នៅក្នុងសេចក្តីថ្លែងការណ៍រួមរបស់គណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា (CHRAC) ក្រុមការងារពិសេសសិទ្ធិលំនៅ (HRTF) រួមជាមួយនឹងវេទិកាអង្គការមិនមែនរដ្ឋាភិបាលស្តីពីកម្ពុជា (NGO Forum) បានសរសេរថា បច្ចុប្បន្ននេះគឺមានសហគមន៍ក្រីក្រចំនួន៤១០ និងសហគមន៍ដែលកំពុងប្រឈមនឹងការបណ្តេញចេញគឺមានចំនួន៧៤ ដែលពួកគាត់បានទទួលនូវសេចក្តីជូនដំណឹងពីអាជ្ញាធររាជរដ្ឋាភិបាលរួចហើយ។
ការជូនដំណឹងនោះ គឺដើម្បីឲ្យពួកគាត់រុះរើផ្ទះសម្បែងចេញដោយស្ម័គ្រចិត្តជាមួយនឹងសំណងដ៏តិចតួច ដែលពួកគាត់មិនអាចទៅរកទិញលំនៅដើម្បីស្នាក់នៅនិងសម្រួលដល់ការប្រកបរបរទទួលទាននិងការរៀនសូត្ររបស់កូនគាត់នោះ។
នៅក្នុងសេចក្តីថ្លែងការណ៍រួមនោះបានសរសេរទៀតថា សាលារាធានីភ្នំពេញ តែងតែប្រើប្រាស់រូបភាពអភិវឌ្ឍន៍ក្នុងការបណ្តេញចេញប្រជាពលរដ្ឋពីសហគមន៍ក្រីក្រនៅទីក្រុង ហើយអ្វីដែលធ្វើឲ្យប្រជាពលរដ្ឋនៅក្នុងសហគមន៍ក្រីក្រនៅក្នុងទីក្រុងកាន់តែរងផលប៉ះពាល់អវិជ្ជមាននោះ គឺវត្តមាននៃច្បាប់ស្តីពីអស្សាមិករណ៍ដែលរដ្ឋសភាបានអនុម័តថ្មីៗនេះ។ ច្បាប់នេះនឹងធ្វើឲ្យពួកគាត់ត្រូវប្រឈមមុខនឹងការដកហូតកម្មសិទ្ធិឯកជនលើអចលនវត្ថុ។
ការព្រួយបារម្ភនេះ ក្រុមអង្គការសង្គមស៊ីវិលបានអំពាវនិងផ្តល់អនុសាសន៍ដល់រដ្ឋាភិបាលចំនួន៥ចំណុច ក្នុងនោះរួមមានបញ្ឈប់ការអនុវត្តការបណ្តេញចេញនិងផ្អាកការបណ្តេញចេញ លុះត្រាតែរដ្ឋាភិបាលបង្កើតនូវគោលនយោបាយដែលឈរលើគោលការណ៍គោរពសិទ្ធិមនុស្សជាមុនសិន។ ធានាប្រជាពលរដ្ឋដែលរងការបណ្តេញនោះត្រូវទទួលបានសំណងគ្រប់គ្រាន និងការជ្រើសរើសតាំងទីលំនៅ។ ធានាឲ្យមាននូវសំណងដ៏មានប្រសិទ្ធភាពសមរម្យតាមផ្លូវច្បាប់។ ស្របតាមច្បាប់ភូមិបាលឆ្នាំ២០០១ រដ្ឋាភិបាលត្រូវធានាថា គ្រប់ភាគីស្របច្បាប់ទាំងអស់មានសិទ្ធិស្មើគ្នាក្នុងការទទួលបានប័ណ្ណកម្មសិទ្ធិដោយមិនប្រកាន់ជីវប្រវត្តិ ឋានៈសង្គម ព្រទ្យសម្បត្តិ ឬសហគមន៍ដែលគេកំពុងរស់នៅឡើយ៕