ហ៊ុន សែន ទៅ​ចូល​រួម​តាំង​ពិព័រណ៍​ពិភព​លោក​នៅ​ប្រទេស​ចិន

ប្រទេស​កម្ពុជា និង​ចិន នៅ​តែ​បន្ត​ពង្រឹង​កិច្ច​សហ​ប្រតិបត្តិការ​គ្នា ឲ្យ​កាន់​តែ​រឹង​មាំ​ថែម​ទៀត ហើយ​កម្ពុជា​នៅ​តែ​ប្រកាន់​យក​នយោបាយ​ចិន​តែ​មួយ។
ដោយ សុខ សេរី
2010-04-29
អ៊ីម៉ែល
មតិ
Share
បោះពុម្ព
លោក ហ៊ុន សែន ដឹក​នាំ​ប្រតិភូ​ជាន់​ខ្ពស់ ​ចាក​ចេញ​ពី​ប្រទេស​កម្ពុជា ទៅ​កាន់​ទី​ក្រុង​សៀងហៃ​នៃ​ប្រទេស​ចិន ដើម្បី​ចូល​រួម​នៅ​ក្នុង​ពិធី​តាំង​ពិព័រណ៍​ពិភព​លោក នៅ​ថ្ងៃ​ទី២៩ ខែ​មេសា ឆ្នាំ​២០១០។
លោក ហ៊ុន សែន ដឹក​នាំ​ប្រតិភូ​ជាន់​ខ្ពស់ ​ចាក​ចេញ​ពី​ប្រទេស​កម្ពុជា ទៅ​កាន់​ទី​ក្រុង​សៀងហៃ​នៃ​ប្រទេស​ចិន ដើម្បី​ចូល​រួម​នៅ​ក្នុង​ពិធី​តាំង​ពិព័រណ៍​ពិភព​លោក នៅ​ថ្ងៃ​ទី២៩ ខែ​មេសា ឆ្នាំ​២០១០។
RFA/Sok Serey

លោក​នាយក​រដ្ឋមន្ត្រី ហ៊ុន សែន នៃ​ប្រទេស​កម្ពុជា នៅ​ថ្ងៃ​ទី​២៩ ខែ​មេសា បាន​ដឹក​នាំ​ប្រតិភូ​ជាន់​ខ្ពស់ ​ចាក​ចេញ​ពី​ប្រទេស​កម្ពុជា ទៅ​កាន់​ទី​ក្រុង​សៀងហៃ ប្រទេស​ចិន ដើម្បី​ចូល​រួម​នៅ​ក្នុង​ពិធី​តាំង​ពិព័រណ៍​ពិភព​លោក​នៅ​ទី​នោះ ហើយ​លោក​មាន​គម្រោង​ការ​ជួប​ពិភាក្សា​ទ្វេ​ភាគី ជា​មួយ​ប្រធានាធិបតី​ចិន លោក ហូ ជិនតៅ (Hu Jintao) ផ្ដោត​លើ​ការ​ពង្រឹង​ចំណង​ទាក់​ទង​រវាង​កម្ពុជា និង​ចិន ព្រម​ទាំង​ការ​បញ្ជាក់​ជំហរ​ថា ប្រទេស​កម្ពុជា បន្ត​ប្រកាន់​យក​នយោបាយ​ចិន​តែ​មួយ។

មាន​មន្ត្រី​រដ្ឋាភិបាល​ជាន់​ខ្ពស់​ជា​ច្រើន​រូប បាន​រួម​ដំណើរ​នោះ ដូច​ជា លោក ហោ ណាំហុង ជា​រដ្ឋ​មន្ត្រី​ក្រសួង​ការ​បរទេស​កម្ពុជា និង​ជា​ឧបនាយក​រដ្ឋមន្ត្រី លោក ចម ប្រសិទ្ធិ រដ្ឋ​មន្ត្រី​ក្រសួង​ពាណិជ្ជកម្ម ជា​ទេស​រដ្ឋមន្ត្រី លោក ទ្បៅ ម៉េងឃីន សមាជិក​ព្រឹទ្ធសភា​គណបក្ស​ប្រជាជន​កម្ពុជា និង​មន្ត្រី​ប្រតិភូ​រដ្ឋាភិបាល ចំនួន​ជាង ៥​រូប​ទៀត។

