អ្នកស្រី ស៊ឹម វ៉ាណូ ប្រជាពលរដ្ឋក្នុងភូមិសាឯម ឃុំកន្ទួត ស្រុកជាំក្សាន្ត ខេត្តព្រះវិហារ មានប្រសាសន៍ប្រាប់វិទ្យុអាស៊ីសេរីនៅព្រឹកថ្ងៃ២៥ ធ្នូ ថា ដីប្រមាណ៦ហិកតារនេះគ្រួសារអ្នកស្រីបានកាន់កាប់និងបង្កបង្កើនផល ព្រមទាំងសង់លំនៅឋានរស់នៅអស់រយៈពេលជាង៥ឆ្នាំមកហើយ ស្រាប់តែឥឡូវទាហានក្នុងកងវរសេនាតូចលេខ១២២មកបណ្តេញគ្រួសារគាត់ មិនតែប៉ុណ្ណោះនាយសេនាធិការកងវរសេនាតូចលេខនេះ ឈ្មោះ ស៊ិន សុផាត ហៅ ធា បានប្រើហិង្សាអាររំលំផ្ទះគាត់ចោលទៀតផង។
អ្នកស្រី ស៊ឹម វ៉ាណូ បានបញ្ជាក់ថា ៖ «គ្រួសារខ្ញុំ ហើយបងមើលជនពិការទៀត ហើយប្ដីខ្ញុំដាច់ជើង... ដោយសារប្រទេសជាតិ ហើយខំធ្វើស្រែប៉ុណ្ណេះហើយ ញើសឈាមហូរចង់កើតជាអូរ កើតប្រឡាយហើយ ហេតុអីបានជាទាហានទៅរុះរើ? តែពាក្យមួយម៉ាត់បើប្រាប់ក៏អស់ចិត្តដែរ គ្មានប្រាប់សោះ បានជាខ្ញុំនឹកឃើញឆ្អែតចិត្ត ខ្ញុំយំស្រែកពេញហ្នឹងឯង»។
តំណាងប្រជាពលរដ្ឋម្នាក់ដែលសុំមិនបញ្ចេញឈ្មោះដើម្បីការពារសុវត្ថិភាពផ្ទាល់ខ្លួនបន្ថែមថា ៖ «គាត់មកដេញថ្ងៃទី១៩ ដល់ថ្ងៃទី២០ហ្នឹង គាត់ឲ្យរងគាត់មកដេញមួយសាទៀត។ ខ្លះដល់ពេលគ្នាភ័យពេកទៅក៏រើប្រផាត់ប្រភីង រយះឫស្សី បាក់សសរបាក់អី ខ្លះក៏អត់ដឹងថាដួលទេ ភ័យពេកក៏រត់ទៅស្រុក»។
មេភូមិសាឯម លោក ប្រាក់ សុភី មានប្រសាសន៍ថា លោកបានធ្វើរបាយការណ៍ពីបញ្ហានេះជូនថ្នាក់លើរួចរាល់អស់ហើយ។ លោកបន្តថា លោកក៏ពុំបានដឹងច្បាស់ថាតើក្រុមទាហានវរសេនាតូចលេខ១២២នេះ គេមានគម្រោងវាតយកដីទំហំប៉ុន្មានហើយត្រូវប៉ះពាល់ដីប្រជាពលរដ្ឋក្នុងភូមិប៉ុន្មានគ្រួសារនោះដែរទេ។
លោក ប្រាក់ សុភី បានមានប្រសាសន៍ថា ៖ «ម្ចាស់ខ្ទមគាត់មកប្រាប់ខ្ញុំហ្នឹង ខ្ញុំធ្វើកំណត់ហេតុ ដល់ភូមិ ដល់ឃុំ ដល់ស្រុក ដល់ខេត្តអស់ហើយ។ ឲ្យខាងឃុំហ្នឹងដោះស្រាយជូនប្រជាពលរដ្ឋរបស់ខ្ញុំ មូលហេតុអីបានគាត់ទៅកាត់ផ្ទះប្រជាពលរដ្ឋផន់ខ្ញុំអ៊ីចឹង?»។
មេឃុំកន្ទួត លោក មូល ម៉ាប់ ក៏បានទទួលស្គាល់ដែរថា ប្រជាពលរដ្ឋបានមកកាន់កាប់ដីធ្លីនេះជាយូរឆ្នាំមកហើយមែន ៖ «កាន់កាប់យូរហើយ ស្រែគេធ្វើប្រមាណពីរបីឆ្នាំមកហើយ»។
ប្រធានកងវរសេនាតូចលេខ១២២ លោក កាន់ លន់ មានប្រសាសន៍ថា លោកពុំបានដឹងរឿងនេះទេ ព្រោះលោកជាប់ទៅបំពេញការងារនៅទីតាំងផ្សេងទើបតែត្រឡប់មកវិញ ៖ «ទេអត់ដឹងដែរទេ ខ្ញុំអត់ដឹងទេ ព្រោះអីខ្ញុំនៅជាប់រវល់ការងារនៅឯផ្ទះសម្បែង...»។
គួរបញ្ជាក់ដែរថា កងវរសេនាតូចលេខ១២២ ចំណុះកងពលលេខ១២ការពារព្រំដែននេះទើបតែមកបោះទីតាំងនៅក្នុងភូមិសាស្ត្រភូមិសាឯម ឃុំកន្ទួត រយៈពេលប្រមាណជាង២ខែប៉ុណ្ណោះ៕