លោកវេជ្ជបណ្ឌិត លី ពេញស៊ុន អនុប្រធាននៃមជ្ឈមណ្ឌលជាតិប្រយុទ្ធប្រឆាំងនឹងជំងឺអេដស៍ជំងឺសើស្បែកនិងកាមរោគនៃក្រសួងសុខាភិបាល មានប្រសាសន៍កាលពីយប់មិញក្នុងនាមជាវាគ្មិនកិតិ្តយសនៃនាទីវេទិកាអ្នកស្តាប់វិទ្យុអាស៊ីសេរីថា កម្ពុជាបច្ចុប្បន្នមានអ្នកផ្ទុកមេរោគអេដស៍និងអ្នកកើតអេដស៍ទាំងអស់ប្រមាណ៦៧០០០នាក់ និងថាការរើសអើងប្រឆាំងនឹងអ្នកជំងឺទាំងនោះនៅតែមាននៅឡើយនៅកម្ពុជា ប៉ុន្តែមានកម្រិតតិចជាងកាលពីឆ្នាំមុនៗ។
លោកវេជ្ជបណ្ឌិត លី ពេញស៊ុន បានមានប្រសាសន៍ថា ៖ «ខ្ញុំគិតទៅការរើសអើងវាមានលាយឡំជាមួយនឹងការភ័យខ្លាច ខ្លាចឆ្លងនោះណា៎។ កាលពីដំបូងៗមេរោគអេដស៍ឆ្លងមកស្រុកយើងតាំងពីដើមទសវត្សរ៍៩០នោះ មិនមែនត្រឹមតែប្រជាពលរដ្ឋទូទៅទេខ្លាច សូម្បីតែបុគ្គលិកផ្ដល់សេវាសុខភាពក៏ខ្លាចដែរ ខ្លាចឆ្លង វាលាយឡំជាមួយការរើសអើងហ្នឹង ប៉ុន្តែដោយសារជាបន្តបន្ទាប់ហ្នឹងយើងមានការបណ្ដុះបណ្ដាល មានការផ្សព្វផ្សាយច្រើនទៅ ការដែលខ្លាចឆ្លងនេះយើងឃើញថាបាត់បន្តិចៗម្ដង»។
ការរើសអើងរួមមានការបំបោះបង់អ្នកជំងឺចោល ប្រើពាក្យសម្ដីនិងអាកប្បកិរិយាមិនគប្បីលើអ្នកជំងឺជាដើម។ល។។
លោកវេជ្ជបណ្ឌិត លី ពេញស៊ុន ថ្លែងថា មានកត្តាសំខាន់ៗមួយចំនួនទៀតដែលជួយកាត់បន្ថយការរើសអើងនោះ រួមមានការកើនឡើងនូវសេវាកម្មជួយព្យាបាលបានដល់៩០% ដែលក្នុងនោះអ្នកខ្លះមានសុខភាពគ្រាន់បើឡើងវិញ ហើយវិលទៅប្រកបការងាររបស់គាត់បាន និងមានអ្នកខ្លះទៀតក៏បានចងក្រងគ្នាបង្កើតជាមណ្ឌលជាក្រុមមិត្តជួយមិត្ត ហ៊ានចេញមុខជាសាធារណៈថ្លែងអប់រំបន្ត ហើយកម្ពុជាក៏មានច្បាប់ប្រឆាំងនឹងការរើសអើងចំពោះអ្នកផ្ទុកមេរោគអេដស៍និងអ្នកកើតអេដស៍នៅក្នុងកិច្ចការងារដែរ។
លោកវេជ្ជបណ្ឌិត លី ពេញស៊ុន ថ្លែងបន្ថែមថា មេរោគអេដស៍អាចឆ្លងពីមនុស្សម្នាក់ទៅមនុស្សម្នាក់ទៀតបានតាមរបៀប៤យ៉ាងគឺ ៖ «តាមរយៈការរួមភេទដោយមិនបានប្រើស្រោមអនាម័យ។ មេរោគអេដស៍ក៏អាចឆ្លងពីមនុស្សម្នាក់ទៅមនុស្សម្នាក់តាមរយៈការចាក់ថ្នាំញៀន ប្រើប្រាស់ស៊ីរាំងរួមគ្នា មានន័យថា ដកស៊ីរាំងពីអ្នកដែលផ្ទុកមេរោគអេដស៍ចាក់លើអ្នកដែលមិនទាន់ឆ្លងគឺអាចឲ្យឆ្លងដែរ។ មេរោគអេដស៍ក៏អាចឆ្លងតាមរយៈការទទួលឈាមដែលមានមេរោគ ឈាមហ្នឹងមិនបានពិនិត្យច្បាស់លាស់។ ហើយមួយវិញទៀតគឺការចម្លងពីមាតាទៅទារក បើសិនជាស្ត្រីដែលមានគភ៌ម្នាក់មានផ្ទុកមេរោគអេដស៍ គាត់មានលទ្ធភាពចម្លងទៅកូនរបស់គាត់ មានបីដំណាក់កាល ទាំងក្នុងផ្ទៃ នៅដំណាក់កាលដែលឆ្លងទន្លេ ក៏ដូចជាដំណាក់កាលបំបៅទឹកដោះ»។
លោកវេជ្ជបណ្ឌិតមានប្រសាសន៍ថា ជំងឺអេដស៍គឺជាជំងឺឆ្លងរ៉ាំរ៉ៃប្រហាក់ប្រហែលនឹងជំងឺរ៉ាំរ៉ៃខ្លះទៀតដែរដែលត្រូវការកិច្ចព្យាបាលយូរអង្វែង។ សូមកុំយល់ថាឲ្យតែកើតអេដស៍គឺជាថ្ងៃបញ្ជប់នៃជីវិតរបស់លោកអ្នក។
លោកវេជ្ជបណ្ឌិត លី ពេញស៊ុន បញ្ជាក់ថា សូមកុំគិតដូច្នោះ ព្រោះថាបើលោកអ្នកមានផ្ទុកមេរោគអេដស៍ ប៉ុន្តែចេះថែរក្សាសុខភាពឲ្យបានត្រឹមត្រូវ ទទួលការជួយប្រឹក្សាផ្តល់យោបល់ គ្មានការរើសអើង ប្រើថ្នាំពន្យារជីវិតឲ្យបានទៀងទាត់ នោះលោកអ្នកអាចរស់នៅបានយូរអាចប្រកបការងារបានធម្មតា អាចថែទាំកូនចៅបានជាថ្មីឡើងវិញ។ តែទោះជាយ៉ាងនេះក្តីលោកវេជ្ជបណ្ឌិត លី ពេញស៊ុន រំឭកថា ការការពារគឺប្រសើរជាងការព្យាបាល។
លោកវេជ្ជបណ្ឌិតក៏សូមអំពាវនាវដល់ពលរដ្ឋទាំងអស់សូមមេត្តាកុំមានការរើសអើងប្រឆាំងនឹងអ្នកផ្ទុកមេរោគអេដស៍និងអ្នកកើតអេដស៍ ក្នុងន័យជួយឲ្យសង្គមកម្ពុជាប្រកបដោយក្តីករុណា មានចិត្តមនុស្សធម៌ ចំពោះអ្នកជំងឺទាំងអស់នោះ៕