បណ្ដាញអ្នកនេសាទតំបន់ឆ្នេរសមុទ្ទជួបគ្នារកយុទ្ធសាស្ត្រទប់ស្កាត់បទល្មើស

តំណាងបណ្ដាញប្រជានេសាទ និងសហគមន៍នេសាទ ក្នុងតំបន់ទឹកប្រៃចំនួន ៣ ខេត្ត គឺខេត្តកំពត ខេត្តព្រះសីហនុ និងខេត្តកោះកុង បានមកជួបប្រជុំគ្នា នៅថ្ងៃ ទី ២៨ កក្កដា នៅខេត្តព្រះសីហនុ ដើម្បីលើកឡើងពីបញ្ហាបទល្មើសនេសាទអនាធិបតេយ្យក្នុងដែនសមុទ្ទខ្មែរ ដែលពុំមានវិធានការបង្ក្រាបពីអាជ្ញាធរឲ្យបានគ្រប់គ្រាន់នៅឡើយ។

ដោយ ខែ សុណង
2011-07-28

០៩-កក្កដា-២០១១៖ ទូកឌុនរបស់អ្នកប្រព្រឹត្តបទល្មើសនេសាទជនជាតិវៀតណាម នៅតំបន់កោះខ្យង ស្រុកព្រៃនប់ ខេត្តព្រះសីហនុ។

RFA/Khe Sonorng

បណ្ដាញប្រជានេសាទតំបន់ឆ្នេរ ខេត្តកំពត ខេត្តកោះកុង និងខេត្តព្រះសីហនុ បានមកជួបជុំគ្នា នៅទីស្នាក់ការអង្គការសម្ពន្ធភាពដើម្បីអភិរក្សធនធានជលផល ហៅកាត់ថា ហ្វាកត៍ (FACT) ដើម្បីរិះរកយុទ្ធសាស្ត្រទប់ស្កាត់បទល្មើស និងពង្រឹងកិច្ចសហការជាមួយមន្ត្រីជំនាញ ដែលពាក់ព័ន្ធ។

លោក ឡោ ឈាន បណ្ដាញប្រជានេសាទតំបន់ឆ្នេរខេត្តកំពត កោះកុង និងខេត្តព្រះសីហនុ ថ្លែងនៅក្នុងកិច្ចប្រជុំបណ្ដាញប្រជានេសាទនៅតំបន់ឆ្នេរ ថ្ងៃទី២៨ កក្កដាថា នៅខេត្តកំពត បញ្ហានេសាទខុសច្បាប់ដោយប្រើឧបករណ៍ប្លែកៗ ពីសំណាក់ជនជាតិនៃប្រទេសជិតខាង និងអ្នកមានធនធានទ្រព្យសម្បត្តិបច្ចុប្បន្ន ពុំបានចុះថយទេ។

លោកថាកន្លងមក សហគមន៍ ក៏ដូចជាបណ្ដាញប្រជានេសាទ ធ្លាប់លើកឡើងពីទុកកង្វល់នេះជូនអាជ្ញាធរពាក់ព័ន្ធដែរ ក៏ប៉ុន្តែ ពុំឃើញមានការបង្ក្រាបឲ្យមានប្រសិទ្ធភាពទេ។ រីឯអ្នកប្រព្រឹត្តបទល្មើសនេសាទនៅតែបន្តធ្វើសកម្មភាពដដែល។

លោក ឡោ ឈាន ៖ «បទល្មើស គឺត្រូវកើនឡើងមិនមែនថយទេ ដូចជាឧបករណ៍នេសាទក៏វាមានទំនើបៗ ច្រើនដែរ។ ខុសច្បាប់ដូចជា មងក្រឡាញឹក លបកន្ទុយកណ្ដុរ ដែលវាធ្វើឲ្យបាត់បង់ធនធានធម្មជាតិនោះ វាមានពីគេផងមានពីយើងផង។ ជនជាតិជិតខាងហ្នឹង ដែលមករកស៊ីនៅតំបន់យើងហ្នឹង។ ខាងជលផលយើងហ្នឹង គាត់ថាអត់អីទេ ចាំគាត់ធ្វើការវិភាគ ហើយម្យ៉ាងទៀត គាត់លើកថា ធ្វើទៅប៉ះខាងនេះ ធ្វើទៅប៉ះខាងនោះ នាំឲ្យមានការលំបាកដល់គាត់»។

ចំណែកអនុប្រធានបណ្ដាញប្រជានេសាទខេត្តព្រះសីហនុ អ្នកស្រី មាឃ សារឿន មានប្រសាសន៍ថា ដោយសារបញ្ហាបទល្មើសនេសាទបានកើតមានច្រើន ហាក់ពុំមានការទប់ស្កាត់ទាន់ពេលនោះ ធ្វើឲ្យប្រជានេសាទប្រឈមមុខនឹងបញ្ហាលំបាកក្នុងជីវភាព ខ្វះប្រាក់ចំណូល ជំពាក់ប្រាក់ធនាគារ និងចំណាកស្រុក។

