លោក ជុំ ម៉ី ថ្លែងដូច្នេះថា ៖ «ខ្ញុំចង់ដឹងថា រឿង សេអ៊ីអា, កាសេបេ ហ្នឹងវានៅប៉ុន្មានម៉ឺននាក់ នៅប៉ុន្មានលាននាក់ទៀត? ខ្ញុំចង់សួរលោក ឌុច»។
លោក ជុំ ម៉ី ជាសាក្សីទីពីរហើយដែលបានចូលខ្លួនមកបំភ្លឺក្នុងសវនាការជាសាធារណៈ បានមានប្រសាសន៍ថា គុកទួលស្លែងជាទីដែលលោកទទួលបានតែពាក្យគ្រោតគ្រាតនិងទារុណកម្មយ៉ាងធ្ងន់ធ្ងរ។
លើសពីនេះ លោក ជុំ ម៉ី បានបន្តថា ទារុណកម្មដែលរូបលោកពិបាកទ្រាំបំផុតនោះគឺការឆក់ខ្សែភ្លើងនិងការដកក្រចកជើង។
ចំពោះការឆក់ខ្សែភ្លើង លោក ជុំ ម៉ី បានបញ្ជាក់ថា ពួកឆ្មាំគុកខ្មែរក្រហមបានប្រើចរន្តអគ្គិសនី២២០វ៉ុល ចេញពីជញ្ជាំងតែម្ដង គឺមិនមែនជាចេញពីឌីណាម៉ូដែលរវៃដោយដៃដូចការអះអាងរបស់ ឌុច នោះទេ ៖ «ឆក់ខ្សែភ្លើងខ្ញុំហ្នឹង ខ្ញុំសន្លប់អត់ដឹងខ្លួនទេ ភ្នែកយើងចេញសុទ្ធតែភ្លើងមកតែម្ដង»។
និយាយអំពីការឈឺចាប់ដែលគាត់បានឆ្លងកាត់នៅមន្ទីរស-២១ លោក ជុំ ម៉ី បានបញ្ចេញឈ្មោះជនដៃដល់ដែលបានវាយដំនិងធ្វើទារុណកម្មចំពោះរូបលោក ៖ «អ្នកវ៉ៃហ្នឹង សូមទោស! ឈ្មោះវា អាសេង អាទិត្យ អាហូ ។ តែឥឡូវតាមដែលខ្ញុំស្រាវជ្រាវទៅថា ៣នាក់ហ្នឹងងាប់ទាំងបីនាក់។ ហ្នឹងបានខ្ញុំជម្រាបលោក ឌុច ចុះ បញ្ហាហ្នឹងសំណាងហើយលោក ឌុច អត់វ៉ៃខ្ញុំ បើលោក ឌុច វ៉ៃខ្ញុំ លោក ឌុច អត់មានឃើញពន្លឺថ្ងៃទេ»។
ការប្រើសម្ដីលាយឡំនឹងការឈឺចាប់របស់លោក ជុំ ម៉ី ទៅកាន់ ឌុច បានធ្វើឲ្យប្រធានចៅក្រមអង្គជំនុំជម្រះនៃសាលាក្ដីខ្មែរក្រហម គឺលោក និល ណុន ធ្វើការរំឭកមិនឲ្យលោក ជុំ ម៉ី ប្រើប្រាស់នូវពាក្យសម្ដីដែលប៉ះពាល់ដល់ជនដែលត្រូវចោទប្រកាន់នៅក្នុងតុលាការ។
លោក និល ណុន ថ្លែងដូច្នេះថា ៖ «ហេតុដែលកើតមានឡើងជាក់លាក់ដែលអ៊ំបានលើក គឺជាការត្រឹមត្រូវណាស់ ប៉ុន្តែមិនចង់បានត្រង់ថានិយាយទៅប៉ះពាល់បុគ្គលណាមួយមានលក្ខណៈមិនត្រឹមត្រូវ»។
លោក ជុំ ម៉ី បានអះអាងថា រូបលោកត្រូវបានគេចាប់ខ្លួននិងបញ្ជូនមកកាន់គុកទួលស្លែងនៅថ្ងៃទី២៨ ខែតុលា ឆ្នាំ១៩៧៨ ហើយមួយអាទិត្យក្រោយមក ក្រចកមេជើងទាំងពីររបស់លោកត្រូវបានគេដកមួយថ្ងៃម្ខាងៗ ក្នុងទារុណកម្មដើម្បីសួរចម្លើយ ៖ «យកដង្កាប់ហ្នឹងមកមួលក្រចកមេជើងខ្ញុំហ្នឹង អត់ដាច់ វាកន្រ្តាក់ ជើងខ្ញុំញ័រ»។
សាក្សីរូបនេះបានបញ្ជាក់ថា រូបលោកបានឆ្លងផុតពីការធ្វើទារុណកម្មសព្វបែបយ៉ាង បន្ទាប់ពីលោកព្រមឆ្លើយសារភាពនិងឆ្លើយដាក់អ្នកដទៃ។
លោក ជុំ ម៉ី ក៏បានរៀបរាប់ឲ្យដឹងផងដែរអំពីដំណើរជីវិតក្រោយពេលដែលលោកបានចេញពីគុកទួលស្លែង និងគ្រាចុងក្រោយដែលលោកបានឮសំឡេងភរិយាដើមរបស់លោក ៖ «វាបាញ់រះទៅលើគ្រួសារខ្ញុំហ្នឹងរ៉ាវៗ ខែភ្លឺ គ្រួសារខ្ញុំស្រែក ប៉ាអាភាពអើយរត់ទៅ គេបាញ់ខ្ញុំហើយៗ»។
សូមជម្រាបជូនថា លោក ជុំ ម៉ី ក៏បានដាក់ពាក្យធ្វើជាភាគីដើមបណ្ដឹងរដ្ឋប្បវេណីផងដែរ ហើយខណៈដែលលោករៀបរាប់ជូនអង្គសវនាការ ឌុច បានអង្គុយស្ដាប់ក្នុងលក្ខណៈយកចិត្តទុកដាក់៕