កញ្ញា ទូច ស៊ុននិច ធ្លាក់ខ្លួនពិការសម្រាន្តលើគ្រែក្នុងផ្ទះរបស់នាង ក្នុងទីក្រុង Sacramento នៃរដ្ឋCalifornia សហរដ្ឋអាមេរិក មានប្រសាសន៍ប្រាប់វិទ្យុអាស៊ីសេរីថា នាងមិនអាចដើរបានទេ គ្រាន់តែអាចអង្គុយនៅលើរទេះពិការ និងសម្រាន្តលើគ្រែតែប៉ុណ្ណោះ។ នាងថា នាងសព្វថ្ងៃកំពុងរៀនភាសាអង់គ្លេសពីគ្រូអាមេរិកាំងពីរនាក់មកបង្រៀននៅផ្ទះ ៖ "គេមកបង្រៀនដល់ផ្ទះ មានគ្រូជនជាតិអាគាំងពីរនាក់ គាត់មកបង្រៀន មាន Peter Joe និង Peter Car"។
ចំណែកឪពុកនាងបានថ្លែងថា លោករស់នៅសព្វថ្ងៃក្នុងនាមជាអ្នកបម្រើថែរក្សានាងនៅផ្ទះ ដើម្បីជួយធ្វើចលនាខ្លួនប្រាណឲ្យមានសកម្មភាព ដូចជាជួយក្នុងការហាត់ប្រាណដើម្បីឲ្យដំណើរឈាមរត់ស្រូល ៖ "ហាត់ប្រាណ គឺយើងទាំងអស់គ្នាដែលជាពុកប្អូនទាំងអស់ នាំគ្នាជួយធ្វើចលនារាល់ថ្ងៃ ហាត់ប្រាណលើកដៃលើកជើង ច្របាច់សាច់ដុំ ដូចពេទ្យគេប្រាប់អ៊ីចឹង"។
កញ្ញា ទូច ស៊ុននិច ក៏បានបញ្ជាក់ថា នាងនៅតែមានអារម្មណ៍នឹកទៅដល់ស្រុកខ្មែរជានិច្ច ទោះបីជានាងធ្លាក់ខ្លួនពិការសម្រាន្តនៅលើគ្រែក៏ដោយ នាងនៅតែមានមហិច្ឆតាចង់ធ្វើជាអ្នកចម្រៀង និងជាគ្រូបង្រៀននៅស្រុកខ្មែរ ដែលជាអាជីពរបស់នាងពីមុនមក ដែលពេលខ្លះនាងអផ្សុកក៏ច្រៀងលេងម្នាក់ឯងនៅលើគ្រែដែរ ៖ "ព្រោះស្រុកខ្មែរជាទឹកដីកំណើតរបស់នាងខ្ញុំ នៅទីណាក៏ខ្ញុំនឹកដែរ។ វិជ្ជាជីវៈដែលខ្ញុំមានពីមុនមក ទី១ គឺនាងខ្ញុំពីមុនជាសាស្ត្រាចារ្យ ទី២ គឺអាជីពជាអ្នកចម្រៀង អាជីពទាំងពីរហ្នឹងគឺស្ថិតនៅក្នុងអារម្មណ៍នាងខ្ញុំជានិច្ច ពេលខ្លះច្រៀងលេងអ៊ីចឹងទៅ ពេលខ្លះបើនឹកឃើញចង់ច្រៀងគឺខ្ញុំស្រែកច្រៀងអ៊ីចឹងទៅ"។
ការធ្លាក់ខ្លួនពិការរបស់កញ្ញា ទូច ស៊ុននិច បានបន្សល់ទុកនូវការចងចាំ និងកំហឹងឈឺចាប់ចំពោះឃាតកមិនស្គាល់មុខ ដែលរូបនាង និងគ្រួសារនាងទន្ទឹងរង់ចាំអាជ្ញាធរកម្ពុជាវែកមុខរកជនសង្ស័យ ដើម្បីចាប់ខ្លួនយកទៅតុលាការ។ រហូតមកទល់នឹងពេលនេះ មានរយៈពេលជិត ៧ឆ្នាំមកដែលអាជ្ញាធរមិនបានរកឃើញ និងចាប់ខ្លួនជនសង្ស័យនៅឡើយទេ។
ពាក់ព័ន្ធនឹងការស៊ើបអង្កេតចាប់ខ្លួននេះ លោក ចាន់ សុវ៉េត អនុប្រធានផ្នែកស៊ើបអង្កេតសមាគមការពារសិទ្ធិមនុស្សអាដហុក បានប្រាប់វិទ្យុអាស៊ីសេរីថា តុលាការកំពុងតែដំណើរការនៅឡើយ ៖ "ករណីនេះគេកំពុងតែដំណើរការ… បានន័យថា គេកំពុងធ្វើការអង្កេតបន្ត ហើយករណីរាប់ឆ្នាំដូចកញ្ញា ទូច ស៊ុននិច ហ្នឹងហាក់បីដូចជានៅងងឹតឈឹងមិនទាន់មើលឃើញកិច្ចខិតខំប្រឹងប្រែងរបស់អាជ្ញាធរមានសមត្ថកិច្ច ដើម្បីតាមរកជនដៃដល់ដែលបានប៉ុនប៉ងផ្ដាច់អាយុជីវិតកញ្ញា
ទូច សូនិច ហ្នឹងទេ រហូតដល់ថ្ងៃនេះមិនទាន់មានទេ"។
