ផ្អែកតាមប្រភពបានឲ្យដឹងថា ការអនុម័តនិងការតែងតាំងនោះ បានធ្វើទ្បើងកាលពីថៃ្ងទី២៤ ខែកញ្ញា កន្លងទៅថ្មីៗនេះ ដែលមានតំណាងប្រទេសជាសមាជិកនៃក្រុមប្រឹក្សានោះ ចំនួន៤៨រូប បានអនុម័តដោយឯកច្ឆន្ទនៅក្នុងកិច្ចប្រជុំរបស់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិនៅក្នុងទីក្រុងហ្សឺណែវ ប្រទេសស្វ៊ីស។
លោកស្រី ពុង ឈីវកេក ប្រធានអង្គការសិទ្ធិមនុស្ស លីកាដូ ដែលបានចូលរួមក្នុងកិច្ចប្រជុំនោះ បានមានប្រសាសន៍ប្រាប់វិទ្យុអាស៊ីសេរីតាមទូរស័ព្ទមកថា អ្នករាយការណ៍ពិសេសនោះ មានតួនាទីនិងសិទ្ធិអំណាច ទាបជាងតំណាងពិសេសរបស់អគ្គលេខាធិការ អ.ស.ប. ទទួលបន្ទុកបញ្ហាសិទ្ធិមនុស្សនៅកម្ពុជា ដែលប្រទេសកម្ពុជាធ្លាប់មានកន្លងមក។
លោកស្រីបានសម្ដែងការសោកស្តាយថា ៖ «ប្រហែលជាលោកមិនសូវមានអំណាចប៉ុន្មាន ដើម្បីជួយប្រទេសកម្ពុជាយើង ជួយប្រជាពលរដ្ឋខ្មែរទេ។ អ៊ីចឹង ខ្ញុំនៅមានការព្រួយបារម្ភ មានការសោកស្ដាយៗ។ យើងនឹងខំជំរុញរដ្ឋាភិបាលយើង ឲ្យលោកមេត្តាធ្វើម៉េចយល់ពីបំណងល្អរបស់អង្គការសហប្រជាជាតិ ដើម្បីឲ្យរដ្ឋាភិបាលយើង លោកធ្វើការជាមួយអង្គការសហប្រជាជាតិ បើធ្វើការជាមួយខ្ញុំថា យើងចំណេញជាង»។
ផ្អែកតាមប្រភពដដែលបានឲ្យដឹងថា អ្នករាយការណ៍ពិសេសនោះ មានតួនាទីធ្វើរបាយការណ៍ស្តីពីបញ្ហាសិទ្ធិមនុស្សនៅកម្ពុជា រាយការណ៍ផ្ទាល់ទៅក្រុមប្រឹក្សាសិទ្ធិមនុស្សរបស់ អ.ស.ប. ហើយការបន្តអាណត្តិរបស់ខ្លួនត្រូវបានតែងតាំងដោយក្រុមប្រឹក្សានេះ គឺខុសពីតំណាងពិសេសរបស់អគ្គលេខាធិការ អ.ស.ប. ដែលមានតួនាទីនិងសិទ្ធិអំណាចធ្វើរបាយការណ៍ដោយផ្ទាល់ជូនអគ្គលេខាធិការ អ.ស.ប. ហើយអាណត្តិរបស់ខ្លួនត្រូវបានបន្តនិងតែងតាំងដោយអគ្គលេខាធិការ អ.ស.ប.។
លោកនាយករដ្ឋមន្រ្តី ហ៊ុន សែន នៃប្រទេសកម្ពុជា បានមានប្រសាសន៍កាលពីថៃ្ងទី១៧ ខែកញ្ញា កន្លងទៅនេះថា ៖ «មនុស្សតែម្នាក់គត់ដែលខ្ញុំមិនទទួលជួប គឺ យ៉ាស្ហ ហ្កាយ តែម្ដង។ ឥឡូវគាត់លាហើយ លទ្ធផលដឹងច្បាស់ហើយថា នាយករដ្ឋមន្រ្តី ហ៊ុន សែន ធ្វើការតទៅទៀត ៥ឆ្នាំទៀត បើនៅ ៥ឆ្នាំទៀត មិនទទួលតទៅទៀត ប៉ុន្តែអ្នកមកថ្មីខ្ញុំទទួល»។
សូមរំឭកថា លោក យ៉ាស្ហ ហ្កាយ តំណាងពិសេសរបស់អគ្គលេខាធិការ អ.ស.ប. ទទួលបន្ទុកបញ្ហាសិទ្ធិមនុស្សនៅកម្ពុជា បានប្រកាសលាលែងចេញពីតំណែងកាលពីថៃ្ងទី២៣ ខែកញ្ញា កន្លងទៅនេះ ក្នុងកិច្ចប្រជុំលើកទី៩ របស់ក្រុមប្រឹក្សាសិទ្ធិមនុស្ស អ.ស.ប. ក្នុងទីក្រុងហ្សឺណែវ ប្រទេសស្វ៊ីស។
ការលាលែងចេញពីតំណែងនោះ បានធ្វើទ្បើងក្រោយពីលោកនាយករដ្ឋមន្រ្តី ហ៊ុន សែន និងមន្រ្តីជាន់ខ្ពស់ក្នុងរដ្ឋាភិបាលរបស់លោក បានបដិសេធមិនព្រមជួបពិភាក្សាស្តីពីបញ្ហារំលោភសិទ្ធិមនុស្សនៅកម្ពុជាកាលពីខែធ្នូ ឆ្នាំ២០០៧ កន្លងទៅ ជុំវិញរបាយការណ៍រំលោភសិទ្ធិមនុស្សក្នុងប្រទេសកម្ពុជា ការរឹបយកដីធ្លីរបស់ប្រជាពលរដ្ឋខែ្មរនិងអំពើពុករលួយកើតមានក្នុងប្រព័ន្ធតុលាការកម្ពុជា៕