ប៉ុន្តែការរៀបអាពាហ៍ពិពាហ៍នេះបើតាមការបកស្រាយរបស់គ្រូបង្រៀនផ្នែកសាសនាអ៊ិស្លាមគឺពុំមែនជាប្រពៃណីនោះទេ សំខាន់លក្ខខណ្ឌនៃការរៀបមង្គលការនោះគឺឲ្យតែរៀបចំត្រូវនិងក្បួនខ្នាតរបស់សាសនាអ៊ិស្លាមគឺជាប្រការដែលប្រសើរបំផុត ព្រោះប្រពៃណីនិងទំនៀមទម្លាប់នោះមិនស្ថិតនៅក្នុងក្បួនច្បាប់នៃសាសនាអ៊ិស្លាមនោះទេ សាសនិកអ៊ិស្លាមនាពេលបច្ចុប្បន្នបានរៀបអាពាហ៍ពិពាហ៍អនុវត្តតាមច្បាប់វិន័យរបស់សាសនាអ៊ិស្លាម។
ថ្នាក់ដឹកនាំភូមិដែលហៅថា ហាកិម គឺលោក លីម មហាំម៉ាត់នោ បានមានប្រសាសន៍ជុំវិញទំនៀមទម្លាប់នៃការរៀបអាពាហ៍ពិពាហ៍ពីជំនាន់អតីតកាលថា ការរៀបអាពាហ៍ពិពាហ៍មានរយៈពេលពីរថ្ងៃ។
លោកបានរៀបរាប់យ៉ាងដូច្នេះ ៖ «ថ្ងៃទី១ គេហៅថាប្រជុំញាតិ ប្រជុំក្រុមគ្រួសារ ញាតិមិត្តមកពីឆ្ងាយគេរៀបចំម្ហូបម្ហាពេលល្ងាច គ្រាន់តែថាទទួលជាមធ្យមសម្រាប់ក្រុមគ្រួសារសាច់ញាតិ ហើយដល់ពេលយប់ម៉ោង៦ទៅម៉ោង៦:៣០យប់ហ្នឹង មានហូបនំ ចាស់ៗមកចូលរួមច្រើនណាស់ ប្រុសក៏មកច្រើន ស្រីក៏មកច្រើន ជាពិសេសក្រមុំៗរយនាក់តែម្ដងដែលគេមកកំដរកូនក្រមុំ។ ការហូបហ្នឹងទៀតចែកចេញជាពីរប្រភេទ ប្រុសហូបតាមប្រុស ស្រីហូបតាមស្រី»។
លោកហាកិមបានបញ្ជាក់ទៀតថា អ្វីដែលមិនមានការប្រែប្រួលនោះគឺរវាងកូនកម្លោះនិងកូនក្រមុំនៅពេលដែលបានភ្ជាប់ពាក្យរួចហើយក្តី ពួកគេពុំមានសិទ្ធិបណ្តើរគ្នាលេងនោះទេ។ ចំពោះការតុបតែងខ្លួនកូនកម្លោះក្រមុំមានការប្រែប្រួលតាមសង្គម។
លោកហាកិមបានឲ្យដឹងថា ៖ «កូនក្រមុំច្រើនពីដើមឪពុកម្ដាយយើង ចាស់ៗពាក់ខោអាវខ្មៅៗវែងៗពីដើមៗហ្នឹង។ គេច្រើនស្លៀកពាក់របៀបរបបហ្នឹង ប៉ុន្តែពេលឡើងគ្រែ ខ្មៅហ្នឹងមានលាបពណ៌ ឲ្យមានពណ៌ខៀវ ពណ៌ក្រហមដែរ ក្រណាត់សន្ទៀវហ្នឹង វាមិនមែនដូចបច្ចុប្បន្នឥឡូវមានតេតារ៉ុងមានអីឯណា។ កូនកម្លោះស្លៀកពាក់ពីដើមតិចណាស់មានស្លៀកខោបារាំងអី ច្រើនស្លៀកសារ៉ុង ពាក់អាវវែង ហើយចង (ក្រណាត់) លើក្បាលអីជាពណ៌អីខ្លះ។ កូនកម្លោះឥឡូវ គេស្លៀកពាក់ជារបៀបរបបអារ៉ាប់ទៅ ជួនកាលទៅគេស្លៀកពាក់ជាម៉ាឡេទៅ ជួនកាលស្លៀកពាក់ជាប្រពៃណីខ្មែរ អាវធំចងក្រវាត់កទៅ»។
