ក្រុមចោរបានបាញ់សម្លាប់មន្ត្រីកងរាជអាវុធហត្ថម្នាក់ នៅក្នុងសកម្មភាពប្លន់ប្រដាប់អាវុធមួយនៅក្នុងរាជធានីភ្នំពេញ កាលពីវេលាម៉ោងប្រមាណ ៧និង១០នាទីយប់មិញ។
ស្នងការប៉ូលិសរាជធានីភ្នំពេញ លោកឧត្តមសេនីយ៍ ទូច ណារ៉ុថ បានមានប្រសាសន៍ថា នេះគឺជាការប្លន់ប្រដាប់អាវុធលើកទីមួយហើយនៅក្នុងសប្តាហ៍នេះ ក្រោយការស្ងប់មួយរយៈនាពេលកិច្ចពង្រីកការពារសន្តិសុខក្នុងរយៈពេលបុណ្យអុំទូកបណ្តែតប្រទីបកន្លងមកនេះ។
ប្រភពពីអាជ្ញាធរបានឲ្យដឹងថា វរសេនីយ៍ទោកងរាជអាវុធហត្ថ លោក ងួន ប៊ុនហេង អាយុ ២៧ឆ្នាំ នាយរងការិយាល័យ ១បេ នៃកងរាជអាវុធហត្ថលើផ្ទៃប្រទេស ត្រូវចោរបាញ់ស្លាប់នៅពេលបានដេញតាមពួកចោរប្លន់ដែលមានគ្នា២នាក់ ក្រោយសកម្មភាពប្លន់មួយដែលពួកចោរបានធ្វើទៅលើភរិយារបស់លោកនៅខណ្ឌចម្ការមន។
សេចក្តីរាយការណ៍បានឲ្យដឹងថា នាយកងរាជអាវុធហត្ថនោះ នៅពេលទើបមកដល់ផ្ទះកាលពីល្ងាចមិញ ក៏ប្រទះឃើញចោរ២នាក់បានប្លន់ប្រពន្ធនៅនឹងផ្ទះ ហើយបានឡើងជិះម៉ូតូរត់ភ្លាម បន្ទាប់ពីឃើញនាយកងរាជអាវុធហត្ថជាប្តីនោះបានមកដល់។
លោកវរសេនីយ៍ទោប៉េអឹមក៏បានបើកឡានដេញតាមជនសង្ស័យទាំង២ ហើយបុកពីក្រោយ។ ជនសង្ស័យម្នាក់បានស្លាប់ និងម្នាក់ទៀតដែលបានរងរបួសដោយការដួល បានដកកាំភ្លើងបាញ់ចំនួន៣គ្រាប់ចំនាយប៉េអឹមនោះស្លាប់ទៅ។
ស្នងការប៉ូលិសរាជធានីភ្នំពេញលោកឧត្តមសេនីយ៍ ទូច ណារ៉ុថ បានមានប្រសាសន៍បញ្ជាក់អំពីហេតុការណ៍នោះសាឡើងវិញដោយបញ្ជាក់ថា ជនសង្ស័យម្នាក់ទៀតត្រូវសមត្ថកិច្ចចាប់បានហើយ ៖ «យើងចាប់បានហើយ។ យើងកំពុងតែធ្វើការសាកសួរ ក៏ប៉ុន្តែជនល្មើសហ្នឹងរងរបួស ហើយយើងកំពុងព្យាបាលឲ្យមានស្ថានភាពល្អឡើងវិញដើម្បីយកចម្លើយរបស់វាហ្នឹង។ ខ្ញុំជឿថា ជនល្មើសវាឆ្លៀតឱកាសក្នុងពេលដែលសមត្ថកិច្ចមមាញឹកក្នុងការការពារបុណ្យអុំទូកប៉ុន្មានថ្ងៃនេះ។ ក្នុងប៉ុន្មានថ្ងៃនៃបុណ្យអុំទូកនេះ យើងឃើញថា យើងការពារសុវត្ថិភាពបានល្អណាស់ជូនប្រជាពលរដ្ឋដែលចូលរួមក្នុងពិធីបុណ្យអុំទូកបីថ្ងៃនេះ ហើយបើសរុបទាំងបុណ្យឯករាជ្យ គឺ ៥-៦ថ្ងៃ។ វាអាចយល់ឃើញថា ប្រហែលជាប៉ូលិសយើងមានការនឿយហត់ខ្លាំងក្នុងកិច្ចការពារសុវត្ថិភាពប្រជាពលរដ្ឋនេះ បានជាវាឆ្លៀតធ្វើសកម្មភាព ក៏ប៉ុន្តែក្នុងតួនាទីយើងជាសមត្ថកិច្ច យើងមិនព្រងើយកន្តើយចោលទេ ទោះបីជាមានការនឿយហត់យ៉ាងណាក៏ដោយ ក៏យើងនៅតែខិតខំធ្វើម៉េចព្យាយាម ការពារសុវត្ថិភាពជូនប្រជាពលរដ្ឋ ក៏ប៉ុន្តែចៃដន្យរឿងវាបានកើតឡើងអ៊ីចឹង ហើយយើងបានឃាត់ខ្លួនវាមួយ ខ្ញុំជឿថា យើងនឹងអាចបានព័ត៌មានមួយចំនួនពីជនល្មើសដែលយើងចាប់បានដើម្បីយើងស្រាវជ្រាវរកបណ្ដាញវាតទៅទៀតដើម្បីបង្ក្រាបកុំឲ្យមានសកម្មភាពបែបនេះតទៅទៀត»។
អាជ្ញាធរនៅមិនទាន់បានបញ្ជាក់អត្តសញ្ញាណជនសង្ស័យដែលគេចាប់ខ្លួននៅពេលនោះនៅឡើយទេ៕