អតីតអ្នកទោសនៅគុកទួលស្លែងនៃរបបខ្មែរក្រហមចំនួន២នាក់នៅថ្ងៃពុធនេះបានបង្ហាញខ្លួនជាលើកដំបូងនិងថ្លែងទាមទាររកយុត្តិធម៌បន្ទាប់ពីពួកគាត់បានរស់លាក់ប្រវត្តិដ៏ជូរចត់របស់ខ្លួនជិត៣០ឆ្នាំមកហើយនោះ ហើយការបង្ហាញខ្លួននេះក៏ស្របពេលដែលការកាត់ទោសអតីតប្រធានគុកទួលស្លែងឈ្មោះ កាំង ហ្កិចអ៊ាវ ហៅ ឌុច ត្រូវគ្រោងធ្វើឡើងនាសប្តាហ៍ក្រោយនេះដែរ។
តាមរយៈបទសម្ភាសន៍ជាមួយវិទ្យុអាស៊ីសេរីនៅក្នុងទឹកដីខេត្តកំពង់ស្ពឺ អតីតកុមារដែលបានរួចជីវិតពីមន្ទីរឃុំឃាំងស-២១ ឈ្មោះ នង ចាន់ផល បច្ចុប្បន្នមានវ័យប្រហែល៤០ឆ្នាំទៅហើយនោះបានឲ្យដឹងថា ក្នុងរបបខ្មែរក្រហមនាចុងឆ្នាំ១៩៧៨ គឺរូបគាត់ ម្តាយរបស់គាត់ ព្រមទាំងប្អូនៗត្រូវគេនាំទៅគុកទួលស្លែងនោះ។
លោក នង ចាន់ផល បានឲ្យដឹងថា ៖ «ឆ្នាំហ្នឹងគេយកឪពុកខ្ញុំមកមុន។ យកឪពុកខ្ញុំបាន៦ខែ ក្រោយមកបានគេមានលិខិតមួយទៀតហើយនិងមានទាហានអាវខ្មៅហ្នឹងប្រហែលជា៦នាក់ ហើយនិងរថយន្តហ្ស៊ីបមួយយកម្ដាយខ្ញុំមកទៀត»។
លោក នង ចាន់ផល បានឲ្យដឹងទៀតថា រូបគាត់ ប្អូនស្រីម្នាក់ និងប្អូនប្រុស២នាក់ បានរួចពីការសម្លាប់ដោយសារតែបាននាំគ្នាចូលទៅពួនលាក់ខ្លួនក្នុងគំនរខោអាវអ្នកទោស។
ចំណែកឯ នង ចាន់នី ដែលរួចពីការស្លាប់ជាមួយគ្នាដែរនោះបានរំឭកថា ៖ «ថ្ងៃបែកហ្នឹងឃើញលោកតា កែវ ចិន្ដាហ្នឹង មកយកខ្ញុំចេញពីគុក ហើយគាត់ឲ្យទៅនៅផ្ទះគាត់សិន ដល់ពេលគេបើកកុមារកំព្រាកុមារអីអ៊ីចឹងទៅ គាត់យកខ្ញុំទៅដាក់នៅកុមារកំព្រាកូលាបទី២»។
លោក ឆាំង យុ នាយកមជ្ឈមណ្ឌលឯកសារកម្ពុជាបានឲ្យដឹងថា អ្នកដែលរួចជីវិតពីទួលស្លែងមានចំនួនច្រើន ហើយអ្នកទាំងនោះមជ្ឈមណ្ឌលកំពុងតែធ្វើការស្រាវជ្រាវបន្ត។
លោក ឆាំង យុ បានមានប្រសាសន៍ថា ៖ «ចំនួនហ្នឹងតាំងពីដើមមកយើងមិនដែលជឿថា៧នាក់ទេ ហើយយើងបានរកឃើញច្រើនជាង៧ ហើយយើងបានដឹងថាមានមនុស្សជាង១០០នាក់បានដោះលែង ហើយថ្មីៗនេះតាមរយៈខ្សែភាពយន្តវៀតណាម យើងឃើញថាមានក្មេងបួនប្រាំនាក់ទៀតដែលរស់រានមានជីវិត អ៊ីចឹងចំនួននេះវាមិនមែន៧តាំងពីដើមមក ប៉ុន្តែចាំបាច់គឺយើងត្រូវការចំណាយពេលដើម្បីបញ្ជាក់ឲ្យច្បាស់»។
លោក ឆាំង យុ ថ្លែងបន្តថា ពួកគាត់ទាំងនេះគឺជាសាក្សីនៃប្រវត្តិសាស្រ្តរស់មួយដ៏សំខាន់ ៖ «សំខាន់ណាស់ ត្រង់ថាតើគាត់ជាបំណែកប្រវត្តិសាស្ត្រដ៏សំខាន់មួយ ព្រោះគាត់បាននៅកន្លែងហ្នឹង គាត់បានដឹង បានឮ បានឃើញ ទោះបីមិនបានដឹងទាំងស្រុង ប៉ុន្តែចំណែកមួយដែលយើងមិនបានដឹង ជាបំណែកប្រវត្តិសាស្ត្រមួយដែលយើងបានបាត់បង់ ឥឡូវបានត្រឡប់មកវិញហើយ»។
ក្នុងរបបខ្មែរក្រហមនៅគុកទួលស្លែងមានអ្នកទោសប្រមាណ១ម៉ឺន៦ពាន់នាក់ត្រូវបានចាប់យកទៅឃុំឃាំង ធ្វើទារុណកម្ម សួរចម្លើយ និងសម្លាប់ចោល ក្រោមស្នាដៃរបស់ ឌុច។
បច្ចុប្បន្ន ឌុច និងអតីតមេដឹកនាំខ្មែរក្រហម៤នាក់ទៀតកំពុងរង់ចាំការវិនិច្ឆ័យទោសចំពោះអំពើឧក្រិដ្ឋរបស់ខ្លួននាសម័យខ្មែរក្រហមនោះ៕