នាយកនៃមជ្ឈមណ្ឌលអ៊ិស្លាមមួយនិងជាគ្រូបង្រៀនផ្នែកសាសនាអ៊ិស្លាមផងនោះ លោក យួសុះ អាប់ឌុលរ៉សម៉ាន មានប្រសាសន៍អំពីវិន័យនៃការរៀបអាពាហ៍ពិពាហ៍តាមសាសនាអ៊ិស្លាមថា ការរៀបការមិនអាចបង្ខំពីភាគីណាមួយបានឡើយ ហើយក្នុងពិធីរៀបមង្គលការនោះក៏ពុំមានភ្លេងឬតន្រ្តីអ្វីទេ។
លោក យួសុះ អាប់ឌុលរ៉សម៉ាន បានមានប្រសាសន៍ថា ៖ «គ្រឹះសំខាន់នៅក្នុងការរៀបការឬមួយភាសាអារ៉ាប់ថា... មាន៣ប្រការ។ ទី១ ឲ្យមានកម្លោះហើយក្រមុំ ហើយទាំងពីរនាក់នោះអាចរៀបការជាមួយគ្នាបានតាមវិន័យនិងសាសនាអ៊ិស្លាម។ ទី២ មានការអនុញ្ញាតអំពីអ្នកគ្រប់គ្រង អំពីឪពុកស្រ្តីបានពោលពាក្យប្រគល់កូនស្រីរបស់លោកឲ្យទៅកូនកម្លោះ។ ទី៣ កូនកម្លោះត្រូវទទួលថា ខ្ញុំទទួលហើយរៀបការនោះ។ នេះគឺគ្រឹះសំខាន់បីនេះ គឺអាចក្លាយទៅជាប្ដីប្រពន្ធហើយ»។
លោកបានបន្តថា ចំពោះកូនក្រមុំនៅថ្ងៃរៀបអាពាហ៍ពិពាហ៍គឺគេមិនអនុញ្ញាតឲ្យតុបតែងខ្លួនក្នុងសំម្លៀកបំពាក់ណាដែលស៊ិចស៊ីនោះទេ។ លោកបានបញ្ជាក់អំពីផលប្រយោជន៍នៃការរៀបមង្គលការនោះថា ៖ «បុរសនិងស្រ្តីមិនរៀបការទេ គឺនាំឲ្យគ្រោះថ្នាក់ដល់បុគ្គល គ្រួសារ សង្គម ហើយនិងប្រទេសជាតិ សុខភាព សន្តិសុខ ហើយនិងអ្វីផ្សេងៗដទៃទៀត។ មានន័យថា បើយើងរៀបការតាមច្បាប់នោះធ្វើឲ្យសង្គមគ្មានជំងឺកាមរោគនៅក្នុងសង្គម ប្រមេះ ស្វាយ ឃ្លង់ អេដស៍»។
រីឯប្រធានសមាគមខ្មែរអ៊ិស្លាមនិងអភិវឌ្ឍន៍ជនជាតិភាគតិច លោក សា មហាំម៉ាត់សេន បានបញ្ជាក់ថាជាទូទៅឃើញថាពីជំនាន់មុនការផ្គូរផ្គងកូនចៅ ឪពុកម្តាយតែងតែងរៀបចំមង្គលការឲ្យកូនៗ ទោះបីជាកូនកម្លោះក្រមុំនោះបានស្គាល់គ្នាឬមិនបានស្គាល់គ្នាពីមុនមកក្តី។
លោក សា មហាំម៉ាត់សេន បានមានប្រសាសន៍ថា ៖ «ប្រជាជននៃជនជាតិអ៊ិស្លាមដែលនៅកម្ពុជាមានការសិក្សាស្វែងយល់ពីផ្នែកសាសនាអ៊ិស្លាមក្ដី ខាងផ្នែកខាងចំណេះទូទៅក្ដី គេនឹងបានស្វែងយល់ពីអ្វីដែលហៅថា សុភមង្គល»។
