ព្រះសង្ឃខ្មែរក្រោមមួយចំនួនរងការគំរាមចាប់ខ្លួនពីវៀតណាម
2011.01.30
ព្រះសង្ឃនៅវត្តសាមគ្គីរង្សី ស្ថិតនៅខណ្ឌមានជ័យ រាជធានីភ្នំពេញ តវ៉ាជំទាស់ទៅនឹងសេចក្ដីប្រកាសតែងតាំងព្រះចៅអធិការថ្មី ព្រះនាម ឃិន វាសនា នៅថ្ងៃទី២១ ខែតុលា ឆ្នាំ២០១០។
ប្រភពពីព្រះសង្ឃខ្មែរកម្ពុជាក្រោមបានឲ្យដឹងថា អាជ្ញាធរនគរបាលវៀតណាម និងភ្នាក់ងារស៊ើបការសំងាត់ វៀតណាម កំពុងតាមដានព្រះសង្ឃខ្មែរកម្ពុជាក្រោមមួយអង្គ ព្រះនាម ថាច់ ធឿន ជារៀងរាល់ថ្ងៃ។
សកម្មភាពនេះបានធ្វើឡើងអស់រយៈពេល ១សប្ដាហ៍មកហើយ នៅក្នុងវត្តសេរីតាសេក ស្រុកជ្រោយញរ ខេត្តឃ្លាំង ទឹកដីខ្មែរកម្ពុជាក្រោម គ្រប់គ្រងដោយវៀតណាម។
អាជ្ញាធរវៀតណាមបានគំរាមនឹងចាប់ខ្លួនព្រះសង្ឃ ថាច់ ធឿន ក្រោមបទសង្ស័យថា បានទាក់ទងតាមសារអេឡិចត្រូនិក (E-mail) ទៅសហព័ន្ធខ្មែរកម្ពុជាក្រោមពិភពលោក នៅសហរដ្ឋអាមេរិក និងសហគមន៍ខ្មែរកម្ពុជាក្រោមនានា នៅប្រទេសមួយចំនួនទៀត ដើម្បីប្រឆាំងរដ្ឋាភិបាលវៀតណាម។
ចំពោះព្រះសង្ឃខ្មែរកម្ពុជាក្រោមចំនួន ២អង្គផ្សេងទៀត បានរត់លាក់ខ្លួន ដែលមានព្រះនាម ថាច់ សាម៉ី និងព្រះនាម គឹម ចាន់សាមឿន។
ព្រះសង្ឃខ្មែរកម្ពុជាក្រោមព្រះនាម ថាច់ ធឿន មានព្រះជន្មាយុ ២៣ព្រះវស្សា គង់នៅក្នុងវត្តសេរីតាសេក នៅក្នុងស្រុកជ្រោយញរ ខេត្តឃ្លាំង ទឹកដីខ្មែរកម្ពុជាក្រោម បានមានព្រះថេរដីកាប្រាប់វិទ្យុអាស៊ីសេរីតាមទូរស័ព្ទនៅថ្ងៃទី៣០ ខែមករា ថាមានកងកម្លាំងចម្រុះនគរបាលវៀតណាមចំនួន ២នាក់ តាមដានរាល់សកម្មភាពរបស់ព្រះអង្គមួយសប្ដាហ៍មកហើយ និងមានកម្លាំងមួយចំនួនទៀត មានអាវុធឈរជើងនៅក្រៅវត្ត ៖ "អាននិមន្តបានដែរ ប៉ុន្តែវាចេះតែនៅតាមក្រោយអ៊ីចឹង ប៉ុន្តែអាត្មាអាចនិមន្តទៅហ្នឹង ពី៣ ឬ៤អង្គឡើង ទើបអាត្មាហ៊ាននិមន្ត។ អាត្មាមិនអាចធានាសុវត្ថិភាពអាត្មាបានទេ ហេតុហ្នឹងហើយបានជាអាត្មាមិនសូវហ៊ាន ចេញនិមន្តទៅណារហេតរហូតបានទេ។ អាត្មាសូមសំណូមពរទៅដល់អង្គការអន្តរជាតិ និងអង្គការជាតិ ជាពិសេសអ្នកដែលនៅប្រទេសក្រៅ ជួយដឹងឮទាំងអស់ ជួយតាមមើលអាត្មាផង"។
