តំណាងប្រជាពលរដ្ឋគឺលោក ផេង រុំ មានប្រសាសន៍ប្រាប់វិទ្យុអាស៊ីសេរីនៅថ្ងៃទី៣ កុម្ភៈ ថា កាលពីថ្ងៃទី២៩ មករា ប្រធានក្រុមហ៊ុន ខេឌីស៊ី លោកស្រី ជា ខេង បានចុះមកជួបជាមួយប្រជាពលរដ្ឋ ហើយបានសន្យាថា នឹងធ្វើការស្រាវជ្រាវឲ្យច្បាស់លាស់ឡើងវិញចំពោះការអះអាងរបស់ប្រជាពលរដ្ឋដែលថា មានអ្នកខ្លះមិនបានលក់ដីជូនអ្នកស្រីនោះ។
លោក ផេង រុំ បានបញ្ជាក់ថា ៖ «ខ្ញុំគ្រាន់តែថា មានសង្ឃឹម ៥០% ដែរ ព្រោះ សយ សុភាព គាត់បានចុះមកដោះស្រាយដើម្បីរកភាពយុត្តិធម៌ជូនប្រជាពលរដ្ឋ»។
ប្រជាពលរដ្ឋឈ្មោះ ផេង ទុំ បន្ថែមថា ៖ «ខ្ញុំយល់ថា យើងមានសង្ឃឹមប្រហែល ៥០% ដែរ តាមចិត្តខ្ញុំណា៎ ព្រោះគេមកសម្របសម្រួលហ្នឹង គេសម្របសម្រួលហើយ ប៉ុន្តែគេឈូសនៅតែឈូស ហើយ សយ សុភាព គាត់ចុះមកគាត់ថា គ្មានឲ្យអ្នកណាធ្វើលើដីទំនាស់ហ្នឹងទេ ប៉ុន្តែបើក្រុមហ៊ុនចេះតែឈូសមករហូតអ៊ីចឹង»។
មណ្ឌលកែវ ៖ អ៊ីចឹងឥឡូវគេនៅតែធ្វើដដែល? ផេង ទុំ ៖ បាទគេនៅតែធ្វើ ដើមត្នោតរលំអស់រលីងហើយ។
កាលពីថ្ងៃទី២៩ មករាកន្លងទៅនេះ ដោយមានការសម្របសម្រួលពីតំណាងសមាគម អាដហុក ការពារសិទ្ធិមនុស្ស គឺលោក ចាន់ សុវ៉េត និងប្រធានមជ្ឈមណ្ឌលព័ត៌មានដើមអម្ពិល គឺលោក សយ សុភាព នាយិកាក្រុមហ៊ុន ខេឌីស៊ី គឺលោកស្រី ជា ខេង បានចុះមកជួបផ្ទាល់ជាមួយប្រជាពលរដ្ឋជាលើកទី១ ដើម្បីស្វែងយល់អំពីការទាមទាររបស់ប្រជាពលរដ្ឋ ដែលកន្លងទៅបានចោទប្រកាន់ថា ក្រុមហ៊ុនបានរំលោភយកដីរបស់ពួកគាត់។ ចំណែកក្រុមហ៊ុនបានអះអាងថា ដីនេះបានទិញដោយស្របច្បាប់ពីប្រជាពលរដ្ឋ។
មានប្រសាសន៍ក្នុងការជួបគ្នាកាលពីថ្ងៃទី២៩ មករាកន្លងទៅ លោកស្រី ជា ខេង នៅតែអះអាងថា លោកស្រីមានឯកសារគ្រប់គ្រាន់បញ្ជាក់ថា បានទិញដីពីប្រជាពលរដ្ឋ។
លោកស្រី ជា ខេង បានឲ្យដឹងថា ៖ «មេដៃមិនមែនធម្មតាឯណាអ៊ំអើយ! អ្នកណាខ្វាក់ភ្នែកក៏មើលឃើញ មើលឃើញថា មេដៃផ្ដិតប៉ុន្មានដង។ អ៊ីចឹងហើយខ្ញុំចង់តែជម្រាបបងៗថា អ្វីដែលខ្ញុំធ្វើនេះ គឺខ្ញុំអត់អីទេ អ៊ំផ្ដិតចុះ... ធ្វើចុះ ប៉ុន្តែខ្ញុំមានឯកសារ»។
មន្ត្រីផ្នែកអង្កេតជាន់ខ្ពស់សមាគម អាដហុក គឺលោក ចាន់ សុវ៉េត សម្ដែងពីសុទិដ្ឋិនិយមចំពោះជំនួបនេះថា នឹងទទួលបានផលជាផ្លែផ្កា ៖ «យើងគិតថា វានឹងអាចដោះស្រាយចេញ ក្រោយពីយើងធ្វើការសិក្សាស្រាវជ្រាវទៅ យើងឃើញថា ទំហំដីដែលមានទំនាស់ វាមិនដល់ ១០០ហិកតាផង និយាយរួម ហើយក៏ប្រជាពលរដ្ឋមួយចំនួនដែលបានប្ដឹង ៦៤គ្រួសារនោះ ក៏មិនកំណត់ថា ប្រជាពលរដ្ឋទាំងអស់នោះជាប់ពាក់ព័ន្ធជាមួយតែក្រុមហ៊ុន ខេឌីស៊ី ដែរ វាអាចជាប់ពាក់ព័ន្ធជាមួយក្រុមហ៊ុនផ្សេងទៀតដែលនៅក្បែរនោះ»។
លោក ចាន់ សុវ៉េត មានប្រសាសន៍ថា បច្ចុប្បន្នប្រជាពលរដ្ឋកំពុងធ្វើការជំរឿនអំពីប្រវត្តិ, ទំហំ និងព្រំប្រទល់ដីដែលពួកគាត់អះអាងថាបានកាន់កាប់នោះ ដើម្បីជាឯកសារសំអាងនៅពេលមានដំណោះស្រាយជាមួយក្រុមហ៊ុន៕