មន្ត្រីក្រសួងអប់រំបានបញ្ជាក់ទៀតថា សៀវភៅស្តីពីគោលនយោបាយសុខភាពសិក្សានេះ គេបានរៀបចំចងក្រងតាំងពីឆ្នាំ២០០៦ មកម៉្លេះ តែដោយសារខ្វះខាតថវិកាទើបអូសបន្លាយមកដល់ពេលនេះ ប៉ុន្តែនៅក្នុងឆ្នាំ២០០៨នេះដោយមានការជួយឧបត្ថម្ភថវិកាពីសប្បុរសជនជប៉ុននៃខេត្តហេរ៉ូហ្សីម៉ា តាមរយៈទីភ្នាក់ងារសហប្រតិបត្ដិការអន្តរជាតិជប៉ុន (Jica) បានជួយបោះពុម្ពសៀវភៅនេះដែលសាកល្បងផ្សព្វផ្សាយជាលើកដំបូងចំនួន៥០០០ក្បាល។
ប្រធាននាយកដ្ឋានសុខភាពនៃក្រសួងអប់រំ យុវជន និងកីឡា លោក ប៉ែន សារឿន បានមានប្រសាសន៍ប្រាប់អ្នកយកព័ត៌មានវិទ្យុអាស៊ីសេរីថា នៅក្នុងសេចក្តីចែងរបស់សៀវភៅស្តីពីគោលនយោបាយសុខភាពសិក្សារបស់ក្រសួងអប់រំនោះ គេមានទិសដៅសំខាន់ៗជាច្រើនដែលរួមមានការអប់រំសុខភាព អនាម័យខ្លួនប្រាណ ការថែទាំបរិស្ថានសាលារៀន ហើយនិងការផ្តល់សេវាថែទាំសុខភាពចាំបាច់ជាដើម។
លោកបានបន្តថា ចំពោះកម្មវិធីផ្តល់សេវាថែទាំសុខភាពចាំបាច់នេះគឺកម្មវិធីមួយសម្រាប់ជួយសម្រួលដល់សិស្សដែលមានករណីជំងឺណាមួយកើតឡើងនៅក្នុងអំឡុងពេលម៉ោងដែលគេកំពុងតែរៀនសូត្រនៅក្នុងថ្នាក់ជាដើម ដូចជាជួយបញ្ជូនទៅកាន់មន្ទីរពេទ្យ មណ្ឌលសុខភាព ឬប៉ុស្តិ៍សុខភាព ហើយដែលការព្យាបាលទាំងនោះនឹងមិនតម្រូវឲ្យសិស្សធ្វើការបង់ថ្លៃឡើយ។
លោក ប៉ែន សារឿន បានមានប្រសាសន៍ថា ៖ «ហើយមណ្ឌលសុខភាពក៏បានសហការជាមួយយើង ឲ្យធ្វើការងារហ្នឹង គឺថាគ្រូនាំសិស្សឈឺទៅដល់មន្ទីរពេទ្យ ផ្ដល់ការព្យាបាលដោយឥតគិតថ្លៃ ហើយដល់ពេលសិស្សឈឺហើយ ស្រាប់តែយើងនាំក្មេងៗទៅផ្ទះតែម្ដង ទៅផ្ទះសួរថា ឪពុកម្ដាយមានលទ្ធភាពណាទៅព្យាបាលកូន? ទាល់តែយើងយកទៅមន្ទីរពេទ្យ។ ហើយមន្ទីរពេទ្យគួរតែមណ្ឌលសុខភាពភូមិ ឃុំ ឬមួយស្រុក គួរតែព្យាបាលឲ្យសិស្សចាំបាច់ដែលមិនបង់លុយ។ គោលដៅសំខាន់គឺគោលនយោបាយរបស់យើងគ្របដណ្ដប់នៅគ្រប់សាលាបឋមសិក្សានិងមធ្យមសិក្សាទូទាំងប្រទេសតែម្ដង»។
មន្រ្តីក្រសួងអប់រំ យុវជន និងកីឡា បានប្រាប់ឲ្យដឹងផងដែរថា នៅក្នុងគោលនយោបាយសុខភាពសិក្សា ដូចជាការផ្តល់សេវាថែទាំសុខភាពចាំបាច់ដល់សិស្សានុសិស្សដូចបានបញ្ជាក់មកនេះ គឺក្នុងថ្នាក់រៀននីមួយៗគេនឹងតម្រូវឲ្យមានសៀវភៅតាមដានសុខភាពសិស្ស ដែលការងារនេះក្រសួងអប់រំបានធ្វើការសាកល្បងរួចហើយនៅក្នុងសាលារៀនមួយចំនួននៅក្នុងស្រុកពួក ខេត្តសៀមរាប ដោយមានការសហការពីខេត្តហេរ៉ូហ្សីម៉ាជប៉ុនតាមរយៈអង្គការ Jica ។
