សកម្មជន​ការពារ​ធនធាន​ជលផល​បារម្ភ​ពី​ផល​ត្រី​ថយ​ចុះ

សកម្មជន​ការពារ និង​អភិរក្ស​ធនធាន​ជលផល​នៅ​ក្នុង​ប្រទេស​កម្ពុជា នៅ​ថ្ងៃ​ទី​៧ ខែ​មេសា ឆ្នាំ​២០១១ បាន​សម្ដែង​ការ​ព្រួយ​បារម្ភ​យ៉ាង​ខ្លាំង អំពី​ផល​ត្រី​ទឹក​សាប និង​ទឹក​ប្រៃ បាន​ថយ​ចុះ​យ៉ាង​ច្រើន ដោយសារ​ការ​ប្រើប្រាស់​ឧបករណ៍​នេសាទ​ខុស​ច្បាប់ ការ​កាប់​បំផ្លាញ​ព្រៃ​លិច​ទឹក និង​មាន​កំណើន​អ្នក​នេសាទ​ច្រើន​ជាង​ឆ្នាំ​មុនៗ។
ដោយ សុខ សេរី
2011-04-07
Share
សិក្ខាសាលា ៣០៥ កិច្ច​ពិភាក្សា​រវាង​សកម្មជន​ការពារ​ធនធាន​ជលផល និង​តំណាង​សហគមន៍​អ្នក​នេសាទ​ទឹក​សាប និង​ទឹក​ប្រៃ ស្ដីពី​ស្ថានភាព​ធនធាន​ជលផល​ទឹក​សាប និង​សមុទ្រ នា​រាជធានី​ភ្នំពេញ នៅ​ថ្ងៃ​ទី​៧ ខែ​មេសា ឆ្នាំ​២០១១។
RFA/Sok Serey

ការ​ព្រួយ​បារម្ភ​នេះ​បាន​ស្ដែង​ចេញ​នៅ​ក្នុង​កិច្ច​ពិភាក្សា​មួយ​រវាង​សកម្មជន​ការពារ​ធនធាន​ជលផល និង​តំណាង​សហគមន៍​អ្នក​នេសាទ​ទឹក​សាប និង​ទឹក​ប្រៃ មក​ពី​ខេត្ត​នៅ​ជុំវិញ​បឹង​ទន្លេ​សាប ទន្លេ​មេគង្គ និង​ខេត្ត​នៅ​តាម​ឆ្នេរ​សមុទ្រ​កម្ពុជា នៅ​ថ្ងៃ​ទី​៧ ខែ​មេសា ឆ្នាំ​២០១១ នៅ​ក្នុង​ទីក្រុង​ភ្នំពេញ។

កិច្ច​ពិភាក្សា​នេះ​បាន​ទទូច​សុំ​ឲ្យ​អ្នក​សារព័ត៌មាន​រាយការណ៍​ព័ត៌មាន​ឲ្យ​បាន​ច្រើន ផ្ដោត​លើ​ស្ថានការណ៍​ធនធាន​ជលផល​ដែល​រង​ការ​នេសាទ​ខុស​ច្បាប់ ដើម្បី​ការពារ និង​អភិរក្ស​ធនធាន​ជលផល។

តំណាង​ប្រជា​នេសាទ និង​ជា​ប្រធាន​សម្ព័ន្ធ​ប្រជា​នេសាទ​កម្ពុជា លោក ទ្បុង សុចែត បាន​មាន​ប្រសាសន៍​ថា អ្នក​នេសាទ​បាន​កើន​ឡើង​ច្រើន និង​បាន​សម្រុក​ទៅ​នេសាទ​ត្រី​នៅ​តំបន់​ឆ្ងាយៗ និង​ទឹក​ជ្រៅ​នៅ​បឹង​ទន្លេ​សាប ដោយសារ​ខ្សត់​ត្រី។

លោក​បន្ត​ថា ៖ «យើង​មើល​ឃើញ​ទៅ​គាត់​ប្រើ​សម្ភារៈ​ច្រើន សូម្បី​តែ​ឧបករណ៍​នេសាទ សូម្បី​តែ​ទូក​ក្ដារ កាណូត អត់​មាន​កាណូត​ទៅ​នេសាទ​អត់​បាន​ទៀត​ឥឡូវ ព្រោះ​មាន​ការ​ប្រកួតប្រជែង​គ្នា។ ដូច​កន្លែង​ណា​មាន​ត្រី​ច្រើន​ទៅ​កន្លែង​ហ្នឹង អ៊ីចឹង​ប្រកួតប្រជែង​គ្នា។ ទៅ​មិន​ទាន់​គ្នា​អត់​ទៀត»

