អ្នក​ភូមិ​នៅ​បាត់ដំបង​សុំ​ឲ្យ​សាលា​ស្រុក​ដោះស្រាយ​រឿង​ដី​ធ្លី​ជាមួយ​ប៉េអឹម

ពលរដ្ឋ​ជិត ១០០​នាក់ នៅ​ព្រឹក​ថ្ងៃ​អង្គារ​នេះ​បាន​នាំ​គ្នា​ធ្វើ​ដំណើរ​ទៅ​សាលា​ស្រុក​គាស់ក្រឡ ដើម្បី​ដាក់​ពាក្យ​បណ្ដឹង​ទៅ​ការិយាល័យ​ទទួល​ពាក្យ​បណ្ដឹង​ដោះស្រាយ​ទំនាស់​ដី​ធ្លី​ថ្នាក់​ស្រុក ឲ្យ​ជួយ​ដោះស្រាយ​ដី​ធ្លី​ដែល​កើត​មាន​ទំនាស់​ជាមួយ​មន្ត្រី​កង​រាជ​អាវុធ​ហត្ថ​ម្នាក់ ឈ្មោះ ឡុង ស៊ីណារ៉េ។
ដោយ សួន សុផលមុន្នី
2010-03-30
អ៊ីម៉ែល
មតិ
Share
បោះពុម្ព

លោក សុ នី អាយុ ៣៧​ឆ្នាំ បាន​មាន​ប្រសាសន៍​ថា ប្រជាពលរដ្ឋ​ជិត ១០០​នាក់​ក្នុង​ចំណោម​អ្នក​ភូមិ ៤១៥​គ្រួសារ នៅ​ភូមិ​អណ្ដូង​កន្ទួត ឃុំ​ដូនបា ស្រុក​គាស់ក្រឡ បាន​ជិះ​ម៉ាស៊ីន​គោ​យន្ត​ច្នៃ​ចំនួន ៤​គ្រឿង ទៅ​សាលា​ស្រុក​គាស់ក្រឡ ដាក់​ពាក្យ​បណ្ដឹង​សុំ​ឲ្យ​អាជ្ញាធរ​ជួយ​ដោះស្រាយ​ទំនាស់​ដី​ធ្លី​ជូន​ពួក​គាត់។

លោក សុ នី បាន​បញ្ជាក់​ថា ៖ «ភូមិ​ខ្ញុំ​មាន ៤១៥​គ្រួសារ ប៉ុន្តែ​ឡើង​មក​ថ្ងៃ​នេះ ១០០​គ្រួសារ។ ទំនាស់​ដី​ជាមួយ ឡុង ស៊ីណារ៉េ ប៉េអឹម​លើ​ផ្ទៃ​ប្រទេស មិន​ដែល​ឃើញ​មុខ​ផង ទើប​ទៅ​យក​អា​គ្រឿង​ឈូស​ឆាយ ចាប់​តាំង​ពី​ថ្ងៃ​ទី​៥ ខែ​៣។ មាន​ឈូស​ផ្ទះ​ខ្លះ ផ្ទះ​ឈូស​អស់ ១​ខ្នង ហើយ​ដុត​ផ្ទះ​អស់ ២​ខ្នង ឈូស​ផ្លូវ ដើម​ដូង​ប្រជាពលរដ្ឋ​អី ឈូស​ដាច់​ដើម​ដូង​អស់!»

លោក​ស្រី ឃុន ណាក់ អាយុ ៣០​ឆ្នាំ បាន​ថ្លែង​ថា លោក​ស្រី​មាន​ដី​ចម្ការ​ទំហំ ២​ហិកតា ដី​លំនៅ​ឋាន​ទំហំ ២០​ម៉ែត្រ គុណ​នឹង ១០០​ម៉ែត្រ រស់នៅ​ទី​នោះ​តាំង​ពី​ឆ្នាំ​១៩៩៩ ប៉ុន្តែ​ថ្មី​ៗ​នេះ​ត្រូវ​បាន​គេ​ហាម​ឃាត់​មិន​ឲ្យ​បង្ក​បង្កើន​ផល។

លោក​ស្រី ឃុន ណាក់ បាន​ឲ្យ​ដឹង​ថា ៖ «ដាំ​អត់​បាន​ផង ព្រោះ​កាល​ណា​ខ្ញុំ​ដាំ​ទៅ គេ​ចេញ​ក្រដាស​ដីកា​ឃាត់ អត់​ឲ្យ​ខ្ញុំ​ដាំ​អី​ទេ ហើយ​ឥឡូវ​ហ្នឹង​ភ្លឺ​ស្រែ​ខ្ញុំ​អី​ហ្នឹង លោក ឡុង ស៊ីណារ៉េ យក​ប្រដាប់​ឈូស​ទៅ​ឈូស​ភ្លឺ​អី​ចេញ​អស់​ហើយ របង​អី​ហ្នឹង​ឈូស​អស់​ហើយ!»

