ការលើកឡើងនេះធ្វើឡើងនៅក្នុងសមាជលើកទី១ របស់ក្រុមប្រឹក្សាអ្នកសារព័ត៌មានកម្ពុជា ដោយបានលើកយកបញ្ហានៃប្រព័ន្ធផ្សព្វផ្សាយ ដែលក្នុងនោះបានសម្គាល់ឃើញថា មានកត្តាបីយ៉ាង គឺខ្វះសេរីភាពសារព័ត៌មាន ខ្វះសិទ្ធិទទួលព័ត៌មាននិងប្រើប្រាស់ព័ត៌មាន រួមជាមួយការខ្វះក្រមសីលធម៌និងវិជ្ជាជីវៈ ដែលធ្វើឲ្យប្រព័ន្ធផ្សព្វផ្សាយមួយចំនួនមានការធ្លាក់ចុះ។
លោក ឱម ច័ន្ទតារា អនុប្រធានក្រុមប្រឹក្សាអ្នកសារព័ត៌មានកម្ពុជា បានមានប្រសាសន៍បញ្ជាក់ថា ដោយមានការខ្វះចន្លោះនោះ សុំឲ្យក្រុមសមាគមនិងអង្គការសារព័ត៌មានទាំងអស់ជំរុញឲ្យមានច្បាប់សារព័ត៌មាន រួមជាមួយនឹងការពង្រឹងក្រមសីលធម៌និងវិជ្ជាជីវៈឡើងវិញ។
លោក ឱម ច័ន្ទតារា មានប្រសាសន៍ដូច្នេះថា ៖ «ប៉ុន្តែអ្វីដែលយើងកំពុងដោះស្រាយបញ្ហាសំខាន់ គឺទាក់ទងនឹងការប្រឈមមុខចំពោះបញ្ហាច្បាប់ បញ្ហាវិជ្ជាជីវៈ និងសីលធម៌ហ្នឹងហើយ ដែលយើងកំពុងប្រឈមមុខនោះ ហើយយើងទាមទារ ទីមួយ យើងមានច្បាប់សារព័ត៌មាន ប៉ុន្តែច្បាប់សារព័ត៌មានយើងក៏នៅមានបញ្ហាខ្វះខាតខ្លះ ហើយសិទ្ធិក្នុងការទទួលព័ត៌មានក៏នៅមិនទាន់គ្រប់គ្រាន់ទេ»។
នៅក្នុងកិច្ចប្រជុំនោះដែរ ក៏បានលើកឡើងដែរថា មានក្រុមអ្នកសារព័ត៌មានមួយចំនួនតូចបានយកតួនាទីជាអ្នកសារព័ត៌មានទៅប្រើប្រាស់បម្រើផលប្រយោជន៍ផ្ទាល់ខ្លួន ដោយប្រាសចាកពីក្រមសីលធម៌និងវិជ្ជាជីវៈសារព័ត៌មានដែលធ្វើឲ្យខូចតម្លៃដល់អ្នកសារព័ត៌មានផ្សេងទៀត។
លោក សេក បរិសុទ្ធ នាយកអង្គការ ផែក កម្ពុជា បានមានប្រសាសន៍ថា អ្នកសារព័ត៌មានកម្ពុជាមានការយល់ដឹងពីសិទ្ធិសេរីភាពសារព័ត៌មាននិងក្រមសីលធម៌វិជ្ជាជីវៈនៅមានកម្រិតនៅឡើយ។
រីឯលោក ហែម ភារៈ ប្រធានសមាគមអ្នកសារព័ត៌មានកម្ពុជាដើម្បីសេរីភាព បានមានប្រសាសន៍ដែរថា អ្នកកាសែតមួយចំនួនស្ទើរតែបាត់បង់វិជ្ជាជីវៈនិងក្រមសីលធម៌អស់ ដោយសារតែមានភាពលំអៀងទៅរកអ្នកកាន់អំណាច ឬលំអៀងទៅរកផលប្រយោជន៍។
លោក នូវ សុវត្ថិរ៉ូ រដ្ឋលេខាធិការក្រសួងព័ត៌មានបានមានប្រសាសន៍ទទួលស្គាល់ថា ច្បាប់ស្តីពីសារព័ត៌មាន មានការខ្វះចន្លោះច្រើន ៖ «ខ្ញុំទទួលស្គាល់ថា សេរីភាពសារព័ត៌មានរបស់យើងមានចំណុចខ្សោយនៅត្រង់ថា ច្បាប់ស្ដីពីរបបសារព័ត៌មានរបស់យើងមានចន្លោះប្រហោង ហើយខ្ញុំបានស្ដាប់ដដែលៗ វាគ្មិនឡើងមកមានប្រសាសន៍ គឺចាប់អារម្មណ៍តែរឿងច្បាប់ហ្នឹងឯង ហើយខ្ញុំខ្លួនខ្ញុំក៏បានចាប់អារម្មណ៍រឿងនេះដែរ ហើយច្បាប់ស្ដីពីរបបសារព័ត៌មាននេះ បើសិនជាយើងបន្ទោសក៏បាន សរសើរក៏បាន រិះគន់ក៏បាន ផ្ដល់យោបល់ក៏បាន។ ច្បាប់នេះអនុម័តនៅឆ្នាំ១៩៩៥ ដែលក្រសួងព័ត៌មានទើបតែចាប់បដិសន្ធិបាន២ឆ្នាំ។ អ៊ីចឹង យើងទាំងអស់គ្នាគួរទទួលស្គាល់ថា នៅក្នុងពេលនោះ ឯកសារ ឬទិន្នន័យផ្សេងៗ ដែលប្រមូលយកមកចងក្រងជាច្បាប់ស្ដីពីរបបសារព័ត៌មាននេះ ខ្ញុំជឿថា ខ្សត់»។
លោក នូវ សុវត្ថិរ៉ូ រដ្ឋលេខាធិការក្រសួងព័ត៌មានបានមានប្រសាសន៍ថា សុំឲ្យអ្នកសារព័ត៌មានគោរពក្រមសីលធម៌វិជ្ជាជីវៈជៀសវាងការចុះព័ត៌មានខុសដែលអាចបណ្តាលឲ្យមានការប្តឹងផ្តល់កើតឡើងនោះ៕