ប្រជាពលរដ្ឋដែលមកច្រើនសន្ធឹកសន្ធាប់បែបនេះ គឺបន្ទាប់ពីសាលាខេត្តក្រចេះបានចេញលិខិតអញ្ជើញតំណាងប្រជាពលរដ្ឋ៥នាក់ដើម្បីឲ្យចូលបំភ្លឺលើករណីពាក្យបណ្ដឹងចោទប្រកាន់ស្ដីពីការរំលោភបំពានយកដីធ្លីរបស់ក្រុមហ៊ុនហាក់មុនី Plantation ប៉ុន្តែប្រជាពលរដ្ឋបានរារាំងជនទាំង៥នាក់នោះមិនឲ្យចូល ដោយសំអាងថាខ្លាចមានការចាប់ខ្លួននិងថាមិនមែនជាដីរបស់បុគ្គលតែ៥នាក់នោះទេ។
ស្រ្ដីជនជាតិព្នងបានស្រែកទាំងកំហឹងប្រាប់ឲ្យគេដឹងថា ក្រុមហ៊ុននោះបានឈូសឆាយប៉ះពាល់លើដីចម្ការនិងដីតំណម ៖ «កាច់ពួកក្រុមហ៊ុនវាឈូសឆាយផ្នូរខ្មោចជីដូនជីតា រំលោភស្រែចម្ការអស់រលីង...។ អាពួកក្រុមហ៊ុនហ្នឹងវាបោះឆ្នោតឲ្យ ពួកប្រជាពលរដ្ឋម៉េចបោះឲ្យ»។
ប្រជាពលរដ្ឋបានស្រែកសន្ធាប់យ៉ាងខ្លាំងៗថា មេឃុំបានយកដីប្រជាពលរដ្ឋលក់ទៅឲ្យក្រុមហ៊ុន ៖ «ចុងក្រោយល្បិចមេឃុំយកដីប្រជាពលរដ្ឋលក់ឲ្យគេអស់រលីង ទៅវិញបាតុកម្មមេឃុំដុតចោលទៀត ទៅពីនេះដុតផ្ទះមេឃុំឲ្យអស់។ មេឃុំលក់ទឹកដី មេឃុំពុករលួយ»។
មេឃុំចង្រ្កង់ គឺលោក សុខ រ៉ន ធ្លាប់បានបំភ្លឺជាច្រើនសាហើយថា លោកបានចុះហត្ថលេខាក្រោយការចុះហត្ថលេខាសម្រេចជាមុនពីថ្នាក់លើ ប៉ុន្តែលោកធ្លាប់បានចោទប្រកាន់ថា ប្រជាពលរដ្ឋទាំងនោះបានទៅចាប់ដីដោយខុសច្បាប់លើដីរដ្ឋ។
ការតវ៉ាដែលមានកាន់រូបថតមេដឹកនាំគណបក្សប្រជាជនទាំង៣រូប ព្រមទាំងបដាដែលសរសេរទាមទារសិទ្ធិអំពីការតវ៉ានិងបដាផ្ដន្ទាអ្នកប្រព្រឹត្តអំពើពុករលួយឲ្យទេព្ដាបរាមុខនិងស្លាប់ដោយតៃហោងផងនោះ ធ្វើឲ្យមានការអន្តរាគមន៍ពីនាយរងខុទ្ទកាល័យខេត្តក្រចេះ គឺលោក ជិន ហុងស្រ៊ី ប៉ុន្តែការដោះស្រាយនោះមិនអាចធ្វើទៅបានដែរ។
លោក ជិន ហុងស្រ៊ី បានមានប្រសាសន៍ថា ៖ «មកសុំដោះស្រាយឬមកធ្វើអី? បើមកសុំដោះស្រាយគឺស្ដាប់អត់បានទេ ហៅតំណាងមកតែ៥នាក់ទេ?»។
ប្រជាពលរដ្ឋ ៖ អត់ទេ អត់មាននរណាតំណាងទេ។
ស្ថិតនៅក្នុងស្ថានភាពស្ដាប់គ្នាលែងបានបែបនេះ នាយរងខុទ្ទកាល័យខេត្ត គឺលោក ជិន ហុងស្រ៊ី បានសំណូមពរឲ្យប្រជាពលរដ្ឋត្រឡប់ទៅវិញ ដោយរង់ចាំអាជ្ញាធរចុះទៅដោះស្រាយផ្ទាល់ ប៉ុន្តែប្រជាពលរដ្ឋទាំងនោះបានអះអាងថា បើពុំមានការដោះស្រាយទេនោះពួកគេនឹងដុតបំផ្លាញគ្រឿងច្រករបស់ក្រុមហ៊ុនដែលចូលទៅកាន់ដីទំនាស់នោះ។
សូមជម្រាបថា ក្រុមហ៊ុនហាក់មុនី Plantation បានទទួលសិទ្ធិអភិវឌ្ឍដាំដុះកៅស៊ូលើផ្ទៃដីចំនួន៦២៣ហិកតារនៅឃុំចង្រ្កង់ ស្រុកក្រចេះ ហើយក៏ត្រូវបានប្រជាពលរដ្ឋរារាំងប្រមាណ២ខែកន្លងមក ហើយដោយចោទថាឈូសឆាយប៉ះពាល់លើដីផលិតនិងដីព្រៃតំណមរបស់ជនជាតិភាគតិច៕