ក្រុមគ្រួសារជនរងគ្រោះ ទទូចសុំឲ្យតុលាការស្វែងរកឃាតកពិតប្រាកដមកផ្ដន្ទាទោសតាមច្បាប់។
ចៅក្រមស៊ើបសួរនៃតុលាការខេត្តរតនគិរី លោក ឡុច ឡៅ បានចេញលិខិតជូនដំណឹងស្ដីពីការបញ្ចប់ការស៊ើបសួរទៅលើជនសង្ស័យពាក់ព័ន្ធក្នុងរឿងឃាតកម្មទៅលើអ្នកសារព័ត៌មានវរជនខ្មែរហើយ។
មេធាវីតំណាងដើមបណ្ដឹង លោក ហុក ផល្លា មានប្រសាសន៍បញ្ជាក់ថា នេះគឺជាព័ត៌មានសំខាន់ និងជាការស៊ើបអង្កេតបានលឿនមួយ ដែលក្រុមគ្រួសារជនរងគ្រោះ និងមជ្ឈដ្ឋានសាធារណៈមួយចំនួន ទទូចសុំឲ្យមន្ត្រីស្ថាប័នតុលាការបំពេញភារកិច្ចស្វែងរកឃាតកសម្លាប់អ្នកសារព័ត៌មាន។ លោកបន្តថា មានសាក្សីបំភ្លឺជាច្រើន ឲ្យដឹងថា រឿងឃាតកម្មនេះអាចមានពាក់ព័ន្ធមនុស្សមួយចំនួនទៀត ហេតុនេះលោកត្រៀមនឹងធ្វើការតវ៉ាតាមផ្លូវច្បាប់ ប្រសិនការស៊ើបអង្កេតមិនបានត្រឹមត្រូវ៖ «ខាងតុលាការ គេផ្តល់ដំណឹងឲ្យហើយ មានន័យថា ចំណាត់ការវាលឿនៗខុសសាមញ្ញ អាហ្នឹងមានន័យថា លឿនណាស់។ ឯកសារអង្កេតដែលគាត់សួរសាក្សីបន្ថែម ខ្ញុំនឹងទំនាក់ទំនងទៅខាងតុលាការឲ្យគាត់កូពី (Copy = ថតចម្លង) បន្ថែមទៀត»។
វិទ្យុអាស៊ីសេរី នៅថ្ងៃពុធ ទី២១ ខែវិច្ឆិកា ឆ្នាំ២០១២ មិនអាចទាក់ទងចៅក្រមស៊ើបសួរលោក ឡុច ឡៅ សុំអធិប្បាយពីបញ្ហានេះបានទេ។
យ៉ាងនេះក្តី យោងលិខិតជូនដំណឹងរបស់លោក ជម្រាបមកមេធាវីតំណាងដើមបណ្ដឹង ចុះថ្ងៃទី២០ ខែវិច្ឆិកា ឆ្នាំ២០១២ ដែលវិទ្យុអាស៊ីសេរី ទទួលបាននៅថ្ងៃពុធ ទី២១ ខែវិច្ឆិកា ឆ្នាំ២០១២ ឲ្យដឹងថា សំណុំរឿងទាក់ទិននឹងឈ្មោះ អ៊ាន ប៊ុនហេង ហៅ អេង ជាមន្ត្រីកងរាជអាវុធហត្ថខេត្តរតនគិរី និងភរិយា ឈ្មោះ ស៊ឹម ស្រីវី ដែលជាប់ចោទពីបទធ្វើអំពើមនុស្សឃាតគិតទុកជាមុន ចៅក្រមស៊ើបសួរបានសម្រេចបញ្ចប់ការស៊ើបសួរ និងបញ្ជូនសំណុំរឿងនេះទៅស្ថាប័នអយ្យកាតុលាការខេត្តពិនិត្យសម្រេចនៅរយៈពេលពីរថ្ងៃក្រោយនេះ។
អ្នកយកព័ត៌មានកាសែតវរជនខ្មែរ លោក ហង្ស សិរីឧត្តម ត្រូវបានឃាតកសម្លាប់កាលពីថ្ងៃទី៩ ខែកញ្ញា ឆ្នាំ២០១២។ សាកសពត្រូវបានក្រុមសមត្ថកិច្ចរកឃើញក្រោយពេលពីរថ្ងៃ បន្ទាប់ពីលោកត្រូវគេសម្លាប់ញាត់ចូលទៅក្នុងឃ្លុបក្រោយរថយន្តរបស់លោក ហើយត្រូវគេយកទៅចោលនៅក្នុងចម្ការស្វាយចន្ទីមួយនៅក្នុងភូមិធួយអំពិល ឃុំចាអ៊ុង ស្រុកអូរជុំ ចម្ងាយប្រមាណ ៣គីឡូម៉ែត្រពីក្រុងបានលុង ខេត្តរតនគិរី។
មន្ត្រីផ្នែកអង្កេតជាន់ខ្ពស់សមាគមអាដហុក (Adhoc) លោក ប៉ែន ប៊ុណ្ណារ៍ មានប្រសាសន៍បញ្ជាក់ថា ប៉ូលិសអ្នកស៊ើបអង្កេតរឿងក្តីនេះ បានរកឃើញទីតាំងសាក្សី និងវត្ថុតាងមួយចំនួនដែលគេសង្ស័យជាប់ពាក់ព័ន្ធទៅនឹងឃាតកម្មនេះ៖ «យើងឃើញថា អ្វីដែលសំខាន់ក្នុងតួអង្គដែលយើងចាប់អារម្មណ៍ជាងគេ គឺកូនលោកមេបញ្ជាការប៉េអិមខេត្ត លោកមេបញ្ជាការប៉េអិមស្រុកវ៉ឺនសៃ ហើយនិង សឿន ផែនដី ដែលតុលាការបានកោះហៅមកសាកសួររួចហើយ»។
ចៅក្រមស៊ើបសួរលោក ឡុច ឡៅ កាលពីខែតុលា កន្លងទៅ បានកោះហៅមនុស្ស ១២នាក់ចូលមកបំភ្លឺនៅតុលាការ រួមមាន បីនាក់ជាក្រុមគ្រួសារជនរងគ្រោះ គឺអ្នកស្រី កែវ សុវណ្ណ ជាម្តាយបង្កើត អ្នកស្រី អឺម ចន្ធី ជាភរិយា និងកញ្ញា សាន ម៉ារ៉ាឌី ជាកូនស្រីសពលោក ហង្ស សិរីឧត្តម។ ចំណែកមនុស្សចំនួន ៩នាក់ទៀត មានឈ្មោះ សាត សឿន ហៅ សឿន ផែនដី ឈ្មោះ លិប កេត មេបញ្ជាការរងកងរាជអាវុធហត្ថស្រុកវ៉ឺនសៃ ឈ្មោះ ថង ចាន់ណា មន្ត្រីប៉ូលិសស្រុកវ៉ឺនសៃ ឈ្មោះ គឹង សៀនឡៃ មន្ត្រីកងរាជអាវុធហត្ថខេត្ត និងឈ្មោះ សន គឹមសែន រស់ សំបូរ តឹង ឌឹកប៊ី តឹង យ៉ាងញ៉ឹង ឡេ ហុងស៊ឺង ជាប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។