គ្រួសារលោក នួន ជា៖ ស្ថានភាពជំងឺលោក នួន ជា មានសភាពធ្ងន់ធ្ងរ
2013.01.30
ជនជាប់ចោទ នួន ជា នៅក្នុងសវនាការបឋមសំណុំរឿង ០០២ កាលពីថ្ងៃទី២១ ខែវិច្ឆិកា ឆ្នាំ២០១១។
ក៏ប៉ុន្តែ អ្នកនាំពាក្យសាលាក្ដីខ្មែរក្រហម និយាយថា ស្ថានភាពជំងឺរបស់លោក នួន ជា បានធូរស្រាលឡើងវិញ ហើយលោក នួន ជា នឹងអាចចូលរួមនៅក្នុងអង្គជំនុំជម្រះឡើងវិញនៅថ្ងៃទី៣១ មករា។
ក្រុមគ្រួសាររបស់លោក នួន ជា បងធំទីពីររបស់របបកម្ពុជាប្រជាធិបតេយ្យ អះអាងនៅថ្ងៃពុធ ទី៣០ មករា ថា លោក នួន ជា ទំនងជានឹងមិនអាចបន្តមានជីវិតរស់នៅបានយូរទៀតនោះឡើយ ដោយសារស្ថានភាពជំងឺរបស់គាត់នៅពេលនេះមានអាការធ្ងន់ធ្ងរ ដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត នៅឡើយនោះ។
លោក វិចទ័រ កូប៉េ (Victor Kope) សហមេធាវីការពារក្ដីឲ្យលោក នួន ជា ខាងភាគីអន្តរជាតិ ថ្លែងនៅក្នុងអង្គសវនាការនៃសាលាក្ដីខ្មែរក្រហម នៅរសៀលថ្ងៃទី៣០ មករា ដោយស្រង់សម្ដីក្រុមគ្រួសាររបស់លោក នួន ជា និយាយថា លោក នួន ជា ទំនងជានឹងត្រូវស្លាប់ក្នុងពេលឆាប់ៗខាងមុខនេះ ដោយសារស្ថានភាពជំងឺមានអាការធ្ងន់ធ្ងរ។ ថ្លែងឲ្យដឹងតាមរយៈអ្នកបកប្រែនៅក្នុងអង្គជំនុំជម្រះសាលាក្ដីខ្មែរក្រហម លោក កូប៉េ អះអាងថា គេពិតជាមានការខកចិត្ត និងសោកស្ដាយចំពោះរបាយការណ៍វាយតម្លៃស្ថានភាពជំងឺរបស់មន្ទីរពេទ្យមិត្តភាពខ្មែរ-សូវៀត ដែលរកឃើញថា ស្ថានភាពជំងឺកូនក្ដីរបស់ខ្លួននៅពេលនេះមានភាពប្រសើរនោះ។
លោក វិចទ័រ កូប៉េ៖ «យើងបានជម្រាបទៅអង្គជំនុំជម្រះថា សុខភាពរបស់គាត់បានប្រសើរ គឺយើងធ្វើការជម្រាបហ្នឹង ដោយសារតែយើងផ្អែកទៅលើរបាយការណ៍របស់មន្ទីរពេទ្យ ដែលយើងបានទទួល គឺរបាយការណ៍ដែលទទួលពីព្រឹកម្សិលមិញនេះ។ ដូច្នេះហើយ គឺថាព័ត៌មាននៅក្នុងរបាយការណ៍ហ្នឹង គឺវាមិនបានឆ្លុះបញ្ចាំងអំពីអ្វីដែលបានកើតឡើងចំពោះកូនក្ដីរបស់ខ្ញុំនៅពេលរសៀលនោះឡើយ។ ដោយក្រុមគ្រួសារលោក នួន ជា គាត់ដូចជាជឿជាក់ថា លោក នួន ជា ជិតនឹងស្លាប់ទៅហើយ»។
