មន្ត្រី​ខ្មែរ៖ ការ​លុប​ចោល​សេចក្តី​ប្រកាស​រួម​កម្ពុជា​ថៃ​មិនមាន​ផល​ប៉ះពាល់​អ្វី​ទេ

មន្រ្តី​អ្នក​នាំ​ពាក្យ​ក្រសួង​ការបរទេស​កម្ពុជា លោក កុយ គួង បាន​អះអាង​នៅ​ថ្ងៃ​ទី​៣១ ធ្នូ ថា ការ​លុប​ចោល​សេចក្តី​ប្រកាស​រួម​កម្ពុជា​ថៃ​របស់​តុលាការ​រដ្ឋបាល​ប្រទេស​ថៃ​មិន​មាន​ផល​ប៉ះពាល់​ដល់​ការ​ដាក់​ប្រាសាទ​ព្រះវិហារ​របស់​ខ្មែរ​ចូល​ជា​សម្បត្តិ​បេតិកភណ្ឌ​ពិភពលោក​កន្លង​មក​នោះ​ឡើយ។
ដោយ កែវ និមល
2009.12.31
រូប​ព្រះវិហារ ប្រាសាទ​ព្រះវិហារ​ខ្មែរ នៅ​លើ​កំពូល​ភ្នំ​ដងរែក​ នៃ​ខេត្ត​ព្រះវិហារ។
RFA Photo/Keo Nimol

ការ​ប្រកាស​របស់​លោក កុយ គួង បាន​កើត​មាន​ក្រោយ​ពេល​តុលាការ​រដ្ឋបាល​របស់​ប្រទេស​ថៃ​បាន​ចេញ​សាលក្រម​បដិសេធ​សេចក្តី​ប្រកាស​រួម​កម្ពុជា​ថៃ​ទាក់ទង​ជាមួយ​ប្រាសាទ​ព្រះវិហារ​កាល​ពី​ថ្ងៃ​ទី​៣០ ធ្នូ​កន្លង​ទៅ​នេះ។

លោក កុយ គួង បាន​បញ្ជាក់​ថា ៖ «ការ​ដែល​តុលាការ​រដ្ឋបាល​កណ្ដាល​របស់​ក្រុង​បាងកក​នៅ​ថ្ងៃ​៣០ ប្រកាស​លុប​ចោល​សេចក្ដី​ថ្លែង​ការណ៍​កម្ពុជា​ថៃ​ក្នុង​រដ្ឋបាល សាម៉ាក់ ស៊ុនដារ៉ាវេត ហ្នឹង ពាក់ព័ន្ធ​នឹង​បញ្ហា​ដាក់​ប្រាសាទ​ព្រះវិហារ​ក្នុង​បញ្ជី​បេតិកភណ្ឌ​ពិភពលោក វា​ជា​រឿង​ផ្ទៃ​ក្នុង​របស់​ថៃ​វិញ​ហើយ មិន​មាន​ផល​ប៉ះពាល់​អីដល់​កម្ពុជា​ទេ ជា​ពិសេស​គឺ​ប្រាសាទ​ព្រះវិហារ​របស់​យើង​អត់​មាន​ផល​ប៉ះពាល់​អី​ទេ ព្រោះ​មិន​មាន​តម្លៃ​អី​ទេ ព្រោះ​សូម្បីតែ​មុន​ប៉ុន្មាន​ម៉ោង ប៉ុន្មាន​ថ្ងៃ​ដែល​ខាង​គណៈកម្មការ​អង្គការ​បេតិកភណ្ឌ​ពិភពលោក​នៅ​ទីក្រុង​កេបិច​គេ​ដាក់​បញ្ចូល​ហ្នឹង គឺ​ពេល​ហ្នឹង​មាន​គំនាប​ពី​ខាង​ប្រឆាំង រដ្ឋាភិបាល​ថៃ​កាល​ហ្នឹង​បាន​ផ្ញើ​លិខិត​ដោយ​សុំ​ឲ្យ​ពន្យារ​ការ​ដាក់​បញ្ចូល គេ​ហៅ​ថា ព្យួរ​នៃ​សេចក្ដី​ថ្លែង​ការណ៍​រួម​ហ្នឹង ពេល​ហ្នឹង​គណៈកម្មការ​យូណេស្កូ​គេ​អត់​មាន​យក​ចិត្ត​ទុក​ដាក់​ទេ ព្រោះ​គេ​ថា គេ​បញ្ជូល​នេះ​មិន​មែន​ផ្អែក​ទៅ​លើ​សេចក្ដី​ថ្លែង​ការណ៍​ហ្នឹង​ឯ​ណា!»

