កាលពីម្សិលមិញក្រុមប៉ូលិសជាងមួយពាន់នាក់បានប្រើដំបងនិងខែលគ្រប់ដៃ ចែកជាច្រើនក្រុម ព្យាយាមបំបែកក្រុមអ្នកតវ៉ានៅច្រកទ្វារទាំង៧នៃវិមានរដ្ឋាភិបាល ។
ការប៉ះទង្គិចគ្នារវាងអ្នកតវ៉ានៃក្រុមសម្ព័ន្ធភាពប្រជាជនដើម្បីលទ្ធិប្រជាធិបតេយ្យនិងកម្លាំងនគរបាលលើកនេះមានការប្រើគ្រាប់បែកផ្សែង និងគ្រាប់កាំភ្លើងកៅស៊ូដោយកងកម្លាំងប៉ូលិស បណ្តាលឲ្យមានបាតុកររងរបួស ។ អំពើហិង្សានេះបានធ្វើឲ្យមានក្រុមសហជីពនានាសម្រេចចិត្តចូលរួមការតវ៉ាប្រឆាំងរដ្ឋាភិបាល លោក សាម៉ាក់ លើកនេះកាន់តែច្រើន ។
សហជីពកម្មករក្រុមហ៊ុនអាកាសចរណ៍ជាតិរបស់ថៃ Thai International Airways បានអំពាវនាវឲ្យសមាជិកដើរចេញពីការងារដើម្បីសម្តែងសាមគ្គីភាពជាមួយសម្ព័ន្ធភាពដើម្បីលទ្ធិប្រជាធិបតេយ្យ ។ក្រៅពីនេះសហជីពកម្មកររទេះភ្លើង កម្មកររោងចក្រអគិ្គសនី កម្មកររោងចក្រទឹកស្អាត ក៏បានប្រកាសចូលរួមបាតុកម្មប្រឆាំងលោកនាយករដ្ឋមន្ត្រី សាម៉ាក់ ស៊ុនថរ៉ៈវេត នេះដែរ ។
លោកនាយករដ្ឋមន្រ្តីថៃដែលក៏ជារដ្ឋមន្ត្រីក្រសួងការពារជាតិផងនោះ បានប្រកាសជំហររឹងត្អឹងមិនព្រមចុះចាញ់ ។
លោកមានប្រសាសន៍ថា ៖ "..ខ្ញុំមិនថយជាដាច់ខាត ពួកបរទេសគេកំពុងចាំមើលថាតើស្រុកថៃនឹងទៅជាយ៉ាងណា ? នឹងក្រឡាប់ចក្រយ៉ាងណា ? ស្អប់ខ្ពើមគ្នាយ៉ាងណា ? តែត្រូវធ្វើតាមច្បាប់ ត្រូវយកខ្ញុំចេញតាមច្បាប់... មកធ្វើរបៀបនេះមិនបានទេ ខ្មាសគេឯង ខ្មាសពិភពលោក..." ។
ក្នុងពេលជាមួយគ្នានោះក៏មានដំណឹងថា លោកនាយករដ្ឋមន្ត្រីថៃបានស្នើឲ្យប្រកាសភាពអាសន្ន ក៏ប៉ុន្តែខាងលោកឧត្តមសេនីយ៍ អានុផុង ផៅជិនដា មេបញ្ជការទាហានជើងគោកដែលមានឥទ្ធិពលយោធាច្រើនជាងគេបានថ្លែងជំទាស់ ។
បន្ទាប់ពីជួបជាមួយលោក សាម៉ាក់ លោកឧត្តមសេនីយ៍ អានុផុង ក៏បានប្រាប់អ្នកកាសែតថា លោកគ្មានផែនការធ្វើរដ្ឋប្រហារឡើយ ដោយសំអាងថារដ្ឋប្រហារមិនមែនជាដំណោះស្រាយល្អសម្រាប់ស្ថានការណ៍បច្ចុប្បន្ននេះទេ ។
ប្រភពព័ត៌មានពីបាងកកក៏បានឲ្យដឹងផងដែរថា មេដឹកនាំគណបក្សដៃគូក្នុងរដ្ឋាភិបាលចម្រុះ ដូចជាលោក បាន់ហាន ស៊ិល្ប៉ៈអាឆា នៃគណបក្សឆាតថៃជាដើមនោះ បានស្នើឲ្យលោក សាម៉ាក់ ចុះចេញពីតំណែងដោយមិនចាំបាច់រំលាយរដ្ឋសភា ក៏ប៉ុន្តែក្រោយមានការបញ្ចេញមតិក្នុងទីប្រជុំសម្ងាត់កាលពីម្សិលមិញនោះមក គូកនក្នុងរដ្ឋាភិបាលក៏បានប្តេជ្ញាថានឹងបន្តគាំទ្រលោកតទៅទៀត ។
នៅថ្ងៃសៅរ៍នេះព្រលានយន្តហោះនៅភាគខាងត្បូងរបស់ប្រទេសថៃ មានភូកិត ក្រាប៊ី ហាតយ៉ៃ ជាដើមនោះ បានត្រូវក្រុមបាតុករបិទទ្វារ រីឯផ្លូវរទេះភ្លើងនៅទូទាំងប្រទេសក៏នាំគ្នាបិទជាបណ្តើរៗហើយដែរ ៕