ក្រុម​អ្នក​ភូមិ​បាន​អះអាង​ថា ពួក​គាត់​បាន​ដាក់​ពាក្យ​បណ្ដឹង​ដាច់​ដោយ​ឡែក​ពី​គ្នា​ទៅ​តាម​ទំហំ​ដី​ដែល​បាន​កាន់កាប់​បង្ក​បង្កើន​ផល បន្ទាប់​ពី​លោក ចិន សំអន មេ​ឃុំ​ដូនបា​កន្លង​ទៅ​ថ្មី​ៗ​នេះ បាន​ចេញ​លិខិត​មួយ​បញ្ជាក់​ថា ដី​ដែល​អ្នក​ភូមិ​រស់​នៅ​បង្ក​បង្កើន​ផល​នោះ មាន​ម្ចាស់​កម្មសិទ្ធិ ៖ «ឲ្យ​យើង​រុះរើ​ផ្ទះ​សម្បែង ថា​ដី​ហ្នឹង​ជា​ដី​កម្មសិទ្ធិ​របស់​គេ​ហើយ ប៉ុន្តែ​មិន​ដឹង​គេ​ណា​ទេ ដាក់​ក្នុង​ហ្នឹង​អត់​មាន​ឈ្មោះ​ពិត​ប្រាកដ​ទេ។ អ្នក​ខ្លះ ២​ហិកតា អ្នក​ខ្លះ ៤ អ្នក​ខ្លះ ៥​ហិកតា​ទៅ មាន​ដំណាំ​មាន​អី​អស់​ហើយ ដើម​ស្វាយ​លិច​ក្បាល​អស់​ហើយ!»

ទាក់ទិន​នឹង​ការ​តវ៉ា​របស់​ក្រុម​អ្នក​ភូមិ​ខាង​លើ​នេះ លោក ស៊ិន ញ៉ា អភិបាល​ស្រុក​គាស់ក្រឡ មិន​អាច​ទាក់ទង​សុំ​ការ​បញ្ជាក់​បាន​ទេ ដោយ​លោក​មាន​ប្រសាសន៍​ថា លោក​កំពុង​ជាប់​ប្រជុំ។

លោក ឡុង ស៊ីណារ៉េ ដែល​មាន​ជម្លោះ​ដី​ធ្លី​ជាមួយ​អ្នក​ភូមិ​ខាង​លើ ក៏​មិន​អាច​ទាក់ទង​សុំ​ការ​បញ្ជាក់​បាន​ដែរ។ ប៉ុន្តែ​លោក ចិន សំអន មេ​ឃុំ​ដូនបា បាន​មាន​ប្រសាសន៍​ថា លោក ស៊ីណារ៉េ មាន​ដី​នៅ​ទី​នោះ ប៉ុន្តែ​លោក​មិន​ដឹង​ថា ទំហំ​ប៉ុន្មាន​ទេ។

លោក ចិន សំអន បាន​អះអាង​ថា ៖ «ឡុង ស៊ីណារ៉េ គាត់​មាន​មែន។ គ្នា​គាត់​ច្រើន គាត់​ហ្នឹង​ជា​តំណាង​មួយ។ ខ្ញុំ​អត់​ច្បាស់​ទំហំ​ដី​គាត់​សរុប​ទាំង​អស់​ដែរ»

មន្ត្រី​សិទ្ធិ​មនុស្ស​នៃ​សមាគម អាដហុក លោក យិន ម៉េងលី បាន​មាន​ប្រសាសន៍​ថា ទំនាស់​ដី​នៅ​ភូមិ​ខាង​លើ​កើត​មាន​ទំនាស់​រ៉ាំរ៉ៃ​ជា​ច្រើន​ក្រុម ហើយ​អស់​លោក​មន្ត្រី​ខ្លះ​នៅ​ពី​ក្រោយ​ខ្នង​ប្រជាពលរដ្ឋ​រហូត​មាន​ការ​ចោទ​ប្រកាន់​មក​លើ​មន្ត្រី​សិទ្ធិ​មនុស្ស។

លោក យិន ម៉េងលី បាន​មាន​ប្រសាសន៍​ថា ៖ «រហូត​មាន​ការ​លើក​បដា​មក​តវ៉ា​ចោទ​ប្រកាន់​ខាង​សិទ្ធិ​មនុស្ស​នេះ ថា ការពារ​ជន​ខិល​ខូច ចោទ​ប្រកាន់​រូប​ខ្ញុំ​ថា សុទ្ធ​តែ​ដើរ​ធ្វើ​អាជីវកម្ម។ តែ​ទាក់ទិន​នឹង​បញ្ហា​ថា មាន​លេច​មេ​ប៉េអឹម​ណា​ម្នាក់​មក​ពាក់ព័ន្ធ​បញ្ហា​នេះ។ នេះ​ជា​បញ្ហា​ថ្មី​ដែល​លេច​ឡើង​មក​ទៀត​ហើយ»

លោក​បាន​ស្នើ​ឲ្យ​អាជ្ញាធរ​ខេត្ត​ពន្លឿន​ការ​ដោះស្រាយ ទី​១ ត្រូវ​ក្ដាប់​ឲ្យ​បាន​ថា នៅ​ទី​នោះ​មាន​ប៉ុន្មាន​ក្រុម ទី​២ រក​ឲ្យ​ឃើញ​ផ្ទៃ​ដី​ដែល​មាន​ទំនាស់​មាន​ប៉ុន្មាន ដើម្បី​ធ្វើ​ការ​ដោះស្រាយ ព្រោះ​កន្លង​មក​គណៈកម្មការ​មួយ​ត្រូវ​បាន​បង្កើត​ឡើង​ដើម្បី​ដោះស្រាយ​ទំនាស់​ដី​ខាង​លើ​នេះ​ដែរ តែ​ដោះស្រាយ​ពុំ​មាន​លទ្ធផល៕

ព័ត៌មាន (0)
Share
គេហទំព័រ​ទាំងមូល