បញ្ហាបុគ្គលិកសិក្សាព្យួរការងារនៅខែត្របាត់ដំបង
2009.12.31
ក្រុមគ្រូបង្រៀនដែលសុំមិនបញ្ចេញឈ្មោះបានឲ្យដឹងនាព្រឹកថ្ងៃទី៣០ ខែធ្នូ ថា ក្នុងចំណោមគ្រូបង្រៀនភាគច្រើនបានព្យួរឈ្មោះ គឺរក្សានូវក្របខ័ណ្ឌរដ្ឋដដែល គឺកំពុងមានសកម្មភាពនៅតាមសាលា ការិយាល័យអប់រំស្រុក និងមន្ទីរអប់រំខេត្ត។
ប្រភពបន្តថា ភាគច្រើនក្នុងចំណោមបុគ្គលិកសិក្សាគឺមិនបានធ្វើត្រឹមត្រូវតាមការកំណត់របស់ក្រសួងឡើយ ៖ «លុយហ្នឹង នាយកយក ឬការិយាល័យអប់រំយក ឬក៏មន្ទីរអប់រំខេត្តជាអ្នកយក ខ្ញុំដឹងថា វាមានច្រើន!»។
ក្រសួងអប់រំ យុវជននិងកីឡា បានកំណត់ថា គ្រប់បុគ្គលិកសិក្សាអាចទទួលបានការដាក់ឈ្មោះព្យួរនៅក្រសួងបានតែរយៈពេល១ឆ្នាំ ចំណែកឯប្រាក់ខែត្រូវបង្វិលចូលថវិកាជាតិ។
ប្រភពបានបន្តថា គេមិនដឹងអ្នកព្យួរឈ្មោះខាងលើនេះមានចំនួនប៉ុន្មាននាក់លាក់ជាក់ទេ ដោយសារតែការព្យួរឈ្មោះនោះគឺបានធ្វើឡើងដោយការឃុបឃិតគ្នារវាងថ្នាក់ដឹកនាំនៅតាមសាលា ថ្នាក់ដឹកនាំតាមការិយាល័យ និងថ្នាក់ដឹកនាំមន្ទីរ។
លោក ងី សែត ប្រធានមន្ទីរអប់រំខេត្តបាត់ដំបង មិនអាចទាក់ទងសុំការបញ្ជាក់ជុំវិញករណីខាងលើនេះបានឡើយ។ ប៉ុន្តែលោក ម៉ម សាម អនុប្រធានមន្ទីរអប់រំខេត្តបាត់ដំបង បានច្រានចោលដំណឹងនេះ ដោយលោកបញ្ជាក់ថា បុគ្គលិកសិក្សានៅក្នុងមន្ទីរអប់រំខេត្តបាត់ដំបងមានជាង ៨.២០០នាក់។ ចំណែកការព្យួរឈ្មោះត្រូវធ្វើទៅដល់ក្រសួង។
លោក ម៉ម សាម បានបញ្ជាក់ថា ៖ «ខ្ញុំគ្រាន់តែដឹងថា ការព្យួរឈ្មោះត្រូវធ្វើទៅដល់ក្រសួង ជាការធ្វើកន្លងមក។ បងដឹងថា មានព្យួរឈ្មោះដោយលួចលាក់អី ខាងខ្ញុំអត់ទាន់ក្តាប់បានទេព័ត៌មានហ្នឹង»។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យបានមានប្រសាសន៍ថា ករណីគ្រូបង្រៀនព្យួរឈ្មោះទៅបម្រើការងារនៅកន្លែងផ្សេងបានកើតមានឡើងទូទាំងខេត្តក្រុងក្នុងប្រទេសកម្ពុជា។
លោកបន្តថា មូលហេតុជំរុញឲ្យបុគ្គលិកសិក្សាបោះបង់ចោលការងាររបស់ខ្លួនទៅរកការងារនៅកន្លែងផ្សេងជំនួសវិញនោះ គឺដោយសារប្រាក់ខែពួកមានតិចតួចមិនអាចជួយជីវភាពរស់នៅបាន។
លោក រ៉ុង ឈុន បានបន្តថា ស្ថានភាពនេះកំពុងកើនឡើងខ្ពស់នៅកម្រិតបឋមសិក្សា ប៉ុន្តែការមិនបញ្ជូនឈ្មោះទៅឲ្យក្រសួង គឺជាការខុសនឹងច្បាប់កំណត់ ៖ «គ្រាន់តែរក្សាឈ្មោះ ហើយផ្តល់ប្រាក់បៀវត្សរ៍ឲ្យអ្នកគ្រប់គ្រងអាហ្នឹង វាជាការខុសច្បាប់»។
ប្រធានសមាគមគ្រូបង្រៀនកម្ពុជាឯករាជ្យបានបន្តថា ស្ថានភាពគ្រូបង្រៀនបោះបង់ចោលការបង្រៀននៅសាលារដ្ឋបានធ្វើឲ្យខ្វះខាតគ្រូនៅតាមសាលា។ លោកបន្តថា ដើម្បីទប់ស្កាត់បញ្ហានេះទាល់តែមានការដំឡើងប្រាក់ខែឲ្យគ្រូបង្រៀនឲ្យបានគ្រប់គ្រាន់៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