ក៏ប៉ុន្តែ បុគ្គលិកពេទ្យប្រចាំការនៅអគារពិនិត្យជំងឺទូទៅ "គ" របស់មន្ទីរពេទ្យខ្មែរ-សូវៀត និយាយនៅថ្ងៃទី៣០ មករា ថា ស្ថានភាពជំងឺរបស់លោក នួន ជា នៅពេលនេះមានភាពប្រសើរជាងមុន និងពុំមានអ្វីប្រែប្រួលធ្ងន់ធ្ងរនោះទេ។ ដូចនេះដែរ ប្រធានអង្គជំនុំជម្រះវិសាមញ្ញក្នុងតុលាការកម្ពុជា លោក និល ណុន ថ្លែងថា ផ្អែកតាមរបាយការណ៍របស់មន្ទីរពេទ្យមិត្តភាពខ្មែរ-សូវៀត បញ្ជាក់ថា សុខភាពរបស់លោក នួន ជា បានប្រសើរឡើងវិញហើយ។
លោក និល ណុន៖ «ខាងអើវេជ្ជបណ្ឌិតទទួលថែទាំព្យាបាលលោក នួន ជា នៅមន្ទីរពេទ្យមិត្តភាពខ្មែរ-សូវៀត បានពិនិត្យឃើញថា សភាពទូទៅល្អ ហើយក្អកម្ដងម្កាល កម្ដៅ ៣៧ដឺក្រេ ដង្ហើមពុំមានអ្វីប្រែប្រួលទេ កម្លាំងកំហែងប្រសើរជាងមុន ប៉ុន្តែពុំមានទាន់អាចមានលទ្ធភាពក្រោកអង្គុយដោយលទ្ធភាពដោយខ្លួនឯងបាននៅឡើយ»។
លោក នេត្រ ភក្ដ្រា អ្នកនាំពាក្យសាលាក្ដីខ្មែរក្រហម ថ្លែងថា របាយការណ៍ចុងក្រោយរបស់ក្រុមគ្រូពេទ្យដែលលោកបានទទួលនៅថ្ងៃទី៣០ មករា ឲ្យដឹងថា ស្ថានភាពជំងឺរបស់អតីតបងធំទីពីររបស់របបខ្មែរក្រហម បានវិលទៅរកភាពប្រក្រតីឡើងវិញហើយនៅពេលនេះ ហើយលោក នួន ជា ក៏នឹងត្រូវបង្ហាញវត្តមានរបស់ខ្លួនឡើងវិញ បន្ទាប់ពីខកខានអស់រយៈពេល ១៨ថ្ងៃកន្លងទៅនេះ នៅក្នុងអង្គជំនុំជម្រះវិសាមញ្ញក្នុងតុលាការកម្ពុជា ដើម្បីទទួលការព្យាបាលនោះ។
លោក នេត្រ ភក្ដ្រា៖ «ខាងក្រុមគ្រូពេទ្យបានផ្ដល់នូវរបាយការណ៍ជាបន្តបន្ទាប់ក្រោយអំពីការលើកឡើងរបស់ក្រុមមេធាវីរបស់លោក នួន ជា។ អ៊ីចឹង គឺអ្វីដែលខ្ញុំទទួលបានព័ត៌មានពីចៅក្រម ដែលគាត់ជាអ្នកគ្រប់គ្រងទៅលើកិច្ចការហ្នឹង ហើយនិងក្រុមគ្រូពេទ្យដែលបានផ្ដល់របាយការណ៍ គឺថាលោក នួន ជា មានស្ថានភាពសុខភាពល្អឡើងវិញ ហើយគាត់នឹងវិលត្រឡប់មកមន្ទីរឃុំឃាំងនៃសាលាក្ដីខ្មែរក្រហម នៅរសៀលថ្ងៃទី៣១ ខែមករា ឆ្នាំ២០១៣»។
អតីតប្រធានរដ្ឋសភាក្នុងរបបខ្មែរក្រហម លោក នួន ជា ត្រូវបានគេបញ្ជូនទៅសង្គ្រោះបន្ទាន់កាលពីថ្ងៃទី១៣ មករា នៅមន្ទីរពេទ្យមិត្តភាពខ្មែរ-សូវៀត។ ការបញ្ជូនអតីតបងធំទីពីររបស់របបខ្មែរក្រហមមកព្យាបាលនេះ ធ្វើឡើងភ្លាមៗក្រោយពេលដែលលោក នួន ជា បានដួលនៅក្នុងបន្ទប់ឃុំឃាំងរបស់សាលាក្ដីខ្មែរក្រហម។ ស្ថានភាពជំងឺរបស់លោក នួន ជា ត្រូវក្រុមគ្រូពេទ្យរកឃើញថា លោកមានជំងឺរលាកទងសួតធ្ងន់ធ្ងរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា