តំណាងសហគមន៍ភូមិមានជ័យ ឃុំស្រែចារ គឺលោក សារ៉ែន កែត បានឲ្យដឹងថាជនជាតិភាគតិចដែលត្រូវបានក្រុមហ៊ុនស៊ីអាយវី កំពុងចុះអភិវឌ្ឍប៉ះពាល់លើដីរបស់ខ្លួននោះ កំពុងតែរិះរកវិធានការទប់ទល់។
លោក សារ៉ែន កែត បានឲ្យដឹងថា ៖ «បើសិនជាអស់លោកមិនព្រមស្ដាប់ មិនព្រមចរចាដោយយុត្តិធម៌ទេ ប្រហែលជាខ្ញុំហ្នឹងនាំប្រជាពលរដ្ឋ ទៅធ្វើបាតុកម្មយ៉ាងធំមួយ ដេញក្រុមហ៊ុនហ្នឹងចេញ។ ឥឡូវស្រាប់តែមានអាត្រាក់លេចទៅឈូសខាងលិចទៀតហើយ»។
ការអះអាងនេះបានកើតមានឡើងបន្ទាប់ពីលោក សារ៉ែន កែត បានឲ្យដឹងថា ក្រុមហ៊ុនស៊ីអាយវីបានចាត់វិធានការប្ដឹងប្រជាពលរដ្ឋ៣នាក់ទៅតុលាការ ឲ្យសងប្រាក់ចំនួន១០ម៉ឺនដុល្លារ ដោយចោទថាប្រជាពលរដ្ឋទាំងនោះជាក្រុមអនាធិបតេយ្យរារាំងមិនឲ្យក្រុមហ៊ុនចូលអភិវឌ្ឍបាន។
ប្រជាពលរដ្ឋម្នាក់គឺលោក ប៊ុន ថេន ក្នុងចំណោមប្រជាពលរដ្ឋ៣នាក់ដែលជាប់ចោទបានបំភ្លឺថា លោកនឹងប្ដឹងចោទប្រកាន់ពីក្រុមហ៊ុននោះវិញ។
លោក ប៊ុន ថេន បានមានប្រសាសន៍ថា ៖ «បើសិនខ្ញុំមានរំលោភដីក្រុមហ៊ុន ខ្ញុំទទួលខុសត្រូវមុខច្បាប់តែម្ដង។ ដែលមានភស្តុតាងគ្រប់គ្រាន់ ខ្ញុំប្ដឹងក្រុមហ៊ុនហ្នឹងវិញ ឲ្យជំងឺចិត្តដែលបរិហារកេរ្តិ៍ខ្ញុំវិញ។ មកនេះ គេមកប្លន់ដីប្រជាពលរដ្ឋ មិនមែនមកធ្វើដីព្រៃសម្បទានរបស់រដ្ឋាភិបាលដែលសម្បទានឲ្យទេ»។
លោក ចំរើន និងលោក សារី អះអាងតាមរយៈសហគមន៍ថា នឹងធ្វើប្រតិកម្មតបតក្រោយពេលដែលបានទទួលដីកាកោះអញ្ជើញ។
អ្នកស្រុករស់នៅក្នុងភូមិជាមួយបានអះអាងថា សារី និង ចំរើន បានកាន់កាប់ដីដែលក្រុមហ៊ុនចង់យកទៅអភិវឌ្ឍនោះអស់រយៈកាលប្រមាណ១០ឆ្នាំមកហើយ។ ឯលោក ប៊ុន ថេន ទើបទទួលកាន់កាប់ដីនេះនៅឆ្នាំ២០០៧ទេ ដោយទទួលការផ្ទេរសិទ្ធិបន្តពីអ្នកស្រី បូ មាំ ដែលកាន់កាប់ដីនោះ តាំងពីឆ្នាំ១៩៧៩មកម្ល៉េះ។
ប្រជាពលរដ្ឋនិងសហគមន៍បានអះអាងថា ពុំមានសង្ឃឹមទៅលើអាជ្ញាធរក្នុងការជួយអន្តរាគមន៍ឡើយ។
អភិបាលស្រុកស្នួលគឺលោក អ៊ីវ សាភុម បានអះអាងថាក្រុមការងារខេត្តនិងស្រុកកំពុងតែចុះពិនិត្យនៅតំបន់កើតហេតុផ្ទាល់ ដើម្បីរកការពិតក្នុងការសម្រុះសម្រួល។
លោក អ៊ីវ សាភុម បានឲ្យដឹងថា ៖ «យើងអាចសម្របសម្រួលគ្នាបាន យើងសម្របសម្រួលគ្នាជាមួយក្រុមហ៊ុន។ បើសម្របសម្រួលមិនបានទេ អាហ្នឹងឲ្យគាត់ដោះស្រាយតាមផ្លូវច្បាប់ទៅ»។
ក្រុមហ៊ុនស៊ីអាយវីមិនអាចទំនាក់ទំនងសុំការបំភ្លឺពីការប្ដឹងចោទប្រកាន់នោះបានឡើយ ប៉ុន្តែប្រជាពលរដ្ឋនិងតំណាងសហគមន៍បានអះអាងថា ប្រជាពលរដ្ឋ៣នាក់ដែលជាប់ចោទ គឺបានទទួលលិខិតបណ្ដឹងនោះម្នាក់មួយច្បាប់។
ក្រុមហ៊ុនស៊ីអាយវីបានទទួលការសិក្សាលើដីជាង១ពាន់ហិកតាដើម្បីដាំដុះដំណាំកសិឧស្សាហផល៕