អ្នកស្រី មាឃ សារឿន ៖ «ដូចជាស្រុកព្រៃនប់ គឺមានទូកឌុន និងរនាស់អូសគ្រែងឈាម។ នៅស្ទឹងហាវ បញ្ហាទូកមងហោះ និងទូកធំ វាច្រើនមកអូសនៅទឹករាក់ ប៉ះពាល់ដល់សម្ភារៈអ្នកដែលនេសាទជាលក្ខណៈគ្រួសារ ធ្វើឲ្យគាត់មានជម្លោះ ដូចថា ទូកធំៗ អ៊ីចឹងមកអូសទៅដាច់មងគាត់ដាច់អីអ៊ីចឹង។ ឧទាហរណ៍ថាអស់ ១ លានអ៊ីចឹងណា៎ សង ២០ ម៉ឺន ៣០ ម៉ឺន។ គាត់យកលុយ អេ.ស៊ី.លីដា អម្រឹតអ៊ីចឹងមក គាត់រកអីអត់បាន អត់មានអីសងគេ»។

បញ្ហាស្រដៀងគ្នានេះដែរ បណ្ដាញប្រជានេសាទខេត្តកោះកុង លោក សំ សាម៉ុន មានចម្ងល់ថា ហេតុអ្វីបានជាបទល្មើសនេសាទនៅតែបន្តកើតមាន បើទោះបីជាមន្ត្រីជំនាញរួមគ្នាបង្ក្រាបយ៉ាងណាក៏ដោយ។

លោក សំ សាម៉ុន ៖ «រយៈកាលកន្លងមកសហគមន៍នេសាទតំបន់ឆ្នេរសមុទ្ទកោះខ្យង គឺឃុំជីខក្រោម ក៏បានបង្ក្រាបបទល្មើស មានកិច្ចសហការពីជំនាញជលផលបានច្រើនករណីដែរ ប៉ុន្តែ យើងឃើញថា ទោះបីមានការបង្ក្រាបប៉ុណ្ណឹងក៏ដោយ បទល្មើសនេសាទហាក់ថាមិនខ្លាច»។

មន្ត្រីគម្រោងនៃអង្គការសម្ពន្ធភាពដើម្បីអភិរក្សធនធានជលផល លោក ហ៊ុត រ៉ាន់ដា មានប្រសាសន៍ថា កិច្ចប្រជុំនេះ គឺជាឱកាសផ្លាស់ប្ដូរបទពិសោធន៍គ្នាទៅវិញទៅមករវាងអ្នកនេសាទនៅខេត្តទាំង ៣។ លោកបន្តថា អង្គការនេះ បានផ្ដល់ទីតាំងដល់បណ្ដាញប្រជានេសាទតំបន់ឆ្នេរ សម្រាប់ការជួបប្រជុំគ្នាជារៀងរាល់ខែ។

លោក ហ៊ុត រ៉ាន់ដា ៖ «ក្រោយពីកិច្ចប្រជុំនេះ យើងកំណត់ជាផែនការយុទ្ធសាស្ត្រ។ បន្ទាប់ពីគាត់លើក ពីបញ្ហានៅតាមខេត្តនីមួយៗ ហើយ យើងបានកំណត់បានបញ្ហាអាទិភាព ពីព្រោះបញ្ហាវាមានច្រើនជារួមៗ ហើយយើងលើកនូវបញ្ហាណា ដែលត្រូវដោះស្រាយបន្ទាន់។ ហើយបន្ទាប់មកទៀត យើងធ្វើផែនការយុទ្ធសាស្ត្រជាមួយពួកគាត់។ បន្ទាប់មកទៀត យើងតាមដាន ពីផែនការ ដែលត្រូវធ្វើស្អីបន្តទៀត ក្នុងការទប់ស្កាត់ និងចូលរួមការពារ អភិរក្សធនធានជលផលអស់ទាំងនេះ»។

យ៉ាងនេះក្ដី លោក ស្បោង សារ៉ាត អភិបាលខេត្តព្រះសីហនុ មានប្រសាសន៍ថា លោកទទួលស្គាល់ ចំពោះបញ្ហាល្មើសក្នុងតំបន់នេសាទនេះ។ លោកថា ទោះយ៉ាងណាក៏ដោយ ករណីនេះមន្ត្រីជំនាញកំពុងបន្តសកម្មភាពអប់រំផ្សព្វផ្សាយ និងមានវិធានការទប់ស្កាត់។

លោក ស្បោង សារ៉ាត ៖ «បញ្ហាទូកនេសាទនេះ ជាសមត្ថកិច្ចមួយធំណាស់ កន្លងមកគេ មានវិធានការគេមានការទប់ទល់ ហើយគេមានច្បាប់ គេមានការណែនាំហើយ»។

កាលពីថ្ងៃទី៣០ ខែមិថុនាកន្លងទៅ តំណាងប្រជានេសាទនៅតាមតំបន់ទន្លេសាប ទន្លេមេគង្គ និងតំបន់ឆ្នេរចំនួន ២៥ នាក់ ធ្លាប់បានទៅជួបតំណាងព្រឹទ្ធសភា ដែលជាគណៈកម្មការសេដ្ឋកិច្ច ផែនការ វិនិយោគ កសិកម្ម ធនធានទឹក ឧតុនិយម អភិវឌ្ឍន៍ជនបទ និងបរិស្ថាន ដើម្បីគាំទ្រចំពោះចំណាត់ការ លេខ ០១ របស់រដ្ឋាភិបាលស្ដីពីការបង្ក្រាបបទល្មើសជលផល និងសុំឲ្យមានការជួយអន្តរាគមន៍ពីបញ្ហាបទល្មើសនេសាទ ដែលនាំឲ្យពលរដ្ឋជួបទុក្ខលំបាកខាងជីវភាព។ ក៏ប៉ុន្តែ រហូតមកដល់ថ្ងៃនេះ ពុំទាន់មានលទ្ធផលអ្វីនៅឡើយទេ៕