សូមជម្រាបថា ការរៀបអាពាហ៍ពិពាហ៍របស់សាសនិកអ៊ិស្លាមនៅក្នុងប្រទេសកម្ពុជា ចំពោះនារីៗនៅពេលយប់គេនាំគ្នាទៅមើលការតុបតែងខ្លួនរបស់កូនក្រមុំនោះ។ ពិធីរៀបមង្គលការនេះពុំបានកំណត់ចំនួនថ្ងៃនោះទេ សំខាន់គឺគេត្រូវតែធ្វើពិធីជប់លៀងដ៏ធំមួយដើម្បីបង្ហាញថា កូនអ្នកភូមិនោះបានរៀបការនិងធ្វើតាមច្បាប់អ៊ិស្លាមនិងច្បាប់សង្គម។ ប៉ុន្តែទោះជាយ៉ាងនេះក្ដីការរៀបអាពាហ៍ពិពាហ៍នោះ ខ្មែរអ៊ិស្លាមនៅប្រទេសកម្ពុជាជាទំនៀមទម្លាប់បានធ្វើឡើងរយៈពេលពីរថ្ងៃគឺថ្ងៃចូលរោងការនិងថ្ងៃបញ្ចប់និងមានពិធីជប់លៀងច្រើនដង ដូចជាពេលយប់គេជប់លៀងនំចំណីផ្សេងៗជាដើម។ ការរៀបការនេះកូនកម្លោះមិនបានមករៀបការនៅផ្ទះខាងស្រីទេ គឺគេបានធ្វើពិធីរៀបការនៅផ្ទះរៀងៗខ្លួន លុះដល់ថ្ងៃទីពីរគេបានហែកូនកម្លោះមកផ្ទះខាងស្រីដោយមានសាច់ញាតិខាងកូនកម្លោះមកជាមួយ ដូចជាឪពុកម្តាយឬបងប្អូន ប៉ុន្តែកូនក្រមុំពុំបានមកទទួលកូនកម្លោះនោះដែរ។
ក្រោយពីបានហែមកដល់ផ្ទះខាងស្រីគេបានរៀបពិធីប្រគល់កូនក្រមុំឲ្យកូនកម្លោះដែលគេហៅថា នីកាស់និងមានភ្ញៀវផ្នែកបុរសទាំងសងខាងចូលរួមក្នុងចំណោមនោះ គេរកសាក្សីពីរនាក់ដែលជាមនុស្សទៀងត្រង់ដើម្បីដឹងឮពីការនីកាស់ដែលគេអាចធ្វើនៅពេលនៅយប់ឬនៅពេលថ្ងៃ បន្ទាប់ពីនីកាស់គេជប់លៀងឬបរិភោគចំណីផ្សេងៗនៅផ្ទះខាងស្រី។
ការរៀបការដែលមិនបាននីកាស់ទេនោះមានន័យថា ពួកគេទាំងពីរនាក់មិនទាន់ក្លាយជាប្តីប្រពន្ធនឹងគ្នាបានទេ ទោះបីជាគេបានធ្វើពិធីមង្គលការនោះធំដុំយ៉ាងណាក៏ដោយ។ នីកាស់គេអាចធ្វើនៅក្នុងវិហារ នៅផ្ទះកូនក្រមុំឬនៅផ្ទះអ្នកជិតខាង។ ក្រោយពីបាននីកាស់កូនកម្លោះក្រមុំគេបានរៀបចំឲ្យផ្សំដំណេកនៅយប់ទី២ ហើយពួកគេទាំងពីរនាក់ក៏មិនចូលវិហារដើម្បីប្រាថ្នាអ្វីនោះដែរ។
យោងតាមប្រវត្តិសាស្ត្ររបស់សាសនាអ៊ិស្លាមបានបង្ហាញថា ការរៀបអាពាហ៍ពិពាហ៍គឺមានតាំងពីជំនាន់ព្យាការីរបស់អល់ឡោះ ហៅថា ណាពីអាដាម មកម៉្លេះ ដែលជាជីដូនជីតារបស់មនុស្សព្រោះអល់ឡោះបានបង្កើតអាដាមដំបូងគេបង្អស់បានរៀបការជាមួយហាវើ៕