ប្រធានការិយាល័យនៃមន្ទីរអប់រំខេត្តសៀមរាប លោក អ៊ុង សិរីឌី បានប្រាប់ឲ្យដឹងដែរថា នៅក្នុងស្រុកពួកដែលមានសាលារៀនបានធ្វើការអនុវត្តនូវគោលនយោបាយសុខភាពសិក្សានោះ គឺបានសហការជាមួយមណ្ឌលសុខភាពសសរស្តម។
លោកបានបន្តថា ចំពោះកម្មវិធីសហការជាមួយខេត្តហេរ៉ូហ្សីម៉ាជប៉ុនតាមរយៈអង្គការ Jica នោះ មកដល់ពេលនេះគេបានបញ្ចប់ហើយ ក៏ប៉ុន្តែទោះជាយ៉ាងនេះក្តីគឺមន្ទីរអប់រំខេត្ត និងមន្ទីរសុខាភិបាល ព្រមទាំងអាជ្ញាធរមូលដ្ឋាន ហើយនិងសហគមន៍បានរួមសហការគ្នាបន្តការងារនេះដដែល។
លោកបានបន្តថា ជាលទ្ធផលយ៉ាងណានោះក៏មិនទាន់ហ៊ានអះអាងថាដូចម្តេចដែរ ក៏ប៉ុន្តែបន្ទាប់ពីបានសាកល្បងគោលនយោបាយសុខភាពសិក្សានោះ គេឃើញមានការប្រែប្រួលខ្លះ។
លោក អ៊ុង សិរីឌី បានឲ្យដឹងថា ៖ «ការអប់រំសម្រាប់ទាំងអស់ ហើយទាំងអស់គ្នាសម្រាប់ការអប់រំនេះជាទ្រឹស្ដី ជាគោលការណ៍របស់យើង ប៉ុន្តែគ្រាន់តែថា ការអនុវត្តជាក់ស្ដែងក៏យើងនៅខ្វះចន្លោះដោយសារតែមធ្យោបាយបំពេញការងារ ហើយនិងបទពិសោធន៍ កម្រិតយល់ដឹងរបស់យើង វាមិនទាន់បានសុក្រឹត ឬក៏បំពេញបំណងដែលយើងចង់បាន១០០%ទេ។ ប៉ុន្តែវាបានល្អប្រសើរជាងមុនបណ្ដើរៗហើយ។ ប្រជាជន សិស្សានុសិស្ស លោកគ្រូ អ្នកគ្រូ យល់ដឹងអំពីគេហៅថា អាទិភាពបឋមនូវក្នុងការជួយទាក់ទងទៅនឹងការអប់រំសុខភាព មណ្ឌលសុខភាពនៅមូលដ្ឋានផ្ទាល់ ដែលភ្នាក់ងាររបស់ក្រសួងសុខាភិបាលប្រចាំមូលដ្ឋានហ្នឹង ជួយលើកម្មវិធីទាក់ទងទៅនឹងការសង្រ្គោះបន្ទាន់ ទាក់ទងនឹងកម្មវិធីបង្ការផ្សេងៗ គឺថាគេធ្វើទំនាក់ទំនងហ្នឹងគឺសាលារៀនទាក់ទងនឹងមណ្ឌលសុខភាពធ្វើអន្តរាគមន៍ភ្លាមៗ ជួយសង្រ្គោះកុមារ ប៉ុន្តែនៅក្នុងកម្រិតបឋមទេ ដល់កម្រិតធ្ងន់ៗ អាហ្នឹងទាមទារត្រូវបញ្ជូនទៅមន្ទីរពេទ្យបង្អែកស្រុករបស់ខេត្តរបស់អី»។
