នាយខុទ្ទកាល័យ និងជាអនុប្រធានព័ត៌មាន និងទំនាក់ទំនងនៃគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី មានប្រសាសន៍ថា រន្ទះបាញ់ក្រៅពីបណ្ដាលឲ្យមនុស្សស្លាប់ និងរបួស ក៏បានធ្វើឲ្យសត្វ គោ ក្របី ងាប់ចំនួន ៤៨ក្បាល និងខូចខាតផ្ទះប្រមាណ ៣ខ្នងផងដែរ នៅក្នុងរយៈពេល ៦ខែដើមឆ្នាំ២០១១នេះ។
លោកបន្តដូច្នេះ ៖ «នៅស្វាយរៀងមានម្នាក់ នៅព្រៃវែងមាន ៤នាក់ ហើយនៅខេត្តឧត្តរមានជ័យ មានម្នាក់។ កាលពីថ្ងៃ២៨ នៅស្វាយរៀង ហើយនៅព្រៃវែង កាលពីថ្ងៃ២៨ មាន ២កន្លែង មាននៅក្នុងស្រុកកំពង់ត្របែក និងស្រុកព្រះស្ដេច ១កន្លែង និងនៅខេត្តឧត្តរមានជ័យថ្ងៃ២៩»។
ប្រធានគម្រោងបញ្ជ្រាបការកាត់បន្ថយគ្រោះភ័យនៃគ្រោះមហន្តរាយ និងការគ្រប់គ្រងគ្រោះមហន្តរាយនៅក្នុងកម្មវិធីអភិវឌ្ឍន៍តំបន់ និងសហគមន៍របស់អង្គការទស្សនៈពិភពលោក លោក សន ពុទ្ធី បានថ្លែងថា ខិត្តប័ណ្ណបោះចែកចាយពីវិធីការពារបាតុភូតរន្ទះបាញ់ដោយសាខាកាកបាទក្រហម បានពន្យល់ថា ឥទ្ធិពលនៃរន្ទះ គឺវាតែងតែបាញ់ ហើយនិងបង្កគ្រោះថ្នាក់មកលើមនុស្ស សត្វ នៅពេលដែលនៅទីវាលពុំមានការការពារសមស្រប។
លោកបន្តថា រន្ទះបាញ់ច្រើនកើតឡើងក្នុងរដូវវស្សានៅពេលរសៀលមេឃក្ដៅខ្លាំង ហើយមានភ្លៀងធ្លាក់។ រន្ទះបាញ់នៅកន្លែងដដែលៗញឹកញាប់។ រន្ទះបាញ់លើវត្ថុដែលនៅខ្ពស់ជាងគេ មានជាតិដែក និងនៅកន្លែងមានទឹក។ រន្ទះបាញ់មកលើខ្លួនមនុស្ស ឬសត្វ ដែលខ្លួនទទឹក ឬមនុស្សសត្វឈរនៅទីវាលលំហ ធ្វើឲ្យស្រូបយកពពកដែលវាខិតជិតមកលើផែនដី ព្រោះមនុស្ស សត្វ ជាភ្នាក់ងារចម្លងចរន្ត។ មនុស្សអាចដឹងថា រន្ទះនឹងបាញ់មកលើខ្លួននៅពេលដែលក្នុងខ្លួនមានអារម្មណ៍ព្រឺៗចុងសក់ ព្រឺរោម គឺនៅពេលនោះហើយចរន្តរន្ទះកំពុងឆ្លងកាត់ខ្លួនយើង។
លោក សន ពុទ្ធី ប្រាប់ពីវិធីការពារខ្លួនពីរន្ទះបាញ់ថា នៅពេលមេឃជិតភ្លៀង អំឡុងពេលភ្លៀង និងក្រោយពេលភ្លៀង ពលរដ្ឋទូទៅត្រូវការពារខ្លួនដោយមិនត្រូវជ្រកក្រោមដើមឈើខ្ពស់ដុះដាច់តែឯង មិនគួរឈរនៅកណ្ដាលវាល ឈរនៅដាច់តែឯង ឈរនៅលើដំបូក ឈរលើដំបូលផ្ទះដែលគ្មានប្រក់អ្វីពីលើ មិនឈរនៅក្បែរបង្អួចដែលសង់ពីដែក បើនៅក្នុងរថយន្ត ត្រូវបិទទ្វារ និងកញ្ចក់ឲ្យជិត មិនត្រូវកាន់វត្ថុមានជាតិដែក ដូចជាកាំបិត ចប ពូថៅ ត្រូវបិទទូរស័ព្ទ បិទទូរទស្សន៍ បិទវិទ្យុ បិទកុំព្យូទ័រ ដែលប្រើអ៊ិនធឺណិត(Internet) ត្រូវដកឌុយភ្លើងចេញពីចរន្តអគ្គិសនីឲ្យបាន ៣ម៉ែត្រជាដើម។
លោក សន ពុទ្ធី បន្តថា ៖ «យើងគួរឈរនៅក្បែរដើមឈើដែលដុះទាបៗ ដុះផ្ដុំគ្នាច្រើនដើមបានវាប្រសើរជាង បើយើងឈរនៅក្រោមដើមឈើ១ដើមដាច់តែឯង យើងមិនត្រូវជ្រកនៅក្រោមរានហាល មានន័យថា ជម្រកដែលចំហ ដូចជារោងកីឡា ឬក៏រោងចាំវាលផ្សេងៗ ដោយអត់មានទ្វារ អត់មានជញ្ជាំងអីបាំងជិត បើយើងស្ថិតនៅក្នុង ឬក្រៅអគារ គឺយើងមិនត្រូវឈរនៅក្បែររបស់ដែលធ្វើពីដែក ដូចជាបំពង់អង់តែន ឬបង្គោលភ្លើង ឬក្ដោងទ្វារ របងដែក ប៉មទូរស័ព្ទអីហ្នឹង ដែលយើងមិនអាចឈរនៅក្បែរហ្នឹងបានទេ ព្រោះវាអាចឆក់ ឬក៏ស្រូបបង្គោលដែកហ្នឹងទៅ ហើយវាឆ្លងមកដល់ខ្លួនយើង»។
នាយខុទ្ទកាល័យ និងជាអនុប្រធានព័ត៌មាន និងទំនាក់ទំនងនៃគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី មានប្រសាសន៍បញ្ជាក់ដែរថា នៅតាមទីជនបទពុំមានបង្គោលសម្រាប់ ការពាររន្ទះបាញ់នោះទេ នៅក្រុងភ្នំពេញ មានបង្គោលការពាររន្ទះបាញ់នោះប្រមាណ ២០% នៃចំនួនសំណង់ទូទៅ មានដូចជាផ្ទះ និងអគាររដ្ឋ។ បង្គោលការពាររន្ទះមានតម្លៃថ្លៃ ទើបមិនសូវមានដាក់ការពាររន្ទះ៕