តំណាង​សម្ព័ន្ធ​ប្រជា​នេសាទ​នៅ​តំបន់​ឆ្នេរ​សមុទ្រ លោកស្រី ព្រាប ចន្ត្រី បាន​មាន​ប្រសាសន៍​ថា អ្នក​នេសាទ​មួយ​ចំនួន​បាន​ប្រើប្រាស់​ឧបករណ៍​នេសាទ​ទំនើបៗ និង​ក្រទ្បា​ញឹក​ចាប់​ត្រី​តូចៗ​នៅ​ក្នុង​សមុទ្រ ៖ «ពី​ដើម​ការ​នេសាទ​លក្ខណៈ​គ្រួសារ គឺ​គាត់​មាន​ឧបករណ៍​នេសាទ​ចំនួន​តែ ៣​កញ្ចប់​ទេ គឺ​មង​របស់​គាត់​តែ ៣​កញ្ចប់​ទេ គាត់​អាច​រក​ទទួល​ទាន​បាន ហើយ​នៅ​សល់​ខ្លះ តែ​បច្ចុប្បន្ន​នេះ​គាត់​មាន​ឧបករណ៍​ច្រើន ប៉ុន្តែ​ចេញ​ទៅ​ខ្វះខាត​ថ្លៃ​សាំង​ទៀត»

ប្រភព​ពី​សកម្មជន​ការពារ​ធនធាន​ជលផល​បាន​ឲ្យ​ដឹង​ថា នៅ​ក្នុង​ប្រទេស​កម្ពុជា មាន​សហគមន៍​អ្នក​នេសាទ​សរុប​ចំនួន ៤៦៩ ទាំង​ទឹក​សាប និង​ទឹក​ប្រៃ។ មាន​ប្រជាពលរដ្ឋ​រស់​នៅ​ពឹង​ផ្អែក​ទាំង​ស្រុង​លើ​ធនធាន​ជលផល​ចំនួន​ជាង ១​លាន​នាក់​កន្លះ និង​ប្រជាពលរដ្ឋ​រស់​នៅ​ពឹង​ផ្អែក​លើ​មុខ​របរ​កសិកម្ម​ផង និង​នេសាទ​បន្ទាប់បន្សំ​ផង​ចំនួន ៤​លាន​នាក់។

ប្រធាន​រដ្ឋបាល​ជលផល​នៃ​ក្រសួង​កសិកម្ម រុក្ខា​ប្រមាញ់ និង​នេសាទ លោក ណៅ ធួក បាន​មាន​ប្រសាសន៍​ពន្យល់​ថា ស្ថានការណ៍​ធនធាន​ជលផល​មិន​អាក្រក់​ដូច​ការ​អះអាង​នោះ​ទេ ៖ «គាត់​អត់​បាន​មើល​ថា តើ​ផល​ត្រី​ហ្នឹង​យ៉ាង​ម៉េច​ទេ? ឆ្នាំ​នេះ​បើ​និយាយ​មែន​ទែន អ្នក​នេសាទ​គ្រួសារ​នៅ​បឹង​ទន្លេ​សាប​ហ្នឹង ចាប់​បាន​កើន​ទ្បើង​១​ជា​២​ក៏​មាន​ដែរ អ្នក​នៅ​ឆ្នុក​ទ្រូ ហើយ​ការ​ប្រើ​ឧបករណ៍​ក្រទ្បា​ញឹក គឺ​ថយ​ច្រើន​ណាស់ ព្រោះ​យើង​បង្ក្រាប​បាន​ច្រើន​ណាស់»

លោក​បាន​បញ្ជាក់​ថា ធនធាន​ត្រី​ដែល​ប្រមូល​បាន​នៅ​ឆ្នាំ​២០១០ កន្លង​ទៅ គឺ​មាន​ចំនួន​សរុប ៥៥៥​ពាន់​តោន នៅ​ក្នុង​នោះ​មាន​ត្រី​ប្រៃ​ជាង ៧៥​ពាន់​តោន និង​ត្រី​ទឹក​សាប ៤០៥​ពាន់​តោន និង​ត្រី​ចិញ្ចឹម​ចំនួន ៦០​ពាន់​តោន។ ប្រៀបធៀប​ឆ្នាំ​២០០៩ កន្លង​ទៅ គឺ​ផល​ត្រី​ទឹក​ប្រៃ​ប្រមូល​បាន​ចំនួន ៧៥​ពាន់​តោន ត្រី​ទឹក​សាប​ចំនួន ៤៩៥​ពាន់​តោន និង​ត្រី​ចិញ្ចឹម​ចំនួន ៥០​ពាន់​តោន។

នៅ​ឆ្នាំ​២០១០ កន្លង​មក រដ្ឋបាល​ជលផល​បាន​បង្ក្រាប​បទល្មើស​នេសាទ​ខុស​ច្បាប់​ចំនួន​ជាង ៨.០០០​ករណី ចាប់​ខ្លួន​ជនល្មើស​ចំនួន ៧៣​នាក់ និង​ជនសង្ស័យ​ចំនួន ១៤៥​នាក់ បាន​រង​ការ​ប្តឹង​ទៅ​តុលាការ៕

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល