តំណាងប្រជាពលរដ្ឋនៅឃុំរលួស អ្នកស្រី ឌួង ឃាង បានឲ្យដឹងថាប្រជាពលរដ្ឋអ្នកនេសាទមកពីឃុំបឹងទូក ឃុំត្រើយកោះ និងឃុំព្រែកត្នោត នៅតែរក្សាជំហរប្រឆាំងនឹងការបូមខ្សាច់លុបផ្ទៃសមុទ្ទ ដែលពួកគាត់បានអះអាងថានឹងបំផ្លាញធនធានធម្មជាតិ មានសារាយសមុទ្ទ ព្រៃកោងកាង និងស្មៅសមុទ្ទ ហើយក៏នឹងប៉ះពាល់ដល់ការប្រកបរបរនេសាទរបស់ពួកគាត់ថែមទៀតផង។
អ្នកស្រី ឌួង ឃាង បានឲ្យដឹងថា ៖ «ខ្ញុំកំពុងតែធ្វើការជាមួយប្រជាពលរដ្ឋ ធ្វើស្នាមមេដៃ សួរមតិគាត់ពីបញ្ហាបូមខ្សាច់ហ្នឹងដែរ។ សួរមតិប្រជាជនហ្នឹង ប្រជាជនដាច់ខាតមិនទទួលស្គាល់ មិនព្រមឲ្យបូមជាដាច់ខាត។ ប្រជាជនមិនចង់ធ្វើខ្ញុំគេ មិនចង់ធ្វើក្នុងរោងចក្រ ចង់រកស៊ីដោយខ្លួនឯងនៅក្នុងសមុទ្ទ ។ប្រជាពលរដ្ឋអំពាវនាវសុំឲ្យលោកឧកញ៉ាទុកកន្លែងសមុទ្ទនេះឲ្យប្រជាជនរកស៊ីទាំងអស់រហូតតកូនតចៅ អត់មានឲ្យចាក់ដីទេ»។
មន្ត្រីសិទ្ធិមនុស្សអាដហុកប្រចាំខេត្តកំពត អ្នកស្រី ទ្រី ឈួន ដែលបានចូលរួមក្នុងកិច្ចជំនួបរវាងអាជ្ញាធរស្រុកកំពតដឹកនាំដោយអភិបាលស្រុក លោក ឃុយ សៀន និងប្រជាពលរដ្ឋអ្នកនេសាទ បានមានប្រសាសន៍ឲ្យដឹងថា ប្រជាពលរដ្ឋអ្នកនេសាទមិនបានទទួលយកការលើកឡើងពីក្រុមហ៊ុន ដូចជាការផ្ដល់ការងារធ្វើ ទឹកស្អាត អគ្គិសនី ការដាំព្រៃកោងកាងបន្ថែម និងការផ្ដល់ឥណទានដោយមិនយកការប្រាក់នោះឡើយ។
អ្នកស្រី ទ្រី ឈួន បានមានប្រសាសន៍ថា ៖ «ពួកគាត់មិនចង់ធ្វើជាកម្មករគេ។ គាត់ចង់មានសេរីភាពក្នុងការប្រកបមុខរបរជាធម្មតា ព្រោះគាត់មើលឃើញថានៅសង្គមកម្ពុជាយើងសព្វថ្ងៃនេះ ប្រាក់បៀវត្សរ៍របស់កម្មករមានកម្រិតទាបណាស់ គាត់មិនអាចរស់បាន។ ហើយសំខាន់ជាងហ្នឹងទៀត មានក្រុមហ៊ុនខ្លះ ដូចថាគាត់ធ្វើជាកម្មករទៅ បើកលុយបើកកាក់អត់ទាន់ពេលទៀត មួយខែពីសែទៅហាហុកសិបដុល្លារហ្នឹង បីខែអីបានបើកលុយឲ្យពួកគាត់ម្ដង។ អ៊ីចឹងគាត់មើលឃើញពីផលលំបាកហ្នឹង សម្រាប់អនាគតគាត់នៅតែចង់មានមុខរបរនេសាទដដែល»។
មិនអាចទាក់ទងសុំការបំភ្លឺពីអភិបាលស្រុកកំពត លោក ឃុយ សៀន បានទេ។ ចំណែកឯប្រធានក្រុមហ៊ុនកំពតផត លោកឧកញ៉ា វិញ ហួរ កំពុងស្ថិតនៅឯក្រៅប្រទេស។
តែទោះជាយ៉ាងណា លោកស្រី ទ្រី ឈួន បានឲ្យដឹងថា លោក ឃុយ សៀន អភិបាលស្រុកកំពត នឹងធ្វើរបាយការណ៍ពីជំនួបជាមួយនឹងពលរដ្ឋអ្នកនេសាទ ហើយប្រជុំជាមួយនឹងក្រុមហ៊ុនកំពតផត និងអាជ្ញាធរខេត្តកំពតនៅសប្ដាហ៍ក្រោយ។
គួរជម្រាបថាប្រជាពលរដ្ឋអ្នកនេសាទបានធ្វើការតវ៉ាចាប់តាំងពីថ្ងៃទី២៣ សីហា ប្រឆាំងនឹងសកម្មភាពបូមខ្សាច់លុបផ្ទៃសមុទ្ទទំហំ១ពាន់ហិកតារ នៅក្នុងភូមិរលួស ឃុំបឹងទូក របស់ក្រុមហ៊ុនកំពតផត និងគម្រោងបូមខ្សាច់លុបផ្ទៃសមុទ្ទចំនួន២០០ហិកតារ នៅភូមិកែបថ្មី និងភូមិទទឹងថ្ងៃ ឃុំបឹងទូក របស់ក្រុមហ៊ុន កែវ ជា Property and Development៕