ទីប្រឹក្សា​ផ្ទាល់​របស់​លោក​នាយក​រដ្ឋមន្ត្រី ហ៊ុន សែន លោក ស្រ៊ី ថាមរុង្គ បាន​មាន​ប្រសាសន៍​ប្រាប់​ក្រុម​អ្នក​យក​ព័ត៌មាន នៅ​ឯ​អាកាសយានដ្ឋាន​អន្តរជាតិ​ភ្នំពេញ​ថា លោក​នាយក​រដ្ឋមន្ត្រី ហ៊ុន សែន និង​ប្រធានាធិបតី​ចិន លោក ហូ ជិនតៅ មាន​គម្រោង​ការ​ជួប​ពិភាក្សា​ទ្វេ​ភាគី នៅ​ក្នុង​ទី​ក្រុង​សៀងហៃ ប្រទេស​ចិន​នោះ។

លោក​មាន​ប្រសាសន៍​បន្ត​ថា ៖ «នយោបាយ​ចិន​មួយ ដែល​យើង​ប្រកាន់​ខ្ជាប់ ហើយ​និង​កិច្ច​សហ​ប្រតិបត្តិការ​របស់​យើង​លើ​គ្រប់​វិស័យ​ជា​មួយ​ចិន។ យើង​ឃើញ​ជំនួយ​ចិន​សព្វ​បែប​យ៉ាង ការ​ជួយ​ផ្នែក​ហេដ្ឋារចនាសម្ព័ន្ធ​សង់​ស្ពាន នៅ​ក្នុង​ប្រទេស​កម្ពុជា។ ជំនួយ​របស់​ចិន​នេះ ទី​មួយ គឺ​ជំនួយ​ឥត​សំណង ទី​២ កម្ចី​ឥត​ការ​ប្រាក់។ នៅ​ពេល​ដែល​យើង​សង គឺ​សង​តែ​ដើម​ទេ។ ហើយ​និង​កម្ចី​មួយ​ទៀត គឺ​ការ​ប្រាក់​វា​ទាប។ អា​ហ្នឹង​រយៈ​ពេល​យូរ។ អ៊ីចឹង​ទំនាក់​ទំនង​ផ្នែក​សេដ្ឋកិច្ច​ហ្នឹង យើង​ឃើញ​គេ​ជួយ​សព្វ​បែប​យ៉ាង»

លោក​បន្ត​ថា ក្រៅ​ពី​នេះ លោក ហ៊ុន សែន និង​ប្រតិភូ​រដ្ឋាភិបាល​កម្ពុជា មាន​គម្រោង​ការ​ជួប​ជា​មួយ​តំណាង​ក្រុមហ៊ុន​បច្ចេកវិទ្យា​របស់​ចិន​សៀងហៃ ដែល​កំពុង​តែ​ធ្វើ​វិនិយោគ​ទុន វិស័យ​ទូរគមនាគមន៍ នៅ​ក្នុង​ប្រទេស​កម្ពុជា។ លោក​បន្ថែម​ថា លោក​នាយក​រដ្ឋមន្ត្រី​មាន​គម្រោង​ការ​ជួប​ជា​មួយ​តំណាង​ក្រុម​ហ៊ុន​ចិន​សៀងហៃ ដែល​កំពុង​តែ​សាង​សង់​ស្ពាន និង​ផ្លូវ​ថ្នល់​កាត់​ទន្លេ​មេគង្គ និង​ទន្លេ​សាប​នៅ​កម្ពុជា។

