ​ទេ ដោយសារ​តែ​បាន​លើក​ពេល​សវនាការ​ជា​បន្តបន្ទាប់​មក។
ដោយ សុខ សេរី
2010-12-29
អ៊ីម៉ែល
មតិ
Share
បោះពុម្ព
ជន​រងគ្រោះ​ដោយសារ​ការ​រឹប​យក​ដី​ធ្លី អ្នក​ស្រី ហួត សារុំ (ឆ្វេង) នៅ​ទីស្នាក់ការ​វិទ្យុ​អាស៊ី​សេរី។
ជន​រងគ្រោះ​ដោយសារ​ការ​រឹប​យក​ដី​ធ្លី អ្នក​ស្រី ហួត សារុំ (ឆ្វេង) នៅ​ទីស្នាក់ការ​វិទ្យុ​អាស៊ី​សេរី។
RFA/Sok Serey

តុលាការ​ក្រុង​ភ្នំពេញ នៅ​ថ្ងៃ​ទី​២៩ ខែ​ធ្នូ​នេះ បាន​ប្រកាស​ពន្យារ​ពេល​សវនាការ​ជា​ថ្មី​ទៀត ចំពោះ​រឿង​ក្ដី​ដែល​មាន​ជន​ជាប់​ចោទ លោក សេង យៀន និង​លោកស្រី ឌី ព្រឹម។ អ្នក​ទាំង​ពីរ​កំពុង​តែ​ស្ថិត​នៅ​ក្រោម​បទ​ចោទ​ប្រកាន់​ថា បាន​ជាប់​ពាក់ព័ន្ធ​នឹង​រឿង​អាស្រូវ​ពុករលួយ មាន​ទឹក​ប្រាក់ ២​សែន​ដុល្លារ​អាមេរិក ដើម្បី​ជា​ថ្នូរ​នឹង​ការ​ធ្វើ​របាយការណ៍​ក្លែង​បន្លំ​រដ្ឋាភិបាល​កន្លង​មក ដើម្បី​ប៉ុនប៉ង​រឹប​យក​ដី​ស្រែ​ជាង ៥​ហិកតា​ពី​កសិករ​ម្នាក់​នៅ​ក្នុង​ខណ្ឌ​ដង្កោ ជាយ​ទីក្រុង​ភ្នំពេញ។

ចៅក្រម​ជម្រះ​ក្ដី លោក ឌុច គឹមស៊ន នៅ​ក្នុង​ចៅក្រម​ប្រឹក្សា ២​នាក់​ទៀត បាន​ប្រកាស​ថា តុលាការ​មិន​អាច​បន្ត​ជម្រះ​ក្ដី​លើ​សំណុំ​រឿង​នេះ​បាន​ទេ ដោយសារ​តែ​មេធាវី និង​ជន​ជាប់​ចោទ​អវត្តមាន​ក្នុង​សំណុំ​រឿង​ព្រហ្មទណ្ឌ​នេះ និង​មាន​សំណើ​សុំ​ពន្យារ​ពេល។ ចៅក្រម​ជម្រះ​ក្ដី​មិន​បាន​កំណត់​កាល​បរិច្ឆេទ​ជា​ថ្មី​ភា្លមៗ​ទេ។

ព្រះរាជអាជ្ញា​រង​នៃ​តុលាការ​ក្រុង​ភ្នំពេញ លោក ជេត ខេមរា បាន​ឯកភាព​តាម​សំណើ​នេះ។

មេធាវី​របស់​ក្រសួង​អធិការកិច្ច ទំនាក់ទំនង​សភា និង​ព្រឹទ្ធ​សភា ជា​ដើម​បណ្ដឹង គឺ​លោក ទ្បុង នរិន្ទ ដែល​បាន​ប្ដឹង​លោក សេង យៀន និង​លោកស្រី ឌី ព្រឹម កន្លង​មក មាន​ប្រសាសន៍​ថា ក្នុង​នាម​លោក​ជា​ដើម​បណ្ដឹង លោក​មិន​ជំទាស់​នឹង​សំណើ​នេះ​ទេ។

មេធាវី​របស់​កសិករ​រង​គ្រោះ គឺ​លោក កៅ ទី បាន​ស្នើ​សុំ​បន្ត​នីតិវិធី​សវនាការ​នេះ ប៉ុន្តែ​ចៅក្រម​ជម្រះ​ក្ដី លោក ឌុច គឹមស៊ន បាន​បដិសេធ។