ចំណែកឪពុកនាង ទូច ស៊ុននិច ក៏បានអះអាងដែរថា កន្លងមក លោកធ្លាប់បានឮប្រពន្ធលោក ហេង ពៅ ប្រាប់លោកថា ប្តីរបស់គាត់ដឹងអ្នកសម្លាប់ ទូច ស៊ុននិច ហើយថានៅក្នុងប្រទេសកម្ពុជា មាននារីវ័យក្មេងមួយចំនួនរងការបាញ់ប្រហារ ឬធ្វើឃាតពីគ្រួសារមន្ត្រីជាន់ខ្ពស់ ដោយចោទថាបានលួចស្នេហាជាមួយប្ដីគេ។
លោកក៏បន្ថែមថា ៖ "ហើយសម្លាប់នោះរឿងស្អី? អ៊ីចឹងបានថា ក្នុងពេលនេះខ្ញុំមានអារម្មណ៍មួយចង់ជម្រាបដល់បងប្អូនទាំងអស់កុំឲ្យយល់ច្រឡំថា ទូច សូនិច យកប្ដីគេឲ្យសោះ អាហ្នឹងមួយ គឺថា ទូច សូនិច អត់មានអតចរិតរបៀបទៅយកប្ដីគេ ហើយប្រពន្ធគេមកសម្លាប់ទេ មានតែគេយកនាងតែនាងមិនព្រម មិនលក់កិត្តិយសបាទ ដូចខ្ញុំជម្រាបអ៊ីចឹង នៅស្រុកខ្មែរបើសិនមានស្រីម្នាក់មានអ្នកធំទៅយក អ្នកធំហ្នឹងយកមិនបាន អ្នកធំហ្នឹងទៅសម្លាប់នាងហ្នឹង តែបើអ្នកធំហ្នឹងយកនាងហ្នឹងបាន ប្រពន្ធអ្នកធំហ្នឹងទៅសម្លាប់នាងហ្នឹងទៀត នេះជាបញ្ហា។ តើសម្ដេចតេជា លោកទ្រង់ជ្រាបទេរឿងហ្នឹង? តើរដ្ឋាភិបាលខ្មែរលោកជ្រាបទេ? អ៊ីចឹងនារីដែលគេមានបំណងចង់យកនោះ មិនយកគេ ក៏ងាប់ យកគេក៏ងាប់ តើអយុត្តិធម៌ទេរឿងហ្នឹង"។
ទាក់ទងនឹងការរកយុត្តិធម៌ដល់ជនរងគ្រោះ និងប្រព័ន្ធតុលាការនៅកម្ពុជានេះ លោក ចាន់ សុវ៉េត មានប្រសាសន៍បន្ថែមថាប្រសិនបើអាជ្ញាធរមានសមត្ថកិច្ចមានឆន្ទៈចង់រកនោះ វាមិនពិបាកទេបើទោះបីជានៅកន្លែងណាក៏រកឃើញដែរ ៖ "យើងឃើញថា ស្ថាប័នតុលាការក៏ដូចជាស្ថាប័នមានសមត្ថកិច្ចដែរ ព្រោះថាអ្នកទាំងអស់គ្នាជាអ្នកមានសមត្ថកិច្ចនោះ គឺមិនបានបង្ហាញអំពីសញ្ញាណឲ្យបានច្បាស់លាស់អំពីសមត្ថភាពរបស់ខ្លួន ដែលធ្វើការខិតខំប្រឹងប្រែងដើម្បីរកយុត្តិធម៌ គឺពិបាករកយុត្តិធម៌ណាស់ ក្នុងស្រុកខ្មែរនោះ... ហើយពាក់ព័ន្ធជាមួយកញ្ញា ទូច ស៊ុននិច នេះ យើងគិតថា មិនអាននឹងរកឃើញទេ បើសិនជាអាជ្ញាធរមានសមត្ថកិច្ចគាត់មានឆន្ទៈរក ដើម្បីឲ្យឃាតកនោះមកកាត់ទោស គឺងាយស្រួលទេ ទោះដល់ក្រហែងណាក៏ចាប់បានមកវិញដែរ។ ដូចជាលោក ហេង ពៅ ជាដើម នៅពេលដែលគេដឹងថា គាត់បានប្រព្រឹត្ត ហើយរាជរដ្ឋាភិបាលតម្រូវការចាំបាច់នោះ ធ្វើអីក៏បានដែរ អាចចាប់នាំខ្លួនលោក ហេង ពៅ មកផ្ដន្ទាទោសចាំបាច់នៅក្នុងស្រុកខ្មែរយើង"។
កញ្ញា ទូច ស៊ុននិច ជាជនរងគ្រោះដែលត្រូវបានជនមិនស្គាល់មុខ បានលួចបាញ់កាលពីថ្ងៃទី២១ តុលា ឆ្នាំ២០០៣ ខណៈដែលនាងកំពុងដើរចេញពីហាងទំនិញមួយជាមួយម្ដាយនាងត្រូវស្លាប់នៅនឹងកន្លែងកើតហេតុ។
វិទ្យុអាស៊ីសេរីមិនអាចសុំសេចក្ដីអត្ថាធិប្បាយពីមន្ត្រីនគរបាលស៊ើបអង្កេតក្រសួងមហាផ្ទៃ ឆ្លើយតបនឹងដំណើរការស៊ើបអង្កេតរកមុខជនដៃដល់មកទល់នឹងថ្ងៃនេះយ៉ាងណានោះបានទេ៕