តំណាងប្រជាពលរដ្ឋនៃសហគមន៍ខែ្មរអ៊ិស្លាមចំនួនជាង៣០០គ្រួសាររស់នៅ ក្នុងភូមិកំពង់យោល ឃុំគោកពោធិ៍ ស្រុកបូរីជលសា ខេត្តតាកែវ បានបន្តការតវ៉ាជាថ្មីទៀតទាមទារឲ្យមានការបោះឆ្នោតជ្រើសរើសនូវមេ ដឹកនាំថ្មីនៃសាសនាអ៊ិស្លាមសម្រាប់សហគមន៍របស់ខ្លួននៅគ្រាដែលមាន ការចោទប្រកាន់ថា មេដឹកនាំសាសនានាពេលបច្ចុប្បន្ននេះមានការពាក់ព័ន្ធនឹងអំពើពុករលួយ មិនស្មោះត្រង់នឹងសាសនាអ៊ិស្លាម។
តំណាងប្រជាពលរដ្ឋនៃសហគមន៍ខែ្មរអ៊ិស្លាមចំនួនជាង៣០០គ្រួសារនោះរស់នៅក្នុងភូមិកំពង់យោល ឃុំគោកពោធិ៍ ស្រុកបូរីជលសា ខេត្តតាកែវ បានមានប្រសាសន៍ប្រាប់វិទ្យុអាស៊ីសេរីថា សហគមន៍របស់លោកស្រីមិនអាចទទួលយកលោក រី ម៉ាត់ នោះបានទេ គឺសហគមន៍ត្រូវការបោះឆ្នោតជ្រើសរើសមេដឹកនាំថ្មីនៃសាសនាអ៊ិស្លាមសម្រាប់សហគមន៍នៅទីនោះ ៖ «សុំឲ្យមានការបោះឆ្នោតនៅក្នុងភូមិខ្ញុំរើសហាកឹមថ្មី។ មិនអាចទទួលយកបានទេ លោក រី ម៉ាត់ហ្នឹង ព្រោះគាត់មានកំហុសច្រើនពេកហើយរយៈពេល៤ឆ្នាំ គាត់អត់មានដោះស្រាយអីជួយប្រជាជនកន្លែងណាបន្តិចសោះ កសាងអីក៏គ្មាន អត់មានការរីកចម្រើនអីនៅក្នុងភូមិហ្នឹង។ អ៊ីចឹងខ្ញុំអត់ចង់បានគាត់ទេ ឲ្យមានអ្នកថ្មីឡើងដឹកនាំ»។
តំណាងសហគមន៍ខែ្មរអ៊ិស្លាមម្នាក់ទៀតបានតវ៉ាថា ៖ «ចង់សំណូមពរបោះឆ្នោតរើសហាកឹមថ្មី»។
មិនអាចទាក់ទង លោក រី ម៉ាត់ ដែលរងការចោទប្រកាន់ខាងលើនេះបានភ្លាមៗទេដោយសារទូរស័ព្ទរបស់លោកបានបិទ។
ផ្អែកតាមប្រភពពីអ្នកតវ៉ានៃសហគមន៍ខែ្មរអ៊ិស្លាមនៅទីនោះបានចោទប្រកាន់ថា លោក រី ម៉ាត់ ដែលកំពុងក្លាយជាមេដឹកនាំសាសនាអ៊ិស្លាមនាពេលបច្ចុប្បន្ននេះសម្រាប់សហគមន៍នៅទីនោះត្រូវបានគេតែងតាំងដោយអត្តនោម័តិដោយគ្មានការពិគ្រោះយោបល់ពីប្រជាពលរដ្ឋសហគមន៍ខ្មែរអ៊ិស្លាមនោះទេ ហើយលោក រី ម៉ាត់ នោះ មិនស្មោះត្រង់ជាមួយនឹងសាសនាអ៊ិស្លាមមានការកិបកេងប្រវ័ញ្ចថវិការួមរបស់សហគមន៍។
លោក សុះ កឹមរី មេដឹកនាំសហគមន៍ខែ្មរអ៊ិស្លាមធំជាងគេនៅក្នុងប្រទេសកម្ពុជាដែលបានតែងតាំង លោក រី ម៉ាត់ នោះ បានមានប្រសាសន៍ថា លោកមិនទាន់អាចដោះស្រាយអ្វីបាននៅទ្បើយទេជុំវិញបញ្ហាខាងលើនេះ ៖ «ខ្ញុំកំពុងរវល់ ខ្ញុំនៅប្រជុំ អាហ្នឹងមិនទាន់ថាកើតទេ...»។
ទាក់ទងនឹងបញ្ហាខាងលើនេះ លោក ចៀប ជាវ ភ្នាក់ងារអង្កេតរបស់មជ្ឈមណ្ឌលសិទ្ធិមនុស្សកម្ពុជាដែលបានតាមដានរឿងវិវាទខាងលើនេះ បានសម្ដែងការព្រួយបារម្ភថា ៖ «ក្នុងនេះខ្ញុំចង់សំណូមពរអ៊ីចេះ ព្រោះរញ៉េរញ៉ៃពេក សូមសំណូមពរឲ្យឯកឧត្ដម រដ្ឋមន្ត្រី រដ្ឋមន្ត្រីក្រសួងធម្មការនិងសាសនា... និងតំណាងរាស្ត្រ សុំឲ្យគាត់ចុះមកត្រួតពិនិត្យភាពរញ៉េរញ៉ៃនៅក្នុងភូមិកំពង់យោលនេះផង ថ្ងៃក្រោយទៅមើលទៅកើតរឿងកាន់តែធំឡើងៗ។ ខាងសាសនាហ្នឹងមួយចំនួនគាត់មានប្រសាសន៍ថា បើធ្វើតែភាពអ៊ីចឹងគាត់សុំលាលែងពីសាសនារបស់ខ្លួនសុំចូលសាសនាព្រះពុទ្ធវិញ អ៊ីចេះ»។
គេនៅមិនឃើញមានកិច្ចអន្តរាគមន៍ណាមួយភ្លាមៗនៅទ្បើយទេពីក្រសួងធម្មការនិងសាសនាដើម្បីបញ្ចប់រឿងវិវាទក្នុងសហគមន៍ខែ្មរអ៊ិស្លាមខាងលើនេះដែលបានកើតឡើងនូវរឿងវិវាទអូសបន្លាយជាច្រើនខែមកហើយ៕