សូម​រំឭក​ជូន​ថា កាល​ពី​ថ្ងៃ​ទី​១៧ មិថុនា ឆ្នាំ​២០០៨ លោក​រដ្ឋមន្រ្តី​ការ​បរទេស​ថៃ ណុបប៉ាដុន ប៉ាតាម៉ា ក្នុង​អាណត្តិ​លោក​នាយក​រដ្ឋមន្រ្តី សាម៉ាក់ ស៊ុនដារ៉ាវេត បាន​ចុះ​ហត្ថលេខា​លើ​សេចក្តី​ថ្លែង​ការណ៍​រួម​គាំទ្រ​ការ​ប្រកាស​ដាក់​ប្រាសាទ​ព្រះវិហារ​របស់​ខ្មែរ​ក្នុង​បញ្ជី​បេតិកភណ្ឌ​ពិភពលោក។

ការ​គាំទ្រ​របស់​រដ្ឋាភិបាល​លោក សាម៉ាក់ នេះ បាន​ធ្វើ​ឲ្យ​ក្រុម​អាវ​លឿង​មាន​ប្រតិកម្ម​យ៉ាង​ខ្លាំង ហើយ​បាន​ចោទ​ថា ការ​គាំទ្រ​នេះ​មិន​ឆ្លង​ការ​អនុម័ត​របស់​សភា​ថៃ និង​បាន​ប្តឹង​ថា ប្រព្រឹត្ត​ផ្ទុយ​រដ្ឋ​ធម្មនុញ្ញ​ប្រទេស​ថៃ។

លោក កុយ គួង អនុ​រដ្ឋលេខាធិការ​និង​ជា​អ្នក​នាំ​ពាក្យ​ក្រសួង​ការបរទេស​កម្ពុជា បាន​ហៅ​ការ​ចេញ​សាលក្រម​របស់​តុលាការ​រដ្ឋបាល​ថៃ​នោះ​ថា ជា​បញ្ហា​ផ្ទៃ​ក្នុង​របស់​ប្រទេស​ថៃ​តែ​ប៉ុណ្ណោះ។

មន្រ្តី​អង្គការ​យូណេស្កូ​នៅ​កម្ពុជា​មិន​អាច​ទាក់ទង​បាន​ដើម្បី​សុំ​ការ​អធិប្បាយ​ទាក់ទង​ជាមួយ​ការ​លុប​ចោល​ការ​គាំទ្រ​របស់​ប្រទេស​ថៃ​ក្នុង​ការ​ដាក់​ប្រាសាទ​ព្រះវិហារ​ចូល​ជា​សម្បត្តិ​បេតិភណ្ឌ​ពិភពលោក​បាន​ទេ​នៅ​ថ្ងៃ​ទី​៣១ ធ្នូ ដំណាច់​ឆ្នាំ​២០០៩​នេះ។

ប្រាសាទ​ព្រះវិហារ​របស់​ខ្មែរ​ត្រូវ​បាន​ដាក់​ចូល​ជា​សម្បត្តិ​បេតិភណ្ឌ​ពិភពលោក​កាល​ពី​ថ្ងៃ​ទី​៧ កក្កដា ឆ្នាំ​២០០៨។ ក្រោយ​ការ​ប្រកាស​ជា​អន្តរជាតិ​ដាក់​ប្រាសាទ​ព្រះវិហារ​របស់​ខ្មែរ​ចូល​ជា​បេតិភណ្ឌ​ពិភពលោក ប្រទេស​ថៃ​បាន​បញ្ជូន​កងទ័ព​ចូល​មក​តំបន់​ប្រាសាទ​ព្រះវិហារ​នោះ​ធ្វើ​ឲ្យ​មាន​ការ​ប្រឈម​មុខ​រវាង​កងទ័ព​ប្រទេស​ទាំង​ពីរ​រហូត​មក​ដល់​សព្វ​ថ្ងៃ៕

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

មតិយោបល់៖

Anonymous
Dec 31, 2009 09:10 PM

I think we shoudl not concerne about preah vihea ,because it's belong to cambodia after the decision of international court at Lahay 1962,our concern is the farmer khmer people victime by vietnam grabbed the land ,the government khmer should think about that.