ប្រទេស​កម្ពុជា បាន​ចូល​រួម​តាំង​ពិព័រណ៍​ពិភព​លោក នៅ​ក្នុង​ក្រុង​សៀងហៃ​ផង​ដែរ សម្រាប់​រយៈ​ពេល ៦​ខែ រហូត​ដល់​ថ្ងៃ​ទី​៣១ ខែ​តុលា ខាង​មុខ​នេះ នៅ​ក្នុង​ចំណោម​ប្រទេស​នានា និង​អង្គការ​នានា សរុប ចំនួន​ជាង​២០០ បាន​ចូល​រួម​តាំង​ពិព័រណ៍​នោះ។

ប្រទេស​កម្ពុជា ក៏​បាន​រៀបចំ​តាំង​ពិព័រណ៍​នៅ​ទី​នោះ ដើម្បី​ឆ្លុះ​បញ្ចាំង​ឲ្យ​ពិភព​លោក​បាន​ស្គាល់ កម្ពុជា​នូវ​វប្បធម៌ អរិយធម៌ និង​វិស័យ​កសិកម្ម នៅ​ក្នុង​សម័យ​កាល​មួយ​ចំនួន គឺ​សម័យ​កាល​រុងរឿង​នៃ​សម័យ​អង្គរ សម័យ​លង្វែក និង​សម័យ​កាល​ចតុមុខ ឬ​ហៅ​ថា ភ្នំពេញ​បច្ចុប្បន្ន ក្នុង​បំណង​ទាក់​ទាញ​វិស័យ​ទេសចរណ៍ និង​វិនិយោគ​ទុន​មក​កម្ពុជា។

មន្ត្រី​រដ្ឋាភិបាល​កម្ពុជា បាន​ពណ៌នា​ថា ដំណើរ​ទស្សនកិច្ច​នេះ គឺ​ជា​ការ​ឆ្លុះ​បញ្ចាំង​អំពី​ទំនាក់​ទំនង​រឹង​មាំ រវាង​កម្ពុជា និង​ចិន តាំង​ពី​សម័យកាល​ដឹក​នាំ​ដោយ​អតីត​ព្រះ​មហាក្សត្រ ព្រះ​បាត​នរោត្តម សីហនុ ជា​រៀង​រហូត​មក។

កាល​ពី​ខែ​ធ្នូ ឆ្នាំ​២០០៩ កន្លង​ទៅ អង្គការ​ការពារ​សិទ្ធិ​មនុស្ស​អន្តរជាតិ​នានា រាប់​ទាំង​សហរដ្ឋ​អាមេរិក​ផង បាន​រិះ​គន់​ជា​ច្រើន ចំពោះ​ប្រទេស​កម្ពុជា ដែល​បាន​ចាប់​បញ្ជូន​ជន​ជាតិ​ភាគ​តិច​ចិន​អ៊ុយហ្គឺរ (Uighur) ចំនួន ២០​នាក់ ទៅ​កាន់​ប្រទេស​ចិន​វិញ​ដោយ​បង្ខំ ដែល​ពួក​គេ​បាន​រត់​មក​ស្វែង​រក​សិទ្ធិ​ជ្រោក​កោន ពី​អង្គការ UNHCR នៅ​ក្នុង​ប្រទេស​កម្ពុជា ពី​ការ​តាម​ចាប់​ខ្លួន​ដោយ​អាជ្ញាធរ​ចិន ដោយសារ​តែ​ប្រទេស​ទាំង​ពីរ​ទំនាក់​ទំនង​ជិត​ស្និត​និង​គ្នា មិន​បាន​គិត​អំពី​កាតព្វកិច្ច ជា​អន្តរជាតិ ក្នុង​ការ​ការពារ​ជន​ភៀស​ខ្លួន។

ប្រភព​ពី​មន្ត្រី​រដ្ឋាភិបាល​កម្ពុជា បាន​ឲ្យ​ដឹង​ថា ប្រមុខ​រដ្ឋាភិបាល​កម្ពុជា និង​ដឹក​នាំ​ប្រតិភូ​ជាន់​ខ្ពស់​មក​កម្ពុជា​វិញ នៅ​ថ្ងៃ​ទី​២ ខែ​ឧសភា ខាង​មុខ​នេះ៕

ព័ត៌មាន (0)
Share
គេហទំព័រ​ទាំងមូល