មេធាវី​របស់​កសិករ​រង​គ្រោះ គឺ​លោក កៅ ទី បាន​មាន​ប្រសាសន៍​នៅ​ក្រៅ​តុលាការ​ថា ការ​ស្នើ​សុំ​ពន្យារ​ពេល​នេះ គឺ​ជា​លេស​ដើម្បី​គេចវេះ​របស់​ជន​ជាប់​ចោទ ៖ «លិខិត​របស់​ក្រសួង​យុត្តិធម៌​ដែល​អន្តរាគមន៍​ទៅ​សម្ដេច​នាយករដ្ឋមន្ត្រី​នោះ គឺ​សុំ​ឲ្យ​លើកលែង​ការ​ចោទ​ប្រកាន់​លើ​ជន​ជាប់​ចោទ​ឈ្មោះ ឌី ព្រឹម ដែល​ជា​ការ​ស្នើ​សុំ​កំហុស​ធ្ងន់ធ្ងរ​បំផុត ក្នុង​នាម​ជា​ក្រសួង​យុត្តិធម៌»

កសិករ​រង​គ្រោះ​ឈ្មោះ ហួត សារុំ អាយុ ៦៥​ឆ្នាំ នៅ​ក្នុង​ខណ្ឌ​ដង្កោ ជាយ​ទីក្រុង​ភ្នំពេញ បាន​ថែ្លង​នៅ​ខាង​ក្រៅ​តុលាការ​ថា តុលាការ​មិន​មាន​ឆន្ទៈ​ផ្ដន្ទាទោស​ជន​ជាប់​ចោទ ៖ «ខ្ញុំ​ប្រជាជន​ក្រីក្រ ខ្ញុំ​ពិបាក​ណាស់​ទម្រាំ​បាន​ពេល​មក​ម្តងៗ ដូច្នេះ​ហើយ​តុលាការ​ធ្វើ​ការងារ​អត់​ត្រឹមត្រូវ​អ៊ីចឹង វា​អត់​ប្រយោជន៍»

នេះ​គឺ​ជា​ការ​លើក​ពេល​សវនាការ​លើក​ទី​៣​ហើយ ដែល​មិន​បាន​ជម្រះ​ក្តី​លើ​សំណុំ​រឿង​ចោទ​ប្រកាន់​អំពើ​ពុករលួយ​នេះ តាំង​ពី​ឆ្នាំ​២០០៩​មក។

នៅ​ក្នុង​ពិធី​បើក​ការដ្ឋាន​សាងសង់​ស្ពាន​អាកាស​ទី​២ នៅ​ក្នុង​ទីក្រុង​ភ្នំពេញ លោក​នាយករដ្ឋមន្ត្រី ហ៊ុន សែន បាន​មាន​ប្រសាសន៍​នៅ​ឯ​សាកល​វិទ្យាល័យ​ភូមិន្ទ​ភ្នំពេញ នៅ​ថ្ងៃ​ទី​២៩ ខែ​ធ្នូ​នេះ​ថា លោកស្រី ឌី ព្រឹម ជា​សាច់​ញាតិ​របស់​លោក ប៉ុន្តែ​លោក​មិន​លូក​ដៃ​ចូល​ឡើយ ដោយ​ទុក​លទ្ធភាព​ឲ្យ​តុលាការ។

លោក​នាយករដ្ឋមន្ត្រី​បាន​ថ្លែង​ដូច្នេះ ៖ «ប៉ុន្មាន​ថ្ងៃ​មុន​ឭ​គេ​ថា មាន​ជី​ដូន​មួយ​លោក​នាយករដ្ឋមន្ត្រី​មួយ​រត់​ការ​រឿង​ស្អី​ណា​នេះ។ ដូច​គេ​ត្រូវ​កាត់​ទោស​ថ្ងៃ​ហ្នឹង កាត់​ទៅ កាត់​តាម​ច្បាប់។ អង្គ វង្សវឌ្ឍានា សរសេរ​សំបុត្រ​មក​ខ្ញុំ ខ្ញុំ​ទាត់​ចោល អត់​ទេ! ហ្នឹង​នៅ​ក្នុង​កញ្ចប់​សំណុំ​រឿង​មួយ គឺ​មិន​អាច​បំបែក​រឿង​មួយ​បាន​ទេ។ ជី​ដូន​មួយ​បង្កើត​ពិត​មែន ឌី ព្រឹម»