វិទ្យុអាស៊ីសេរីមិនអាចទាក់ទងមន្ត្រីស្ថានទូតវៀតណាមនៅក្នុងប្រទេសកម្ពុជាបានទេ នៅថ្ងៃអាទិត្យដើម្បីសុំការបញ្ជាក់អំពីការចោទប្រកាន់នេះ ដោយសារតែគ្មានអ្នកឆ្លើយទូរស័ព្ទ។
ប្រធានសហគមន៍ខ្មែរកម្ពុជាក្រោមនៅក្នុងប្រទេសកម្ពុជា លោក ថាច់ សេដ្ឋា បានមានប្រសាសន៍ថា លោកមានការព្រួយបារម្ភអំពីសុវត្ថិភាពរបស់ព្រះសង្ឃ ថាច់ ធឿន ៖ "កាលណាចង់ធ្វើបាបព្រះសង្ឃ ចង់ចាប់អ្នកណាម្នាក់ តែងតែប្រឌិតរឿងដើម្បីចោទប្រកាន់ថា អ្នកនេះជាភ្នាក់ងារ អ្នកនេះបម្រើឲ្យអ្នកនេះ។ អាហ្នឹងជាល្បិចកិច្ចកល់មួយក្នុងការគំរាមកំហែងបំបាក់ស្មារតីក្នុងតស៊ូ"។
ប្រភពពីសកម្មជនខ្មែរកម្ពុជាក្រោមបានឲ្យដឹងថា កាលពីឆ្នាំ២០១០ កន្លងទៅនេះ ព្រះសង្ឃខ្មែរកម្ពុជាក្រោមចំនួន ៣អង្គ បានរងការចាប់ខ្លួន ក្រោមបទសង្ស័យថា បានប៉ុនប៉ងងើបបះបោរប្រឆាំងរដ្ឋាភិបាលវៀតណាម ដើម្បីទាមទារឯករាជ្យនៃទឹកដីខ្មែរកម្ពុជាក្រោម។
របាយការណ៍ឆ្នាំ២០១០ ចេញផ្សាយដោយអង្គការឃ្លាំមើលសិទ្ធិមនុស្ស Human Rights Watch បាននិយាយថា រដ្ឋាភិបាលវៀតណាមបានបង្កើនការគាបសង្កត់លើសកម្មជន និងក្រុមប្រឆាំងរដ្ឋាភិបាលយ៉ាងខ្លាំង ដោយបានបង្ក្រាបលើសេរីភាពនៃការបញ្ចេញមតិ និងសមាគម និងការប្រមូលផ្ដុំតវ៉ា។
របាយការណ៍បានបន្តថា សកម្មជន និងអ្នកប្រឆាំងទាំងនោះ ប្រឈមមុខនិងការគំរាមកំហែងចាប់ខ្លួន ការធ្វើទារុណកម្ម និងការចាប់ដាក់គុក។ ប៉ុន្តែមន្ត្រីអ្នកនាំពាក្យនៃស្ថានទូតវៀតណាមនៅកម្ពុជា ធ្លាប់បានប្រតិកម្មប្រាប់វិទ្យុអាស៊ីសេរីភាសាវៀតណាមសប្ដាហ៍ថ្មីៗនេះថា របាយការណ៍នោះ គឺជាការចោទប្រកាន់ខុសការពិត និងជារបាយការណ៍ផ្អែកលើភាគីតែម្ខាង៕
រឿងដែលគេអានច្រើនបំផុត
RFA
- គណបក្សភ្លើងទៀនស្វាគមន៍វត្តមានលោក រ៉ុង ឈុន អតីតមន្ត្រីជាន់ខ្ពស់ គ.ជ.ប ដែលហក់មកចូលរួមជីវភាពជាមួយគណបក្សនេះ
- សហរដ្ឋអាមេរិកផ្ដល់ពានរង្វាន់អ្នកការពារសិទ្ធិមនុស្សប្រចាំឆ្នាំដល់កញ្ញា ឈឹម ស៊ីថរ
- អ្នកវិភាគថា លោក ហ៊ុន ម៉ាណែត បកស្រាយបំភ្លៃច្បាប់បោះឆ្នោតជ្រើសតាំងតំណាងរាស្ត្រ
- «យុទ្ធសាស្ត្របំបែកគណបក្សប្រឆាំងនឹងបរាជ័យ បើលោក សម រង្ស៊ី វិលចូលស្រុកវិញ»
- អ្នកឃ្លាំមើលថា គណបក្សប្រជាជនកម្ពុជាពុំបានប្រកាន់ជំហរគោលនយោបាយបរទេសឯករាជ្យ