បញ្ជាក់ប្រាប់ពីបញ្ហានេះដែរ ប្រធានការិយាល័យស្រុកប្រតិបត្តិអង្គជុំ ខេត្តសៀមរាប លោក ម៉ក់ សំអឿន បានមានប្រសាសន៍ថា បុគ្គលិកនៅតាមមណ្ឌលសុខភាពនៃស្រុកពួកបាននិងកំពុងចូលរួមធ្វើការព្យាបាលសិស្សានុសិស្សតាមគោលនយោបាយសុខភាពសិក្សានោះ ដោយបានណែនាំជាដំបូងឲ្យសាលានីមួយៗក្នុងស្រុកពួកនោះ បង្កើតនូវសៀវភៅតាមដានសុខភាពរបស់សិស្ស។
លោកបន្តថា នៅក្នុងពេលបវេសនកាលខាងមុខនេះដែលសិស្សានុសិស្ស និងលោកគ្រូ អ្នកគ្រូ បានចូលរៀននិងធ្វើការបង្រៀនវិញនោះ គឺការិយាល័យស្រុកប្រតិបត្តិអង្គជុំនឹងរៀបចំកម្មវិធីមួយទៀតដោយផ្តល់វគ្គបណ្ដុះបណ្ដាលសង្គ្រោះដំបូងដល់គ្រូបង្រៀនក្នុងសាលារៀនដែលបានអនុវត្តកម្មវិធីគោលនយោបាយសុខភាពសិក្សានោះកន្លងមក។
លោក ម៉ក់ សំអឿន បានមានប្រសាសន៍ថា ៖ «ឧទាហរណ៍ថា ក្មេងហ្នឹងវារត់ទៅដួលបាក់ដៃ យើងត្រូវធ្វើយ៉ាងម៉េច ហូរឈាមយើងត្រូវជូត រុំយ៉ាងម៉េចអីអ៊ីចឹង ហើយយើងនឹងផ្ដល់សម្ភារៈមួយចំនួនទុកតម្កល់តាមសាលាហ្នឹងឯង។ សម្ភារៈទាំងនោះយើងមានលទ្ធភាពផ្ដល់ជូនដោយឥតគិតថ្លៃទេ ពីព្រោះអាហ្នឹងជាសម្ភារៈរបស់រាជរដ្ឋាភិបាល ថ្នាំរបស់រាជរដ្ឋាភិបាលយើង»។
ប្រធានការិយាល័យស្រុកប្រតិបត្តិអង្គរជុំ ខេត្តសៀមរាប លោក ម៉ក់ សំអឿន បានប្រាប់ឲ្យដឹងថែមទៀតដែរថា ការជួយសង្គ្រោះឬព្យាបាលកុមារសិស្សានុសិស្សក្នុងសាលារៀនរហូតមកដល់ពេលនេះគេមិនទាន់បានធ្វើរបាយការណ៍ណាមួយថា មានចំនួនប៉ុន្មាននាក់ដែរទេ ដោយគ្រាន់តែដឹងខ្លះថា ក្រោយពីបានសាកល្បងអនុវត្ដគោលនយោបាយសុខភាពសិក្សាមួយរយៈមកនោះ គឺឃើញមានសិស្សជាច្រើននាក់បានចូលមកព្យាបាលនៅមណ្ឌលសុខភាពដោយសារតែមិនមានតម្រូវការឲ្យគេបង់ថ្លៃព្យាបាលនោះ។
ប្រធាននាយកដ្ឋានសុខភាពនៃក្រសួងអប់រំ យុវជន និងកីឡា លោក ប៉ែន សារឿន បានបញ្ជាក់ប្រាប់ដែរថា សុខភាពគឺជាបញ្ហាចម្បងបំផុតដែលរួមចំណែកជួយលើកកម្ពស់វិស័យអប់រំឲ្យមានគុណភាពល្អ ហេតុដូច្នេះហើយក្រសួងនឹងធ្វើការចែកចាយសៀវភៅស្តីពីគោលនយោបាយសុខភាពសិក្សា ដែលបោះពុម្ពផ្សាយជាលើកដំបូងចំនួន៥០០០ក្បាលនោះទៅដល់មន្ទីរអប់រំខេត្តស្រុកហើយ បន្ទាប់មកមន្ទីរអប់រំខេត្តស្រុកនឹងធ្វើការផ្សព្វផ្សាយបន្ត ទម្រាំក្រសួងមានថវិកាគ្រប់គ្រាន់នឹងធ្វើការបោះពុម្ពសៀវភៅនោះជាថ្មីទៀត ដើម្បីផ្ដល់ជូនឲ្យបានគ្រប់សាលារៀននៅទូទាំងប្រទេសកម្ពុជា៕