លោក សេង យៀន ជា​អគ្គនាយក​រង​នៃ​អគ្គនាយកដ្ឋាន​អធិការកិច្ច​របស់​ក្រសួង​អធិការកិច្ច ទំនាក់​ទំនង​សភា និង​ព្រឹទ្ធ​សភា ត្រូវ​បាន​លោក​នាយករដ្ឋមន្ត្រី ហ៊ុន សែន បាន​ដក​ហូត​ចេញ​ពី​តំណែង​កាល​ពី​ថៃ្ង​ទី​៣០ ខែ​កក្កដា ឆ្នាំ​២០០៩ កន្លង​ទៅ ក្រោយ​ពី​រដ្ឋាភិបាល​កម្ពុជា បាន​ស្រាវជ្រាវ​រក​ឃើញ​ថា បុរស​ខាង​លើ​នេះ​បាន​ទទួល​ប្រាក់​សំណូក ២​សែន​ដុល្លារ​អាមេរិក​ពី​ឈ្មួញ​ដី​ធ្លី ឈ្មោះ ឌី ព្រឹម ដើម្បី​ធ្វើ​របាយការណ៍​ក្លែង​បន្លំ​រដ្ឋាភិបាល ដើម្បី​រឹប​យក​ដី​ស្រែ​ចំនួន​ជាង ៥​ហិកតា​ពី​កសិករ​ឈ្មោះ ហួត សារុំ ទុក​លក់​ក្នុង​តម្លៃ​ជាង ៧​លាន​ដុល្លារ​អាមេរិក កាល​ពី​ចន្លោះ​ឆ្នាំ​២០០៨ និង​ឆ្នាំ​២០០៩ ប៉ុន្តែ​ការ​រត់​ការ​នោះ​មិន​បាន​សម្រេច​ឡើយ។

លោក សេង យៀន បាន​រង​ការ​ចោទ​ប្រកាន់​ដោយ​តុលាការ​ក្រុង​ភ្នំពេញ កន្លង​មក តាម​មាត្រា​ទី​៣៨ នៃ​ច្បាប់​ព្រហ្មទណ្ឌ​អន្តរកាល​សម័យ​អ៊ុនតាក់ ក្រោម​បទ​ស៊ី​សំណូក និង​លោកស្រី ឌី ព្រឹម បាន​រង​ការ​ចោទ​ប្រកាន់​តាម​មាត្រា​ទី​៥៨ ក្រោម​បទ​សូក​ប៉ាន់។

ឯកសារ​ចុះ​ថ្ងៃ​ទី​២៩ ខែ​មិថុនា ឆ្នាំ​២០០៩ ពី​ប្រធាន​ខុទ្ទកាល័យ​របស់​លោក​នាយករដ្ឋមន្រ្តី ហ៊ុន សែន លោក ហូ សិទ្ធី បាន​សុំ​ឲ្យ​ប្រធាន​សភា​ជាតិ លោក ហេង សំរិន អន្តរាគមន៍​លើក​លែង​ការ​ចោទ​ប្រកាន់​លើ​លោក សេង យៀន។

ឯកសារ​ចុះ​ថ្ងៃ​ទី​៩ ខែ​កញ្ញា ឆ្នាំ​២០១០ ដោយ​រដ្ឋមន្ត្រី​ក្រសួង​យុត្តិធម៌ លោក អង្គ វង្សវឌ្ឍានា បាន​សុំ​កិច្ច​អន្តរាគមន៍​ពី​លោក​នាយករដ្ឋមន្រ្តី ហ៊ុន សែន លើក​លែង​ការ​ចោទ​ប្រកាន់​លោកស្រី ឌី ព្រឹម។

លោក​នាយករដ្ឋមន្ត្រី ហ៊ុន សែន បាន​ចារ​ឆ្លើយ​តប​វិញ​ថា ទុក​ឲ្យ​តុលាការ​បន្ត​ចាត់ការ ប្រសិន​បើ​ ឌី ព្រឹម ត្រូវ​បាន​តុលាការ​បាន​រក​ឃើញ​ថា គ្មាន​កំហុស គឺ​ទុក​ឲ្យ​តុលាការ​ជា​អ្នក​លើកលែង​ការ​ចោទ​ប្រកាន់៕

ព័ត៌មាន (2)
Share

អ្នក​អាន​អនាមិក

សម្តេចនាយកពិតជាមានប្រសាសន៍ល្អមែន

Dec 29, 2010 07:24 PM

អ្នក​អាន​អនាមិក

តុលាការស្រុកខ្មែរល្អមែន!!!!!

Dec 29, 2010 07:23 PM

គេហទំព័រ​ទាំងមូល